ក្រុមអតីតតំណាងរាស្រ្តបក្សប្រឆាំងប្តឹងសុំឲ្យតុលាការកំពូលកាត់ក្តីឡើងវិញរឿងរំលាយបក្សសង្រ្គោះជាតិ
នៅព្រឹកនេះ លោកអ៊ូ ច័ន្ទរ័ត្ន និងលោកកង គឹមហាក់ ដែលជាអតីតតំណាងរាស្រ្តបក្សប្រឆាំងអមដោយមេធាវីម្នាក់ផង បានដាក់ពាក្យបណ្តឹងសុំឲ្យតុលាការកំពូលជំនុំជម្រះសារជាថ្មីលើសំណុំរឿងការរំលាយគណបក្សសង្គ្រោះជាតិ និងសុំរក្សាការពារសមាជិកភាពអតីតតំណាងរាស្រ្ត និងសមាជិកក្រុមប្រឹក្សាឃុំ សង្កាត់ ស្រុក-ក្រុង ខេត្ត-រាជធានីរបស់អតីតបក្សនេះ។ ក៏ប៉ុន្តែអ្នកនាំពាក្យតុលាការកំពូលយល់ថា លទ្ធភាពនៃការសើរើឡើងវិញនេះ មិនអាចទៅរួចនោះទេ។
ចុះផ្សាយនៅថ្ងៃ៖
ស្តាប់ - ០២:០៦
បណ្តឹងទៅកាន់តុលាការកំពូលនេះ ធ្វើឡើងដោយអតីតក្រុមតំណាងរាស្រ្តគណបក្សសង្រ្គោះជាតិរួមមានដូចជាលោកសុន ឆ័យ លោកប៉ុល ហំម លោកអ៊ូ ចាន់រ័ត្ន និង លោកកង គឹមហាក់ជាដើម។ ក្រៅពីនេះ ក៏មានការចូលរួមផ្តិលមេដៃប្តឹងពីសំណាក់អតីតសមាជិកក្រុមប្រឹក្សាឃុំ សង្កាត់ ស្រុក-ក្រុង ខេត្ត-រាជធានីរបស់អតីតគណបក្សសង្រ្គោះជាតិមួយចំនួនទៀត។ អ្នកទាំងនេះ ប្តឹងឡើងក្នុងនាមជាអ្នករងគ្រោះនៅក្នុងសំណុំរឿងរំលាយគណបក្សប្រឆាំង។
លោកផែង ហេង មេធាវីតំណាងឲ្យអតីតសមាជិកគណបក្សសង្រ្គោះជាតិ បានលើកឡើងថា រឿងក្តីរំលាយគណបក្សសង្រ្គោះជាតិ គឺជានីតិវិធីថ្មីរបស់តុលាការកំពូល ហើយតុលាការនេះបានប្រើប្រាស់ក្រមនីតិវិធីរដ្ឋប្បវេណីដើម្បីដំណើរការរឿងក្តីនេះ។ ដូច្នេះបើតាមលោកមេធាវី គឺលទ្ធភាពនៃការសើរើសំណុំរឿងនេះឡើងវិញនៅតែមាន។ ក៏ប៉ុន្តែលោកនៅ មុន្នីជោត អ្នកនាំពាក្យតុលាការកំពូលបានអះអាងប្រាប់វិទ្យុបារាំងអន្តរជាតិថា លទ្ធភាពនៃការបកទៅជំនុំជម្រះសំណុំរឿងនេះឡើងវិញ ប្រហែលមិនអាចទៅរួចទេ។ មិនអាចទៅរួច ព្រោះថា នៅក្នុងសាលដីការំលាយគណបក្សសង្រ្គោះជាតិ ក្រុមចៅក្រមបានគូសបញ្ជាក់ច្បាស់ហើយថា បិទផ្លូវតវ៉ាតទៅទៀត។
គណបក្សសង្រ្គោះជាតិត្រូវបានតុលាការកំពូលកម្ពុជាដែលមានចៅក្រមចំនួន៩រូប បានសម្រេចរំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧ ហើយមន្រ្តីជាន់ខ្ពស់នៃបក្សនេះ ១១៨នាក់ក៏ត្រូវបានកាត់សិទ្ធិធ្វើនយោបាយរយៈពេល៥ ឆ្នាំផងទៀត។ ចំណែកតំណែងជាអ្នកតំណាងរាស្រ្ត និងសមាជិកក្រុមប្រឹក្សាឃុំ សង្កាត់របស់សមាជិកបក្សនេះក៏បានរលាយតាមនោះផងដែរ។ ថ្វីបើគណបក្សសង្រ្គោះជាតិ ត្រូវបានរំលាយជិតមួយខែទៅហើយ ប៉ុន្តែទើបតែពេលនេះទេដែលអតីតសមាជិកបក្សប្រឆាំងប្តឹងជំទាស់ការសម្រេចនោះ។ បើតាមលោកផែង ហេង នេះគឺដោយសារតែមេធាវីត្រូវការពេលវេលា ដើម្បីពិនិត្យពិចារណាពីទិដ្ឋភាពផ្លូវច្បាប់ឲ្យបានច្បាស់លាស់។
យ៉ាងណាក៏ដោយ ពាក្យបណ្តឹងនេះត្រូវបានតុលាការកំពូលទទួលយកតាមនីតីវិធីហើយ។ លោកនៅ មុនីជោត បញ្ជាក់ថា តុលាការនឹងត្រួតពិនិត្យលើបណ្តឹងនេះ បើទោះបីជាលោកយល់ថា នឹងមិនអាចសើរើឡើងវិញបានក៏ដោយ។ សម្រាប់លោកមេធាវី ផែង ហេង វិញ ប្រសិនបើតុលាការកំពូលបានពិនិត្យត្រឹមត្រូវលើបណ្តឹងនេះ នោះតុលាការនឹងបើកសវនាការសំណុំរឿងរំលាយគណបក្សសង្រ្គោះជាតិនេះឡើងវិញជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ