វេទិកាអនាគត៖ ការបោះឆ្នោតឆ្នាំ ២០១៨ នឹងក្លាយជាវិញ្ញាសានៃកំណែទម្រង់ និងការវិវឌ្ឍ
វេទិកាអនាគត (Future Forum) ដែលជាស្ថាប័នសិក្សាពីគោលនយោបាយសាធារណៈ បានចេញផ្សាយរបាយការណ៍សង្ខេបមួយ ស្តីពី ទិដ្ឋភាពរួម និងការវិភាគទៅលើស្ថានភាពនយោបាយកម្ពុជានាពេលបច្ចុប្បន្ន។ ជារបាយការណ៍វិភាគ ដែលមានកម្រាស់ ១៦ទំព័រ បានរៀបរាប់ឡើងវិញពីទិដ្ឋភាពនយោបាយនៅកម្ពុជានាពេលបច្ចុប្បន្ន និងយុទ្ធសាស្រ្តរបស់គណបក្សធំៗពីរនៅកម្ពុជា ដែលកំពុងប្រកួតប្រជែងគ្នា ឆ្ពោះទៅរកការបោះឆ្នោតឃុំសង្កាត់នៅឆ្នាំ ២០១៧ និងការបោះឆ្នោតជាតិនៅឆ្នាំ ២០១៨។ សម្រាប់វេទិកាអនាគត ការបោះឆ្នោតឆ្នាំ ២០១៨ នឹងក្លាយជាវិញ្ញាសានៃកំណែទម្រង់ និងការវិវឌ្ឍ។
ចុះផ្សាយនៅថ្ងៃ៖
ស្តាប់ - ០១:៥៧
ដោយបានលើកឡើងពីរបត់នៃការបោះឆ្នោតជាតិកាលពីខែកក្កដាឆ្នាំ ២០១៣ វេទិកាអនាគត (Future Forum) របស់លោក អ៊ូ វីរៈ ដែលជាស្ថាប័នសិក្សាពីគោលនយោបាយសាធារណៈ បានចេញផ្សាយរបាយការណ៍សង្ខេបមួយ ដោយផ្តោតលើ ទិដ្ឋភាពរួម និងការវិភាគទៅលើស្ថានភាពនយោបាយកម្ពុជានាពេលបច្ចុប្បន្ន។ ជារបាយការណ៍វិភាគ ដែលមានកម្រាស់ ១៦ទំព័រ បានរំលឹកឡើងវិញ ពីទិដ្ឋភាពនយោបាយនៅក្នុងប្រទេសកម្ពុជា ហានិភ័យ និងយុទ្ធសាស្រ្តប្រកួតប្រជែងរវាងគណបក្សធំៗពីរនៅកម្ពុជា គឺគណបក្សប្រជាជនកម្ពុជា និងគណបក្សសង្រ្គោះជាតិ ហើយបានចាត់ទុកស្ថានភាពនយោបាយនៅកម្ពុជានាពេលបច្ចុប្បន្ននេះថា គឺជាលទ្ធផលនៃយុទ្ធសាស្រ្តប្រកួតប្រជែងដោយមិនស្មើភាពគ្នា ក្រោយពីឆ្នាំ ២០១៣។
របាយការណ៍បានលើកឡើងថា លទ្ធិប្រជាធិបតេយ្យមិនមែនគ្រាន់តែការបោះឆ្នោតនោះទេ។ តែគឺជាការគោរពបាននូវនីតិរដ្ឋ, គោរពសិទ្ធិសេរីភាពមូលដ្ឋាន, សិទ្ធិខាងការបញ្ចេញមតិ, ការប្រមូលផ្តុំ, និងមានសង្គមស៊ីវិលដែលរឹងម៉ាំនិងរស់រវើក។ បន្ថែមលើនេះ ការបែងចែកអំណាចរដ្ឋទាំងបី ត្រូវធ្វើឡើងយ៉ាងពិតប្រាកដ តម្លាភាព គណនេយ្យភាព និងការបែងចែកផលពីសេដ្ឋកិច្ចឲ្យបានគ្រប់ៗគ្នា។ ប៉ុន្តែរបាយការណ៍វិភាគនេះ បានស្តីបន្ទោសថា របៀបលេងនយោបាយបែបប្រថុយប្រថាននៅកម្ពុជាក្នុងពេលបច្ចុប្បន្ននេះ គឺជាឧបសគ្គក្នុងការដាក់ចេញនូវគោលនយោបាយ ដែលជាដំណោះស្រាយពិតប្រាកដ ចំពោះបញ្ហាសំខាន់ៗរបស់ជាតិ។
ទោះជាយ៉ាងនេះក្តី របាយការណ៍នេះបង្ហាញនូវសុទិដ្ឋិនិយមថា ការផ្លាស់ប្តូរនយោបាយដោយងាកចេញពីការផ្តោតលើបុគ្គល និងភាពភ័យខ្លាច ទៅរកគោលនយោបាយ និងគុណតម្លៃ នៃកំណែទម្រង់ស្ថាប័នជុំវិញបញ្ហារបស់ពលរដ្ឋ ផ្នត់គំនិត និងរចនាសម្ព័ន្ធ នោះកម្ពុជាអាចនឹងបំពេញដោយសក្តានុពលរបស់ខ្លួនជាមិនខាន។
ដោយបានលើកឡើង ពីយុគ្គសម័យថ្មីនៃការរីកចំរើនរបស់ប្រជាពលរដ្ឋខ្មែរក្មេងៗ ដែលប្រកបដោយស្មារតី និងឆន្ទៈនយោបាយខ្ពស់ នឹងនាំឲ្យកម្ពុជាឆ្ពោះទៅរកការបោះឆ្នោតនៅឆ្នាំ ២០១៨ខាងមុខថា ជាវិញ្ញាសានៃកំណែទម្រង់ និងការវិវឌ្ឍថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ