លោកកុយ គួង៖ ក្រសួងកំពុងជួយស្ត្រីខ្មែររងគ្រោះនៅចិនជាច្រើននាក់
ក្រសួងការបរទេសកម្ពុជាបានបង្ហាញតួលេខនៃស្ត្រីខ្មែរដែលរងគ្រោះនៅប្រទេសចិនក្នុងឆ្នាំ២០១៤ថា យ៉ាងហោចណាស់មានស្ត្រីជិត៦០នាក់ត្រូវបានជួយសង្គ្រោះមកកាន់កម្ពុជាវិញ។ ក្រសួងការបរទេសកម្ពុជាបានបញ្ជាក់ទន្ទឹមនឹងនេះ ស្ថានទូតខ្មែរប្រចាំប្រទេសចិនបានបញ្ជាក់ថា មានស្ត្រីជាច្រើនទៀតដែលត្រូវការជួយសង្គ្រោះ។
ចុះផ្សាយនៅថ្ងៃ៖
ស្តាប់ - ០២:០៨
ក្រសួងការបរទេសកម្ពុជាបានឱ្យដឹងនៅថ្ងៃទី២៨ មករានេះថា មានស្ត្រីខ្មែរដែលរៀបការជាមួយបុរសជនជាតិចិនជាច្រើននាក់កំពុងរងគ្រោះ។ លោកកុយ គួង អ្នកនាំពាក្យក្រសួងការបរទេសកម្ពុជា បានបញ្ជាក់ថាបច្ចុប្បន្នស្ថានទូតខ្មែរនៅប្រទេសចិនបានទទួលពាក្យបណ្តឹងជាច្រើនទាក់ទងនឹងស្ត្រីដែលរងគ្រោះដោយការរៀបការជាមួយបុរសជនជាតិចិន ព្រោះថាស្ត្រីទាំងនោះ ត្រូវបានលក់ពីបុរសម្នាក់ទៅបុរសម្នាក់ និងជាទាសករផ្លូវភេទ។ ប៉ុន្តែយ៉ាងណាក៏ដោយអ្នកនាំពាក្យរូបនេះ មិនអាចបញ្ជាក់ពីតួលេខនៃអ្នកកំពុងរងគ្រោះនៅប្រទេសចិននោះទេ។
ក្រសួងការបរទេសកម្ពុជា បានបង្ហាញរបាយការណ៍ឱ្យដឹងថា មានស្ត្រី មិនតិចជាង៦០នាក់នោះទេដែលបានរងគ្រោះដោយសារការរៀបការនៅប្រទេសចិន។ ដោយរយៈពេលពេញមួយឆ្នាំ២០១៤ មានស្ត្រីខ្មែរមិនតិចជាង៥៨នាក់ត្រូវបានជួយសង្គ្រោះមកកាន់កម្ពុជាវិញ ហើយបុរសម្នាក់ផ្សេងទៀតបានស្លាប់។ អ្នកស្រីឆន សុគន្ធា ប្រធានផ្នែកស្ត្រី កុមារ និងការដោះស្រាយទំនាស់ក្រៅប្រព័ន្ធតុលាការរបស់អង្គការអាដហុក បានលើកឡើពីមូលហេតុថាការរងគ្រោះនេះ គឺជាចន្លោះប្រហោងនៃមន្ត្រីអាជ្ញាធរមូលដ្ឋានដែលអនុញ្ញាតឱ្យមានក្រុមមេខ្យល់អាចផ្សព្វផ្សាយដល់ប្រជាពលរដ្ឋដោយបោកប្រាស់ពីផលល្អពីជីវិតអាពាហ៍ពិពាហ៍នៅប្រទេសចិន។
បើតាមមន្ត្រីអង្គការអាដហុកដដែលរូបនេះ ការចេញទិដ្ឋាការដ៏ធូររលង់ចំពោះស្ត្រីខ្មែរក្មេងៗទៅប្រទេសចិនតាមរយៈជាលក្ខខណៈទេសចរណ៍ ក៏ជាចំណុចសំខាន់មួយផងដែរ បន្ថែមពីស្ថានភាពក្រីក្រនៃពលរដ្ឋខ្មែរ និងកង្វះព័ត៌មាន។ ចំពោះយន្តការជួយពលរដ្ឋខ្មែរនៅបរទេសវិញ អ្នកស្រី សុគន្ធា បានលើកឡើងថារដ្ឋាភិបាល មិនមានកញ្ចប់ថវិកាសម្រាប់ជួយដល់ពលរដ្ឋដែលរងគ្រោះនៅក្រៅប្រទេសនោះទេ។
សូមកត់សំគាល់ថា ក្រៅពីស្ត្រីខ្មែរចាញ់បោកមេខ្យល់នៅប្រទេសចិននោះ ស្ត្រីខ្មែរជាច្រើនផ្សេងទៀតដែលកំពុងធ្វើការនៅប្រទេសម៉ាឡេស៊ីក៏កំពុងរងភាពអយុត្តិធម៌ផងដែរ។ អង្គការអាដហុកបានបញ្ចេញរបាយការណ៍ថា នៅមានអំពើអយុត្តិធម៌ចំនួន១៣០ករណីចំពោះពលករខ្មែរនៅម៉ាឡេស៊ីដែលត្រូវបានរកឃើញ។ នោះគឺការបាត់ខ្លួន ការធ្វើទារណ្ឌកម្មលើរូបរាងកាយ ការមិនទទួលប្រាក់បៀវត្សរ៍ និងការបង្ខំបន្តអាណត្តិ រួមទាំងការបាត់ដំណឹងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ