ពិធីបុណ្យភ្ជុំបិណ្ឌនៅស្រុកខ្មែរ ត្រូវគេសម្គាល់តាមរយៈការបោះបាយបិណ្ឌ និងការទៅវត្តប្រគេនចង្ហាន់ដល់ព្រះសង្ឃ នៅក្នុងអំឡុងថ្ងៃទី១រោច ខែភទ្របទ រហូតដល់ថ្ងៃទី១៥រោច ខែភទ្របទ ដែលជាថ្ងៃភ្ជុំធំ។ ប៉ុន្តែ អត្តសញ្ញាណនៃពិធីបុណ្យភ្ជុំបិណ្ឌនេះ មិនមែនមានត្រឹមតែប៉ុនណឹងទេ។ ពុទ្ធបរិស័ទខ្មែរដឹងថា ពិធីភ្ជុំបិណ្ឌឈានចូលមកដល់ នៅពេលគេឮធម៌ បរាភវសូត្រ ដែលបន្លឺចេញពីវត្តអារាម និងវិទ្យុទូរទស្សន៍ នៅវេលាទាបភ្លឺ។ តើ បរាភវសូត្រ ជាធម៌អ្វី? មានខ្លឹមសារយ៉ាងណា? ហេតុអ្វីបានជាគេឮធម៌នេះតែក្នុងរដូវបិណ្ឌភ្ជុំ? អ៊ឹម រចនា បានស្វែងរកចម្លើយនៃសំណួរទាំងអស់នេះជូនលោកអ្នក តាមរយៈព្រះភិក្ខុមុនីបាលោ ជួន កក្កដា ព្រឹទ្ធបុរសរងនៃសាកលវិទ្យាល័យព្រះសីហនុរាជ។
