ធនាគារពិភពលោក៖ អនាគតការងារនៅកម្ពុជាកំពុងស្ថិតនៅលើចំណុចរបត់មួយ
ធនាគារពិភពលោកឬWorld Bank បានចេញផ្សាយរបាយការណ៍របស់ខ្លួននៅថ្ងៃអង្គារនេះ ដោយព្យាករណ៍ពីអនាគតការងារនៅប្រទេសកម្ពុជា។ អនាគតការងារនៅប្រទេសកម្ពុជា ដែលត្រូវបានអ្នកជំនាញរបស់ធនាគារលំដាប់អន្តរជាតិមួយនេះ រកឃើញថា កំពុងស្ថិតនៅលើចំណុចរបត់មួយ ខណៈគុណភាពការងារកំពុងមានការកែលម្អ ប៉ុន្តែចាំបាច់ត្រូវមានគោលនយោបាយថ្មីៗទៀតដើម្បីទាញអត្ថប្រយោជន៍ពីទីផ្សារសកល។
ចុះផ្សាយនៅថ្ងៃ៖
ស្តាប់ - ០២:០៥
យោងតាមរបាយការណ៍កម្រាស់៥៥ទំព័រ ធនាគារពិភពលោកបានធ្វើការទស្សន៍ទាយថា ប្រភពនិងប្រភេទការងារនាពេលអនាគតរបស់កម្ពុជាដែលនឹងផ្តល់ដល់ក្រុមហ៊ុន និងកម្មករនិយោជិតនូវអត្ថប្រយោជន៍ច្រើនជាងអ្វីដែលមាននាពេលបច្ចុប្បន្ន។
វិស័យនាំចេញនឹងបង្កើតការងារមានតម្លៃកាន់តែខ្ពស់ទាំងនៅក្នុងរោងចក្រខ្លួនឯង និងសហគ្រាសខ្នាតតូច និងធម្យមថ្មី ដែលនឹងធ្វើការផ្គត់ផ្គង់ដល់ក្រុមហ៊ុន ដែលមានវិនិយោគពីបរទេស។ ប៉ុន្តែការផលិតសម្លៀកបំពាក់ទំនងជានឹងធ្លាក់ចុះបន្តិចម្តងៗនៅក្នុងទសវត្សន៍ខាងមុខដោយសារតែនិន្នាការធំៗដែលកើតឡើងគឺលទ្ធភាពនៃការបាត់បង់ភាពអនុគ្រោះពន្ធគយពីសហភាពអឺរ៉ុប និងអាមេរិក។ នេះបើតាមរបាយការណ៍របស់World Bank។
ចំនួនការងារដែលប្រើចំណេះដឹងខ្ពស់នឹងបន្តកើនឡើង នៅពេលដែលការងាររកកម្រៃគ្រាន់តែចិញ្ចឹមក្រពះនឹងបន្តធ្លាក់ចុះបន្តិចម្តងៗ។ ក្នុងចំណោមការងារចំនួន៨លាននៅកម្ពុជា គឺមាន៣៧ភាគរយជាការងារដែលបានប្រាក់ចំណូលខ្ពស់រួមទាំងអត្ថប្រយោជន៍បន្ថែម ខណៈ៦៣ភាគរយទៀតនៅតែជាការងារបែបប្រពៃណីនៅឡើយ។ នេះជាការគូសបញ្ជាក់នៅក្នុងសេចក្តីប្រកាសព័ត៌មានរបស់ធនាគារពិភពលោក។
បើតាមធនាគារពិភពលោក ក្រុមហ៊ុនដែលគ្រប់គ្រងដោយជនបរទេសគឺបានបង្កើតការងារច្រើនជាងក្រុមហ៊ុនក្នុងស្រុក។ ក្រុមហ៊ុនក្នុងស្រុកមួយគឺជាមធ្យមជួលបុគ្គលិកតែ៨នាក់ប៉ុណ្ណោះ តែក្រុមហ៊ុនបរទេសអាចជួលបុគ្គលិករហូត១២៤នាក់។ ប៉ុន្តែបញ្ហាប្រឈមវិស័យការងារនៅកម្ពុជាគឺការងារមិនចំជំនាញ ដែលនៅឆ្នាំ២០១៦ ក្រុមហ៊ុននាំចេញ ៣៧,៦ភាគរយ បាននិយាយថា កម្លាំងពលកម្មដែលអប់រំមិនគ្រប់គ្រាន់គឺជាឧបសគ្គចំបងដល់ការធ្វើអាជីវកម្ម។
ដើម្បីដោះស្រាយបញ្ហាប្រឈមទាំងនេះ ធនាគារពិភពលោកបានផ្តល់គន្លឹះជាយុទ្ធសាស្ត្រ៤ចំណុចធំៗរួមមាន៖ ការធ្វើពិពិធកម្មវិស័យនាំចេញ បង្កើតបរិយាកាសធុរកិច្ចក្នុងស្រុក ពង្រឹងការតភ្ជាប់វិស័យការងារក្នុងស្រុក និងការនាំចេញ និងការវិនិយោគលើជំនាញអប់រំដល់កម្មករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ