អគ្គីភ័យបំផ្លាញតូបលក់ដូរនិងសំភារៈក្នុងផ្សារចាស់៣០០ ទាំងព្រឹក
អគ្គីភ័យបានឆាបឆេះរយៈពេលជិត៣ម៉ោងធ្វើឲ្យតូបនិងសំភារៈនៅក្នុងផ្សារចាស់ជិត៥០ភាគរយ ក្នុងចំណោមតូបជិត១ពាន់ ត្រូវខូចខាត។អគ្គីភ័យដែលគេសង្ស័យថាបណ្តាលមកពីឆ្លងចរន្តអគ្គីសនីមិនបានធ្វើឲ្យមនុស្សស្លាប់ទេ។ អាជ្ញាធរត្អូញត្អែរថា ស្ថានភាពតូបនៅក្នុងផ្សារធ្វើឲ្យអង្គភាពពន្លត់អគ្គីភ័យពិបាកនឹងជួយសង្គ្រោះឲ្យចំគោលដៅ រួមផ្សំនឹងកង្វះខាតក្នុងការបង្ការបំពង់ពន្លត់អគ្គីភ័យក្នុងចំណោមអាជីវករផងដែរ។
ចុះផ្សាយនៅថ្ងៃ៖
អាជីវករផ្សារចាស់ភាគច្រើនបាននាំគ្នារើកកាយគំនរផេះផង់ពីភ្នក់ភ្លើងចុងក្រោយដែលបានរលត់បន្ទាប់ពីបានឆាបឆេះអស់រយៈពេល ជិតបីម៉ោង ក្រែងលោអាចរកឃើញវត្ថុមានតម្លៃមួយចំនួនដែលពួកគេយកចេញមិនទាន់ ហើយភ្លើងមិនបានឆេះ។
ក៏ប៉ុន្តែមានសង្ឃឹមតិចតួចណាស់ ដោយសារអគ្គីភ័យដែលគេសង្ស័យថាបណ្តាលមកពីឆ្លងចរន្តអគ្គីសនី បានឆេះយ៉ាងខ្លាំងចាប់តាំងពីម៉ោងជាង៧មកម្ល៉េះ នៅព្រឹកថ្ងៃចន្ទនេះ។ សម្រែកខ្ញៀវខ្ញាររបស់អាជីវករជញ្ជូនអីវ៉ាន់ចេញពីផ្សារ ប្រជែងនឹងសម្លេងស៊ីរ៉ែនឡានទឹក ក្រោមកំសួលផ្សែងខ្មៅបាញ់ឡើងទៅលើអាកាសតូបលក់អីវ៉ាន់ និងអីវ៉ាន់ជាច្រើនត្រូវព្រះអគ្គីលេបត្របាក់។
រថយន្តពន្លត់អគ្គីភ័យប្រមាណជា២០គ្រឿងនិងកងកម្លាំងមានសមត្ថកិច្ចជាច្រើនក្រុម ត្រូវគេបញ្ជូនទៅកាន់ជុំវិញជ្រុងទាំង៤នៃផ្សារ និងធ្វើការបាញ់ទឹកពន្លត់ភ្លើង ជាអកុសលភ្លើងរលត់នៅពេលដែលតូបលក់ដូរចំនួន៣០០។ លោក ឃួង ស្រេង អភិបាលរងរាជធានីភ្នំពេញដែលបានចុះទៅកាន់កន្លែងកើតហេតុដែរនោះថ្លែងថា បំពង់ហ្គាសបានបន្តផ្ទុះបន្ថែមពីលើភ្លើងដែលឆាបឆេះនៅកណ្តាលផ្សារ ខណៈដែលកាសង្គ្រោះ និងពន្លត់ភ្លើងរបស់អង្គភាពពន្លត់អគ្គីភ័យមានការលំបាកដោយដោយដំបូលតូបទាបពេក។
ជាមួយគ្នានេះលោក ព្រុំ យ៉ន ប្រធានការិយាល័យបង្កានិងពន្លត់អគ្គីភ័យស្នងការដ្ឋានប៉ូលីស
ក្រុងភ្នំពេញ ថ្លែងថាការខូចខាតសម្ភារៈមានសភាពធ្ងន់ធ្ងរ ដោយសារតែតូបមួយចំនួនសំបូរ
ដោយជាតិក្រណាត់ ធូប ទៀន និងសំភារៈងាយឆេះជាច្រើនទៀត។ សូមបញ្ជាក់ថា ផ្សារចាស់ដែលបានបើកឲ្យអាជីវករលក់ដូរជាច្រើនជំនាន់មកហើយ កន្លងមកមានភាពចម្រូងចម្រាស់រវាងអាជ្ញាធរក្រុងនិងអាជីវករពីព័ត៌មានដោះដូរនិងរុះរើផ្សារជាថ្មី ឲ្យមានលក្ខណៈទំនើបកម្មកន្លែងលក់ដូរ។ ក៏ប៉ុន្តែគម្រោងនេះក៏បានស្ងប់ស្ងាត់ទៅវិញ។
ទោះយ៉ាងនេះក្តីលោកឃួង ស្រេង បានបដិសេធពីការអត្ថាធិប្បាយស្តីពីការស្តារឡើងវិញបន្ទាប់ពីអគ្គីភ័យ ដោយតម្រូវថាគួរសង់ផ្សាររឹងមាំដូចជាផ្សារអូឡាំពិកឬយ៉ាងណានោះទេ។
លោកអភិបាលរងគ្រាន់តែបញ្ជាក់ថា យើងជួយសង្គ្រោះសភាពការណ៍ពេលនេះសិន។
សូមបញ្ជាក់ថានេះជាអគ្គីភ័យធំលើកទី១ហើយនៅរាជធានីភ្នំពេញខណៈដែលប្រទេសកម្ពុជាឈានចូលរដូវរំហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ