សង្គមស៊ីវិលព្រួយបារម្ភចំពោះការគំរាមកំហែងសេរីភាពបញ្ចេញមតិ តែចំនួនអ្នកប្រើអ៊ីនធឺណិតកើតឡើងយ៉ាងគំហុក
សេចក្តីព្រាងច្បាប់ ស្តីពី ឧក្រិដ្ឋកម្មតាមប្រព័ន្ធបច្ចេកវិទ្យាគមនាគមន៍និងព័ត៌មាន កំពុងស្ថិតនៅក្នុងដំណាក់កាលប្រមូលផ្តុំឯកសារបញ្ចូលគ្នានៅឡើយទេ។ នេះជាអ្វីដែលក្រសួងប្រៃសណីយ៍និងទូរគមនាគមន៍ ចេញខ្លួនមកបញ្ជាក់ជាថ្មីទៀត។ ការបញ្ចាក់ដូច្នេះ ធ្វើឡើងបន្ទាប់ពីមានការសម្តែងក្តីព្រួយបារម្ភនិងប្រតិកម្ម ជាច្រើននិងជារឿយៗ ពីសំណាក់សង្គមស៊ីវិលរួមទាំងអ្នកប្រើបណ្តាញសង្គម។ គួរកត់សម្គាល់ថា ខណៈពេលដែលមតិមួយចំនួនខ្លាចការគំរាមកំហែងចំពោះសេរីភាពបញ្ចេញមតិលើប្រព័ន្ធអ៊ីនធឺណិត អត្រាអ្នកប្រើប្រព័ន្ធទំនើបនេះ បានកើនឡើងចំនួន១៦ដង នៅរយៈពេល៥ឆ្នាំចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:២៤
៥ឆ្នាំក្រោយចុងក្រោយនេះ អ្នកប្រើអ៊ិនធឺណិតនៅកម្ពុជា បានកើនឡើងយ៉ាងច្រើនមិនធ្លាប់ជួប និងមានទៅដល់ ជាង៥លាន ៧ម៉ឺន ៤ពាន់នាក់។ នេះបើគិតត្រឹមខែកុម្ភៈឆ្នាំ២០១៥ តែនៅឆ្នាំ២០១០ គឺមានតែជាង៣២ម៉ឺននាក់តែប៉ុណ្ណោះ។ ពោលគឺតួលេខនេះ បានកើតឡើងចំនួន១៦ដង ហើយច្រើនជាង១ភាគ៣នៃប្រជាជនកម្ពុជាសរុប។ ការបង្ហាញតួលេខយ៉ាងដូច្នេះ គឺក្រសួងប្រៃសណីយ៍និងទូរគមនាគមន៍ ហាក់ចង់ប្រាប់ថា របាយការណ៍របស់អង្គការលីកាដូ ដែលថាអ្នកប្រើអ៊ិនធឺណិត មានចំនួន៣លាន៨សែននាក់នោះ គឺមិនត្រឹមត្រូវទេ។ សូមរម្លឹកថា កាលពីថ្ងៃទី១៧ឧសភាកន្លងទៅ អង្គការលីដូ បានចេញរបាយការណ៍កម្រាស២៥ទំព័រ និងបានគូសបញ្ជាក់ថា ច្បាប់ដែលរដ្ឋាភិបាលកំពុងរៀបចំនេះ នឹងប្រើប្រាស់ដើម្បីគាបសង្កត់គ្រប់ទម្រង់ទាំងអស់នៃអត្ថបទដែលរិះគន់អាជ្ញាធររដ្ឋ។
ក៏ប៉ុន្តែ ក្រសួងប្រៃសណីយ៍ អះអាងជាថ្មីទៀតថា ច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យាគមនាគមន៍និងព័ត៌មាន ឬហៅថា ICT គឺកំពុងតែស្ថិតក្នុងដំណាក់កាលរៀបចំនិងប្រមូលផ្តុំឯកសារនៅឡើយទេ។ ក្រសួងបានពន្យល់ថា គម្រោងច្បាប់នេះ គឺមានគោលបំណងដើម្បីធានាការអនុវត្តច្បាប់ប្រយុទ្ធប្រឆាំង និងបង្រ្កាបបទល្មើសតាមប្រព័ន្ធបច្ចេកវិទ្យាគមនាគមន៍និងព័ត៌មាន ព្រមទាំងដើម្បីអភិវឌ្ឍវិស័យបច្ចេកវិទ្យាព័ត៌មាន និង ធានាសុវត្ថិភាព ហើយនិងផលប្រយោជន៍ស្របច្បាប់ក្នុងការប្រើប្រាស់។
ទោះបីជាមានការអះអាងយ៉ាងដូច្នេះក៏ដោយចុះ ក៏អ្នកប្រើអ៊ិនធឺណិត អ្នកប្រើបណ្តាញសង្គម និងសង្គមស៊ីវិលនៅតែមានមន្ទិលនិងព្រួយបារម្ភនៅក្នុងចិត្តជានិច្ច។ ព្រួយបារម្ភព្រោះថា គម្រោងច្បាប់ឧក្រិដ្ឋកម្មតាមប្រព័ន្ធបច្ចេកវិទ្យានោះ អាចនឹងអាវុធ ជារណាំង ឬជាបន្លា ហើយអាចគំរាមកំហែងចំពោះសេរីភាពបញ្ចេញមតិគ្រប់ពេលវេលា។ គេនៅមិនភ្លេចទេថា ពីពេលថ្មីៗនេះ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានស្នើសុំក្រសួងប្រៃសណីយ៍និងក្រសួងមហាផ្ទៃ ឲ្យធ្វើអន្តរាគមន៍ផ្លូវច្បាប់ ចំពោះអ្នកប្រើបណ្តាញសង្គមខ្លះ ដែលជេរប្រមាថលើមន្ត្រីរាជការ និងផ្សាយរូបភាពកត់ត ក្នុងន័យម៉ាក់ងាយ ដល់អ្នករដ្ឋការ។
ទន្ទឹមនឹងនេះ ក្រសួងប្រៃសណីយ៍ បញ្ជាក់ថា ការផ្សព្វផ្សាយខ្លឹមសារដែលប៉ះពាល់ដល់ប្រពៃណីជាតិ រាប់ទាំងការញ៉ុះញង់ឲ្យប្រកាន់ពូជសាសន៍ ជំនឿសាសនា ឬមួយបង្កាច់បរិហាកេរ្តិ៍ផ្សេងៗ នឹងត្រូវរាប់បញ្ចូលជាបទល្មើស។ ចំណែកគោលការណ៍ផ្តន្ទាទោស និងការដាក់ពិន័យ ចំពោះបទល្មើសទាំងឡាយ ត្រូវផ្នែកលើច្បាប់ស្តីពីរបបសារព័ត៌មាន និងក្រមព្រហ្មទណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ