ដំណើរត្រួតពិនិត្យតាមឧទ្ធម្ភាគចក្រពីសំណាក់លោក ស ខេង រកឃើញបទល្មើសនេសាទកើតមានច្រើននៅកំពង់ធំ កំពង់ឆ្នាំង
លោក ស ខេង រដ្ឋមន្ត្រីក្រសួងមហាផ្ទៃនៅថ្ងៃទី២៥មករានេះ បានធ្វើដំណើរតាមឧទ្ធម្ភាគចក្រជាលើកដំបូងត្រួតពិនិត្យបទល្មើសនេសាទនៅលើបឹងទន្លេសាប ។ ជាដំណើរធ្វើឡើងបន្ទាប់ពីរដ្ឋាភិបាលបង្កើតគណៈកម្មការបង្រ្កាប និងទប់ស្កាត់បទល្មើសលើផ្ទៃបឹងទន្លេសាបនៅចុងឆ្នាំ២០១៦។ ដំណើរចុះទៅនេះរកឃើញថា នៅខេត្តកំពង់ធំនិងកំពង់ឆ្នាំង បទល្មើសនេសាទកើតមានច្រើន ខណៈនៅបាត់ដំបង សៀមរាប ពោធិ៍សាត់មិនសូវកើតមានបទល្មើស។
ចុះផ្សាយនៅថ្ងៃ៖ កែប្រែថ្ងៃទី៖
ប្រឈមការឃើញបទល្មើសនេសាទកើតមានច្រើននៅខេត្តកំពង់ធំ និង កំពង់ឆ្នាំងយ៉ាងដូច្នេះលោក ស ខេង ប្រធានគណៈកម្មការបង្រ្កាបនិងទប់ស្កាត់បទល្មើសលើផ្ទៃបឹងទន្លេសាបនិងជារដ្ឋមន្ត្រីក្រសួងមហាផ្ទៃ សម្រេចកោះអញ្ជើញអភិបាលខេត្តទាំងពីរឡើងមកភ្នំពេញដើម្បីជួបប្រជុំរកដំណោះស្រាយនៅថ្ងៃទី២៨មករាខាងមុខ។ ហើយចំពោះខេត្តសៀមរាប បាត់ដំបង ពោធិ៍សាត់ វិញអញ្ជើញត្រឹមអភិបាលរងខេត្តមកចូលរួមតែប៉ុណ្ណោះ។ សកម្មភាពដែលចាត់ទុកថា ជាបទល្មើសនេសាទនោះរួមមាន ការដាក់របាំងអួន ស្បៃមុង សម្រាសមែកឈើ និងការដាក់លបជាដើម។
លោក ណៅ ធួក សមាជិកគណៈកម្មការបង្រ្កាប និងទប់ស្កាត់បទល្មើសលើផ្ទៃបឹងទន្លេសាបបានគូសបញ្ជាក់ប្រាក់វិទ្យុបារាំងអន្តរជាតិថា មូលហេតុដែលអាជ្ញាធរហ៊ានអះអាងថាបទល្មើសនេសាទមានការកើនឡើងឬថយចុះនោះគឺឧទ្ធម្ភាគចក្របានបើកបន្ទាបជាប់ផ្ទៃទឹកគឺពិនិត្យឃើញទាំងអស់គ្នាអំពីសកម្មភាពនៃបទល្មើសនេសាទ។
ហើយការសន្និដ្ឋានម្យ៉ាងទៀតនោះ មុនដំណើរត្រួតពិនិត្យបទល្មើសនេសាទតាមឧទ្ធម្ភាគចក្រពីសំណាក់លោក ស ខេង គឺកម្លាំងបង្ក្រាបបទល្មើសនេសាទបានចុះទៅត្រួតពិនិត្យសកម្មភាពល្មើសនានាតាំងពីថ្ងៃទី១៧មករាដោយរកឃើញអួនដាក់ត្រីជិត១០វង់នៅក្នុងខេត្តក្រចេះ។ ការងារនេះត្រូវបាន លោកណៅ ធួក អះអាងថា ធ្វើរហូតដល់ម៉ោង២រំលងអាធ្រាត្រ។
ដោយឡែកទាក់ទងករណីផ្ទុះហិង្សារវាងកម្លាំងសមត្ថកិច្ចនិងប្រជានេសាទល្មើសច្បាប់វិញគឺបានបញ្ជូនមនុស្ស៤០នាក់ទៅតុលាការខេត្តកំពង់ឆ្នាំងដើម្បីឲ្យតុលាការចាត់ការតាមនីតិវិធីច្បាប់។ ក្នុងហេតុការណ៍នេះសមត្ថកិច្ចបានបាញ់គំរាមឡើងទៅលើព្រោះក្រុមប្រជានេសាទប្រដាប់ដោយពូថៅ កាបិត និង ខ្វៅជាដើម។ តែហេតុការណ៍នេះលោក ណៅ ធួក ថាមិនធ្ងន់ធ្ងរនោះទេ។
ឆ្លើយតបនឹងការលើកឡើងដែរថា បទល្មើសនេសាទនឹងធ្វើសកម្មភាពបន្ទាប់ពីការចាក់ចេញរបស់កម្លាំងបង្ក្រាបលោក ណៅ ធួក មិនបានប្រកែកតែលោកបានទទួលស្គាល់ថា បណ្ដាលមកពីកម្លាំងបង្ក្រាបនៅមានចំនួនតិចដោយសារតែកម្លាំងជលផលម្នាក់ទទួលបន្ទុកពីរទៅបីស្រុកក្នុងមួយខេត្ត។ លោកបន្ថែមថា នៅក្នុងដំណាក់កាលដែលលោកទទួលបន្ទុកជាមន្ត្រីជលផលជាង៣០ឆ្នាំមកនេះ គឺមន្ត្រីជលផលជិត២០នាក់ហើយបានស្លាប់នៅពេលចុះបង្ក្រាបបទល្មើសនេសាទដោយសារតែការតដៃពីក្រុមល្មើស។
សូមបញ្ជាក់ថា បទល្មើសនេសាទនៅបឹងទន្លេសាបរាប់ចាប់តាំងពីរដ្ឋាភិបាលបង្កើតគណៈកម្មការបង្រ្កាប និងទប់ស្កាត់បទល្មើសលើផ្ទៃបឹងទន្លេសាបនៅចុងឆ្នាំ២០១៦មកគឺឃាត់មនុស្សបាន៥២នាក់បញ្ជូនទៅតុលាការ រឹបអូសបានទូក ម៉ាស៊ីន កាណូត ជាង២០គ្រឿង ហើយរឹបអូសបានអួនអូសនិងហ៊ុំ៦វង់ និងបានដុតបំផ្លាញឧបករណ៍ល្មើសដែលជាស្បៃមុងឬអួនរាប់ពាន់ម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ