បំលាស់ទីពីផ្ទះទឹកទៅលើគោក៖ អាជ្ញាធរខេត្តកំពង់ឆ្នាំងច្រានចោលការចោទប្រកាន់ថាកាត់ដីឲ្យយួន
អាជ្ញាធរខេត្តកំពង់ឆ្នាំង បានជម្រុញឲ្យក្រុមហ៊ុនម៉ៅការចាក់ដី ពន្លឿនការងាររបស់ខ្លួន ដើម្បីរៀបចំហេដ្ឋារចនាសម្ព័ន្ធទីតាំងភូមិថ្មីមួយ ស្ថិតនៅក្នុងឃុំស្វាយជ្រុំ ស្រុករលាផ្អៀរ ដែលអាចអនុញ្ញាតឲ្យអ្នកដែលរស់នៅលើផ្ទះបណ្តែតទឹកអាចទៅរស់នៅបាន។ ក៏ប៉ុន្តែការត្រៀមដី៤០ហិចតា សម្រាប់ទទួលអ្នករស់នៅលើផ្ទះបណ្តែតទឹក ដែលរួមមានជនជាតិវៀតណាម ខ្មែរឥស្លាម និងពលរដ្ឋខ្មែរផងនោះ បានរងនូវការរិះគន់ ថាអាជ្ញាធរខេត្តកំពង់ឆ្នាំងកាត់ដីឲ្យវៀតណាម។ ក៏ប៉ុន្តែការចោទប្រកាន់នេះ ត្រូវអាជ្ញាធរបដិសេធ។
ចុះផ្សាយនៅថ្ងៃ៖
ស្តាប់ - ០១:៤៩
អភិបាលរងខេត្តកំពង់ឆ្នាំង លោក ស៊ុន សុវណ្ណារិទ្ធ បានថ្លែងប្រាប់វិទ្យុបារាំង RFI នៅថ្ងៃពុធនេះថា ការរៀបចំបំលាស់ទីប្រជាជន ដែលរស់នៅលើផ្ទះបណ្តែតទឹកប្រមាណជាង៤ពាន់គ្រួសារ គឺជាការធ្វើឡើងដោយការស្ម័គ្រចិត្ត និងភាពម្ចាស់ការ។
ជាការកត់សម្គាល់ ប៉ុន្មានថ្ងៃមកនេះ អ្នកតាមដានសង្គមមួយចំនួន និងអ្នកដែលមាននិន្នាការផ្ទុយពីគោលនយោបាយរបស់រដ្ឋាភិបាលកម្ពុជាបច្ចុប្បន្ន បានធ្វើការរិះគន់ និងចោទប្រកាន់ថាអាជ្ញាធរខេត្តកំពង់ឆ្នាំង បានកាត់ដីឲ្យវៀតណាម តាមរយៈការត្រៀមដីចំនួន៤០ហិចតា នៅក្នុងខេត្តនេះសម្រាប់ឲ្យពលរដ្ឋ ដែលរស់នៅលើទឹក តាំងទីលំនៅថ្មីនៅលើគោក។
ក៏ប៉ុន្តែ លោក ស៊ុន សុវណ្ណារិទ្ធ អភិបាលរងខេត្តកំពង់ឆ្នាំង ពន្យល់ថាការបំលាស់ទីអ្នករស់នៅលើផ្ទះបណ្តែតទឹក ឲ្យទៅនៅលើគោក គឺជាការគិតគូពីហេតុផលបរិស្ថាន ភាពប្រសើឡើងនៃការរស់នៅរបស់មនុស្ស និងធ្វើទៅតាមច្បាប់ជាតិ និងអន្តរជាតិ។ អភិបាលរង ដែលជាប្រធានគណៈកម្មការបំលាស់ទីប្រជាជនផ្ទះទឹក បញ្ជាក់ថាចំណាត់ការរបស់រដ្ឋបាលខេត្ត មិនមែនជាការកាត់ដីឲ្យយួននោះទេ ដោយហេតុថានៅលើគោកក៏ជាដីខ្មែរ និងនៅក្នុងទឹកក៏ជាដីខ្មែរ។
សូមបញ្ជាក់ថាវត្តមានរបស់ប្រជាជន ដែលរស់នៅលើផ្ទះបណ្តែតទឹក ដែលក្នុងនោះមានចំរុះជាជនជាតិវៀតណាម ខ្មែរឥស្លាម និងពលរដ្ឋខ្មែរ ដែរនោះ បានធ្វើឲ្យបរិស្ថានទឹកបឹងទន្លេសាប រងនូវការបំពុល និងគោករាក់ ដោយសារតែការបន្ទោបង់ បោះកាកសំណល់ចូលទៅក្នុងទឹក និងការបង្ហូរប្រេងម៉ាស៊ីនចូលទៅក្នុងទឹកជាដើម។ ស្ថានភាពបែបនេះ តម្រូវឲ្យមានការស្តាឡើងវិញនៃបរិស្ថានបឹងទន្លេសាប និងធ្វើឲ្យប្រសើឡើងនូវកំណើនត្រីទឹកសាបឡើងវិញ ខណៈបឹងទន្លេងសាបជាជង្រុគត្រីដ៏សំខាន់បំផុតរបស់ប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ