៤ខេត្តកំពុងរងឥទ្ធិពលទឹកជំនន់កម្រិតស្រាល
រយៈពេល១សប្តាហ៍ចុងក្រោយនេះ ខេត្តព្រះសីហនុ កំពង់ស្ពឺ ប៉ៃលិន និងខេត្តបាត់ដំបង កំពុងរងឥទិ្ធពល ជំនន់ទឹកភ្លៀងកម្រិតស្រាល ដែលក្រសួងធនធានទឹកអះអាងថាអាចគ្រប់គ្រងស្ថានការណ៍បាន។ ការជន់លិចនេះ កើតឡើង ដោយសារតែឥទ្ធិពលប្រព័ន្ធសម្ពាធទាប ដែលកំពុងស្ថិតនៅលើប្រទេសកម្ពុជា។
ចុះផ្សាយនៅថ្ងៃ៖
លោក ចាន់ យុត្ថា អ្នកនាំពាក្យក្រសួងធនធានទឹក បានបញ្ជាក់ប្រាប់វិទ្យុបារាំងអន្តរជាតិថា ប្រទេសកម្ពុជាកំពុងតែទទួលរងឥទ្ធិពលរបស់ប្រព័ន្ធសម្ពាធទាប ដែលបណ្តាលឲ្យខេត្តជាប់មាត់សមុទ្រមានភ្លៀងធ្លាក់ខ្លាំង រួមនឹងតំបន់ជួរភ្នំក្រវ៉ាញផង។ អ្នកនាំពាក្យក្រសួងធនធានទឹករូបនេះ បញ្ជាក់ថា ចាប់ពីពេលនេះ ដល់ថ្ងៃទី១៨ ខែកក្កដា ភ្លៀងនឹងបន្តធ្លាក់ ជាពិសេសនៅក្នុងតំបន់មាត់សមុទ្រនៃប្រទេសកម្ពុជា។
បើតាមលោក ចាន់ យុត្ថា ជំនន់ទន្លេមេគង្គវិញ ក៏កំពុងតែកើនឡើងដែរ ដោយសារមានភ្លៀងធ្លាក់នៅក្នុងតំបន់ផ្ទៃរងទឹកភ្លៀងរបស់ទន្លេមេគង្គក្នុងប្រទេសថៃ និងឡាវ។ លោកអះអាងថាទឹកភ្លៀង នៅក្នុងប្រទេសថៃ និងឡាវ នឹងមកដល់ខេត្តស្ទឹងត្រែងក្នុងអំឡុងពេល២ទៅ៣ថ្ងៃខាងមុខ ហើយស្ថានភាពនេះនឹងធ្វើឲ្យទឹកទន្លេមេគង្គលើ (កំពង់ចាម, ត្បូងឃ្មុំ, ក្រចេះ, និងស្ទឹងត្រែង) ហក់ឡើងហូរចូលតំបន់ទំនាបនៅសងខាងទន្លេ។
អ្នកនាំពាក្យក្រសួងធនធានទឹកបានអំពាវនាវឲ្យប្រជាកសិករ ជាពិសេសអ្នករស់នៅតំបន់ទន្លេមេគង្គលើ មានការប្រុងប្រយ័ត្ន និងប្រញាប់ប្រមូលផល ខណៈទឹកទន្លេមេគង្គអាចនឹងជន់លិចនាពេលខាងមុខ។
បើតាមក្រសួងធនធានទឹក ស្ថានភាពកំពស់ទឹកនៅក្នុងខេត្តព្រះសីហនុបានស្រកចុះមួយកម្រិត ជាពិសេសតំផ្លូវជាតិលេខ៤ ស្ថិតក្នុងស្រុកកំពង់សីលា ហើយការធ្វើចរាចរឆ្លងកាត់តាមភូមិសាស្ត្រខាងលើ ត្រូវបានបើកឲ្យដំណើរការជាប្រក្រតីឡើងវិញ បន្ទាប់ពីមានការផ្អាក កាលពីថ្ងៃទី១៥ ខែកក្កដា។
ចំណែកនៅក្នុងខេត្តបាត់ដំបងវិញ ការធ្លាក់ភ្លៀងបន្ថែមក្នុងបរិមាណជាង ៦៦មីលីម៉ែត្រ នៅតំបន់ព្រំដែនកម្ពុជា-ថៃក្នុងភូមិសាស្ត្រស្រុកសំឡូត បានធ្វើឱ្យទឹកស្ទឹងសង្កែ ក្នុងខេត្តបាត់ដំបង ហក់ឡើងជាថ្មីម្តងទៀត ។ គិតត្រឹមម៉ោង ៧ ព្រឹកថ្ងៃទី ១៦ ខែកក្កដា ទឹកស្ទឹងសង្កែ មានកម្ពស់ ១២,៥២ម៉ែត្រគឺខ្ពស់ជាងកម្ពស់ទឹក ដែលបានហក់ឡើងអតិបរមានាពេលថ្មីៗនេះ ០,១០ម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ