បច្ចុប្បន្នកំពស់ទឹកបន្តហក់ឡើងសន្សឹមៗតែមិនទាន់ឈានដល់ការប្រកាសអាសន្ន
ខណៈកំពស់ទឹកទន្លេមេគង្គត្រូវបានមើលឃើញថា មានការហក់ឡើងខ្ពស់ខ្លាំង តែផ្ទុយមកវិញមន្ត្រីជំនាញក្រសួងធនធានទឹកពន្យល់ថា មិនទាន់ឈានដល់ការប្រកាសអាសន្ននៅឡើយទេ។ បច្ចុប្បន្នស្ថានភាពកំពស់ទឹកបន្តហក់ឡើងសន្សឹមៗក្នុងកំពស់៨ម៉ែត្រ ដែលជាបរិមាណមួយអាចគ្រប់គ្រងបាន។
ចុះផ្សាយនៅថ្ងៃ៖
ស្តាប់ - ០១:៤២
លោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយមបានគូសបញ្ជាក់ថា គិតត្រឹមថ្ងៃទី២៥សីហា ស្ថានភាពទឹកស្ថិតក្នុងកំពស់៨ម៉ែត្រធម្មតា ទោះបីជាមានភ្លៀងធ្លាក់ច្រើនក៏ដោយ ព្រោះថា ភ្លៀងទាំងនោះមិនបានហូរចូលទន្លេមេគង្គទេ ព្រោះបណ្ដាប្រទេសស្ថិតនៅតំបន់មេគង្គខាងលើបានស្ទាក់ទឹកទុក។
ដោយឡែកចំពោះទឹកស្ទឹងវិញ គឺកំពស់ទឹកបានហក់ឡើងខ្ពស់ និងបានបង្កទៅជាទឹកជំនន់ហើយនៅស្ទឹងសង្កែក្រុងបាត់ដំបង។ លោក ចាន់ យុត្ថា បន្ថែមថា ទឹកស្ទឹងសង្កែទោះបីជាមានជំនន់យ៉ាងណាក៏ដោយ តែទឹកនេះមិនអាចធ្លាក់មកទន្លេសាបបានទេព្រោះថា ក្រសួងបានរៀបចំប្រព័ន្ធទប់ទឹកដើម្បីយកទឹកទាំងនោះទៅផ្គត់ផ្គងការបង្កបង្កើនផល។ ទឹកស្ទឹងសង្កែ ដែលគ្របដណ្ដប់ផ្ទៃដីប្រមាណជា៥ម៉ឺនហិកតា។
លោក ចាន់ យុត្ថា បានទទួលស្គាល់ថា ទោះមានទឹកច្រើនតែខេត្តបាត់ដំបងនៅតែប្រឈមការខ្វះខាតទឹកប្រើប្រាស់ក្នុងការបង្កបង្កើនផលនៅតំបន់មួយចំនួន ទើបបណ្ដាលឲ្យដំណាំស្រូវ៤ម៉ឺនហិកតារងផលប៉ះពាល់។
តាមការព្យាករណ៍ នៅឆ្នាំ២០១៦នេះកម្ពុជាអាចរងជំនន់ពីរប្រភេទគឺទី១-ជំនន់នៅទន្លេមេគង្គគឺនៅស្ថានីយ៍បាសាក់ចតុមុខកំពស់ទឹកអាចនឹងឡើងក្នុងរង្វង់៩ទៅ១០ម៉ែត្រ។ ហើយចំពោះកម្រិតទឹកប៉ុណ្ណេះលោក ចាន់ យុត្ថា សន្និដ្ឋានទឹកឆ្នាំនេះធំ ប៉ុន្តែវានឹងមិនជះផលអវិជ្ជមាននោះទេ តែផ្ទុយមកវិញវាបានផ្ដល់ផលវិជ្ជមានច្រើនជាង ដែលបាននាំមកនូវដីល្បបហូរចូលដីស្រែចំការរបស់ពលរដ្ឋនិងបានហូរទៅបំពេញ ស្ទឹង បឹងបួរ ជាដើម។
ទី២-កម្ពុជាអាចរងជំនន់ទឹកភ្លៀង។ ក៏ប៉ុន្តែជំនន់ទឹកភ្លៀងនេះហាក់មានឥទ្ធិពលឆ្ងាយបន្តិចដែលកម្ពុជាមិនងាយនឹងជួបប្រទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ