អតីតតំណាងរាស្រ្តនៃអតីតបក្សសង្គ្រោះជាតិ អំពាវនាវឲ្យដោះលែងមន្ត្រីមូលដ្ឋាន
ឆ្លៀតក្នុងឱកាសនៃពិធីបុណ្យភ្ជុំបិណ្ឌដែលមានរយៈពេល១៥ថ្ងៃ អតីតតំណាងរាស្រ្ត នៃអតីតគណបក្សសង្គ្រោះជាតិ បាន អំពាវនាវដល់ប្រមុខរាជរដ្ឋាភិបាល ក៏ដូចជាតុលាការកម្ពុជា ធ្វើការលើកលែងទោស ឬទំលាក់បទចោទប្រកាន់ ដល់អ្នកទោសមួយចំនួន នៅតាមមូលដ្ឋាន ។ ការអំពាវនាវរបស់អតីតតំណាងរាស្រ្តនៅពេលនេះ ធ្វើឡើងបន្ទាប់ពី លោកនាយករដ្ឋមន្ត្រី ហ៊ុន សែន ធ្លាប់បង្ហើបពីលទ្ធភាពដោះលែងអ្នកទោសជាលក្ខណៈទ្រង់ទ្រាយធំ ក្នុងឱកាសបុណ្យភ្ជុំបិណ្ឌ ដែលនឹងមកដល់នៅថ្ងៃទី៩ ខែតុលា ខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
យ៉ាងហោចណាស់មានមន្ត្រីថ្នាក់មូលដ្ឋានរបស់អតីតគណបក្សសង្គ្រោះជាតិចំនួន៦នាក់ធ្លាប់កាន់តួនាទីចាប់ពី ចៅសង្កាត់ មេឃុំ ជំទប់ទី១ រួមនឹងបេក្ខភាពក្រុមប្រឹក្សាស្រុក និងក្រុមប្រឹក្សា ឃុំ-សង្កាត់ ជាដើម បានជាប់ឃុំ មុននិងក្រោយការបោះឆ្នោតថ្ងៃទី២៩ កក្កដា។
ថ្លែងប្រាប់វិទ្យុបារាំងអន្តរជាតិ នៅថ្ងៃសុក្រទី២៨ខែកញ្ញានេះ អតីតអ្នកតំណាងរាស្ត្រលោក អ៊ូ ច័ន្ទរ័ត្ន និងជាអ្នកចេញមុខស្នើឲ្យមានការដោះលែង ឬបន្ធូរបន្ថយទោសដល់មន្ត្រីមូលដ្ឋានទាំងនេះលើកឡើងថា បញ្ហាដែលនាំឲ្យពួកគេរងការចោទប្រកាន់ឈានដល់ការឃុំខ្លួន ភាគច្រើនគឺបណ្ដាលមកពីទំនាស់នយោបាយ ដែលផ្ដើមចេញពីការរើសអើងនិន្នាការនយោបាយ នៅថ្នាក់មូលដ្ឋាន។ ដូច្នេះមកដល់ពេលនេះ សមល្មម ដែលប្រមុខរដ្ឋាភិបាល គួរតែគិតគូរផ្ដល់សេរីភាព យុត្តិធម៌ ដល់ពួកគេ ដើម្បីបានជួបជុំគ្រួសារក្នុងឱកាសនៃពិធីបុណ្យភ្ជុំបិណ្ឌ។ នេះបើតាម លោក អ៊ូ ច័ន្ទរ័ត្ន។
អតីតអ្នកតំណាងរាស្ត្រអតីតបក្សប្រឆាំងរូបនេះ បន្ថែមថា ធាតុផ្សំនៃបទល្មើសរបស់ពួកគេ មិនធ្ងន់ធ្ងរដល់ថ្នាក់ មិនអាចទទួលបានការអនុគ្រោះនោះទេ ព្រោះថា កន្លងមកអ្នកខ្លះគ្រាន់តែបញ្ចេញមតិពាក់ព័ន្ធនឹងរឿងនយោបាយ ដែលសិទ្ធិបញ្ចេញមតិរបស់ពួកគេស្របតាមច្បាប់ តែប៉ុណ្ណោះ។ ហើយចំពោះករណីនេះ ប្រសិនបើរដ្ឋាភិបាលបង្ហាញពីមនោសញ្ចេតនាដោះលែងពួកគេ នៅក្នុងឱកាសបុណ្យភ្ជុំបិណ្ឌនេះមែន គឺជាផ្នែកមួយជួយលើកមុខមាត់រដ្ឋាភិបាលទាំងនៅក្នុងប្រទេស និងលើឆាកអន្តរជាតិ។ នេះសម្រាប់ការយល់ឃើញរបស់លោក អ៊ូ ច័ន្ទរ័ត្ន។
ដោយឡែក លោក ជិន ម៉ាលីន អ្នកនាំពាក្យក្រសួងយុត្តិធម៌ បានអះអាងនៅថ្ងៃសុក្រនេះថា ផ្អែកតាមច្បាប់ អតីតមន្ត្រីមូលដ្ឋានរបស់គណបក្សសង្គ្រោះជាតិ ដែលកំពុងជាប់ឃុំមិនទាន់ឈានចូលដល់លក្ខខណ្ឌពិចារណា ក្នុងការលើកលែងទោសនៅឡើយទេ។ នេះក៏ដោយសារតែសំណុំរឿងពួកគេ ស្ថិតនៅក្នុងដំណើរការនិតីវិធីរបស់តុលាការ។ ហើយមធ្យោបាយតែមួយ ដែលជួយពួកគេឲ្យនៅក្រៅឃុំបាន គឺមានតែការតស៊ូក្ដីនៅក្នុងតុលាការតាមរយៈមេធាវីប៉ុណ្ណោះ។
យ៉ាងណាក៏ដោយ លក្ខណៈពិសេសនៃពិធីបុណ្យភ្ជុំបិណ្ឌនៅឆ្នាំនេះ អាចមានការលើកលែងអ្នកទោសជាទ្រង់ទ្រាយធំ ដោយផ្អែកទៅតាមការបង្ហើបរបស់ លោកនាយករដ្ឋមន្ត្រី ហ៊ុន សែន កាលពីជាងមួយខែមុន។ តែក្នុងនោះការលើកលែងទោសផ្ដោតទៅលើគោលការណ៍មនុស្សធម៌ ដែលបំពេញលក្ខខណ្ឌគ្រប់គ្រាន់ស្របទៅតាមច្បាប់ចំពោះស្ត្រីមានផ្ទៃពោះ និងមានកូននៅក្នុងពន្ធនាគារ ចាស់ជរា អ្នកជំងឺ ជាដើម។ នេះបើតាមអ្នកនាំពាក្យក្រសួងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ