ក្រសួងធនធានទឹក៖ ១១ខេត្ត រងគ្រោះទឹកជំនន់ក្នុងឆ្នាំនេះ
ទោះបីជាស្ថានភាព ភ្លៀងនៅបន្តធ្លាក់រាយប៉ាយកាន់តែច្រើននៅទូទាំងប្រទេស ពិសេសតំបន់ទំនាបកណ្តាល និងខ្ពង់រាប តែក្រសួងធនធានទឹក និងឧតុនិយម បានប្រកាសនៅថ្ងៃនេះថា មកដល់ពេលនេះ ស្ថានភាពជំនន់ទឹកភ្លៀង ក្នុង ១១ខេត្ត បានធូរស្រាល និងស្រកជាបន្តបន្ទាប់ហើយ។ ដូចគ្នាដែរ គណៈកម្មាធិការជាតិ គ្រប់គ្រងគ្រោះមហន្តរាយ បានបន្ថែមថា ជំនន់ទឹកភ្លៀង ក្នុងរយៈពេលនេះ មានកើតឡើង ជាហូរហែ តាំងពីឆមាសទីមួយ តែបង្កការខូចខាតតិចតួច ដល់ហេដ្ឋារចនាសម្ព័ន្ធ ផ្លូវថ្នល់ ស្ពានតូចៗប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៣
កំពង់ស្ពឺ គឺខេត្តចុងក្រោយ ដែលមានជំនន់ទឹកភ្លៀងច្រើន និងទើបតែបានរំដោះ បន្ទាប់ពីខេត្តកំពង់ចាម ត្បូងឃ្មុំ កំពង់ធំ ឧត្តរមានជ័យ បន្ទាយមានជ័យ រតនគីរី សៀមរាប ស្ទឹងត្រែង កណ្តាល និងខេត្តស្វាយរៀង។ បើរាប់តាំងពីមុនថ្ងៃភ្ជុំបិណ្ឌ រហូតដល់ថ្ងៃទី១០ តុលា ខេត្តទាំង ១១នេះ បានត្រាំដោយជំនន់ទឹកភ្លៀង។ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានប្រាប់វិទ្យុបារាំងអន្តរជាតិ នៅថ្ងៃអង្គារនេះថា បរិមាណទឹកភ្លៀង ក្នុងខេត្តកំពង់ស្ពឺ មានច្រើនមែនទែន គឺជាង ២០០មីលីម៉ែត្រ ដល់ជាង ៣៥០មីលីម៉ែត្រ។ លោកបន្ថែមថា ក្រុមការងារអន្តរាគមន៍បាន ចំណាយពេល ប្រាំបួនថ្ងៃ ទើបអាចរំដោះទឹកជំនន់ ពីខេត្តកំពង់ស្ពឺបាន តាមរយៈការបង្វែរទឹកចូលក្នុងប្រឡាយមេរលាំងជ្រៃខាងជើង ដើម្បីចែកចាយតាមប្រព័ន្ធបង្ហូរទឹកនានា បន្ទាប់ពីទឹកនៅក្នុងអាងអូរស្សា និងអាងចាន់ថ្នាល មិនអាចស្តុកទឹកអស់។
បើតាមអ្នកនាំពាក្យរូបនេះ ក្រសួងធនធានទឹក និងឧតុនិយម អាចគ្រប់គ្រងស្ថានភាពជំនន់បានហើយនៅពេលនេះ តាមរយៈការត្រៀមកម្លាំងបច្ចេកទេសគ្រប់ទីកន្លែង រាជធានី ខេត្ត ដើម្បីអន្តរាគមន៍ ករណីជំនន់ទឹកភ្លៀងកើតឡើងជាថ្មី។ ទោះភ្លៀងធ្លាក់មិនទាន់ឈប់ តែកម្ពុជា មានអាងស្តុកទឹកធំៗ មួយចំនួន ដូចជា អាងទឹកតាសាល ក្នុងខេត្តកំពង់ស្ពឺ អាងស្តុកទឹកបានជាង ៦០លានម៉ែត្រគីប អាងទឹកត្រពាំងថ្ម ក្នុងខេត្តបន្ទាយមានជ័យ អាចស្តុកទឹកបាន ៩០លានម៉ែត្រគីប ឬអាងទឹកកំពីងពួយ ក្នុងខេត្តបាត់ដំបងជាដើម ទើបយើងមិនសូវបារម្ភពីជំនន់ដូចឆ្នាំមុនៗ។ លោក ចាន់ យុត្ថា បញ្ជាក់ថាមកដល់ពេលនេះ ក្រសួងធនធានទឹក បានរំដោះទឹកដោយជោគជ័យទាំងស្រុង បើទោះបីជាជំនន់កន្លងមក បានប៉ះពាល់តិចតួច ដល់ប្រឡាយ ខ្នងទំនប់ និងអាចមានផលលំបាកខ្លះ ដល់ជីវភាពរស់នៅប្រចាំថ្ងៃ របស់ពលរដ្ឋមួយរយៈក្តី។
នាយខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានបញ្ជាក់បន្ថែមថា បច្ចុប្បន្នទឹកទន្លេមេគង្គ នឹងមិនជន់ឡើងទៀតទេ ដោយសារពេលនេះជារដូវទឹកស្រក ទោះបីភ្លៀងធ្លាក់បន្តបន្ទាប់ឥតដាច់ តែអត្រាភាគរយកម្ពស់ទឹកភ្លៀង មានតិចតួចប៉ុណ្ណោះ។ លោកបន្ថែមថា ជំនន់ទឹកភ្លៀង កន្លងមក បង្កការខូចខាតតិចតួច ដល់ហេដ្ឋារចនាសម្ព័ន្ធ ផ្លូវថ្នល់ ស្ពានតូចៗជាដើម។
គួរជម្រាបថា កាលពីអំឡុងខែកញ្ញា ឆ្នាំ២០១៥ ខេត្តចំនួន ៨ រួមមាន ខេត្តកោះកុង ព្រះសីហនុ កំពត កែប បាត់ដំបង ប៉ៃលិន បន្ទាយមានជ័យ និងខេត្តពោធិ៍សាត់ បានរងផលប៉ះពាល់ ដោយសារគ្រោះទឹកជំនន់ ដែលបានធ្វើឲ្យដំណាំកសិកម្ម ស្រូវ និងផ្លូវថ្នល់ ផ្ទះសម្បែងជាច្រើនរងការខូចខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ