ទូតបារាំងថ្មី ជួបរដ្ឋមន្ត្រីការបរទេសខ្មែរ ជាផ្លូវការលើកដំបូង!
នៅព្រឹកនេះ លោកស្រី Eva Nguyen Binh ឯកអគ្គរដ្ឋទូតបារាំងថ្មី បានជួបជាផ្លូវការលើកទី១ ជាមួយរដ្ឋមន្ត្រី ប្រាក់ សុខុន នៅទីស្តីការក្រសួងការបរទេស។ ក្នុងជំនួបរយៈពេលត្រឹម៤០នាទី តែមានប្រធានបទជាច្រើនដែលត្រូវបានលើកយកទៅពិភាក្សា។ តើប្រធានរឿងទាំងនោះ មានអ្វីខ្លះ?
ចុះផ្សាយនៅថ្ងៃ៖
ស្តាប់ - ០២:១១
ក្រោយពីបានថ្វាយសារតាំងព្រះមហាក្សត្រខ្មែរ នៅថ្ងៃទី១១កក្កដារួចមក, លោកស្រី Eva Nguyen Binh ឯកអគ្គរដ្ឋទូតបារាំងថ្មី បានជួបសម្តែងការគួរសមជាលើកទី១ផ្លូវការដំបូងបំផុត ជាមួយប្រមុខការទូតកម្ពុជា។ ក្នុងជំនួបនេះ ប្រមុខការទូតទាំងពីរ បានលើកទៅពីសំណុំរឿងទ្វេភាគីសំខាន់ៗមួយចំនួន។
រឿងទាំងនោះមានដូចជាកិច្ចសហការវប្បធម៌ ដោយសារតែឆ្នាំនេះគឺជាខួប២៥ឆ្នាំការដាក់បញ្ចូលប្រាសាទអង្គរ ក្នុងបញ្ជីរបស់អង្គការយូណេស្កូ ហើយកម្ពុជាក៏ទើបតែបានដាក់ប្រាសាទសំបូរព្រៃគុកជាសម្បត្តិបេតិកភណ្ឌពិភពលោកផងដែរ។ ប្រធានរឿងផ្សេងទៀត គឺទាក់ទងការវិនិយោគបារាំងនៅកម្ពុជា, កិច្ចការក្នុងសាលាក្តីខ្មែរក្រហម, ការបណ្តុះបណ្តាលកងទ័ពខ្មែរដោយនាយទាហានបារាំង, បញ្ហាកិច្ចព្រមព្រៀងអាកាសធាតុទីក្រុងParis និងការបោះឆ្នោតនៅកម្ពុជាជាដើម។
ចំពោះសំណុំរឿងតុលាការខ្មែរក្រហម, ស្ថានទូតបារាំង នឹងធ្វើស្តូបរម្លឹកវិញ្ញាក្ខន្ធជនរងគ្រោះក្នុងសម័យខ្មែរក្រហម នៅសួនច្បារមុខស្ថានទូតបារាំងតែម្តង ដែលនឹងត្រូវសម្ពោធនៅដំណាច់ឆ្នាំ២០១៧នេះ។ ពីផ្នែកកម្ពុជាវិញ លោក ប្រាក់ សុខុន បានថ្លែងអរគុណបារាំង ដែលសមភាគីនេះ តែងតែជួយបណ្តុះបណ្តាលកងទ័ពមួកខៀវរបស់ខ្មែរ ដើម្បីបំពេញកិច្ចរក្សាសន្តិភាពនៅបរទេស ពិសេសនៅ អាហ្វ្រិក។
ដោយឡែក ជុំវិញដំណើរការបោះឆ្នោតនៅស្រុកខ្មែរវិញ, ឯកអគ្គរដ្ឋទូតបារាំងថ្មី បានលើកសរសើរពីការចូលរួមរបស់ពលរដ្ឋ ក្នុងការបោះឆ្នោតមានកម្រិតខ្ពស់។ លោកស្រីបានវាយតម្លៃយ៉ាងវិជ្ជមានចំពោះការបោះឆ្នោតឃុំសង្កាត់កន្លងទៅនេះ ដោយគូសបញ្ជាក់ថា មានរបៀបរបបល្អ សន្តិភាព ស្ងប់ស្ងៀម ហើយបារាំងនៅតែគាំទ្រជានិច្ចចំពោះលើផ្លូវប្រជាធិបតេយ្យរបស់កម្ពុជា។ ទោះយ៉ាងនេះក្តី ភាគីទាំងពីរ គ្មានទាន់បាននិយាយពីជំនួយរបស់បារាំង សម្រាប់បោះឆ្នោតតំណាងរាស្ត្រ នៅឆ្នាំក្រោយនៅឡើយទេ។
គួរបញ្ជាក់ថា លោកស្រី Eva Nguyen Binh មានឪពុកដើមកំណើតវៀតណាមម្តាយបារាំង និងបានរស់នៅរៀនសូត្រសាលានយោបាយនៅស្រុកបារាំង។ លោកស្រីគឺឯកអគ្គរដ្ឋទូតបារាំងទី៩ និងជាទូតបារាំងស្ត្រីទី១ នៅកម្ពុជា គឺតាំងពីបារាំងបើកស្ថានទូតជាថ្មី នៅឆ្នាំ១៩៩១មក។ លោកស្រី Eva Nguyen Binh បានចូលមកកាន់ការងារស្ថានទូតនៅស្រុកខ្មែរ ជាងមួយខែមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ