លោកគង់ មុនីកា៖«គណបក្សឆន្ទៈខ្មែរ ជារូបកាយថ្មី តែព្រលឹង ស្មារតីឆ្នាំ២០១៣ និងឆ្នាំ២០១៧»
ខណៈការបោះឆ្នោតជ្រើសតាំងតំណាងរាស្ត្រនីតិកាលទី៦នៅសល់ប្រមាណជា៣ខែទៀតនោះ កូនប្រុសពៅលោកគង់ គាំ គឺលោកគង់ មុនីកា បានចេញមុខបង្កើតគណបក្សថ្មីមួយគឺ«គណបក្សឆន្ទៈខ្មែរ»។ ការបង្កើតគណបក្សថ្មីគួរឲ្យភា្ញក់ផ្អើលរបស់លោកគង់ មុនីកា ពេលនេះ បានធ្វើឡើងដោយសង្ឃឹមលើសម្លេងគាំទ្រចាស់ និងដោយមានការគាំទ្រយ៉ាងពេញទំហឹងពីលោកគង់ គាំ ជាឳពុក ដែលជាអ្នកនយោបាយជើងចាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
លោកគង់ មុនីកា កូនប្រុសពៅរបស់លោកគង់ គាំ បានប្រកាសថាលោកនិងក្រុមអ្នកនយោបាយប្រជាធិបតេយ្យសេរី ក្រុមបញ្ញវន្ត និងអ្នកស្នេហាជាតិ ស្នេហារបបប្រជាធិបតេយ្យ សេរី ពហុបក្សផ្សេងទៀត បានប្រកាសបង្កើតគណបក្សឆន្ទៈខ្មែរចាប់ពីពេលនេះតទៅ ដើម្បីចូលរួមការបោះឆ្នោតជ្រើសរើសតំណាងរាស្ត្រនីតិកាលទី៦ នៅថ្ងៃទី២៩ខែកក្កដា ខាងមុខ។
ការប្រកាសរបស់លោក គង់ មុនីកា ដែលជាតំណាងឲ្យគណបក្សថ្មីមួយនេះដូច្នេះ គឺដោយសារតែលោកនឹងអ្នកចូលរួមឯទៀត មិនមានសុទិដ្ឋិនិយមថា គណបក្សសង្គ្រោះជាតិ ដែលត្រូវបានរំលាយដោយតុលាការកំពូលកាលពីចុងឆ្នាំ២០១៧កន្លងទៅ អាចជាគណបក្សឈរឈ្មោះនិងដាក់បញ្ជីបេក្ខជនឈរឈ្មោះបោះឆ្នោតនៅឆ្នាំ២០១៨នេះ បាននៅឡើយ។ នេះបើតាមសេចក្តីប្រកាសដែលមានចុះហត្ថលេខាដោយលោកគង់ មុនីកា។
សេចក្តីប្រកាសអមដោយការអំពាវនាវផងនោះ បានយោងមតិសាធារណៈជាតិនិងអន្តរជាតិ ដែលកំណត់ថាស្ថានការណ៍សិទ្ធិមនុស្ស និងប្រជាធិបតេយ្យនៅកម្ពុជាពេលនេះ កំពុងជួបគ្រោះមហន្តរាយធ្ងន់ធ្ងរបំផុត មិនអាចមិនយកចិត្តទុកដាក់ពីមជ្ឈដ្ឋាននានាបានឡើយ។ លើសពីនេះ ចលនានយោបាយថ្មីមួយនេះ ក៏បានបញ្ជាក់ដែរថា គណបក្សឆន្ទៈខ្មែរ គឺជារូបកាយថ្មី តែព្រលឹង ស្មារតីពីឆ្នាំ២០១៣និងឆ្នាំ២០១៧ របស់ប្រជាពលរដ្ឋខ្មែរ ដែលរួមគ្នាជាធ្លុងមួយនៅដដែល និងសង្ឃឹមថាប្រាកដជាដណ្តើមបានជ័យជំនះទៀតផង។
ជាមួយគ្នានេះ លោកគង់ គាំ ជាឳពុកលោកគង់ មុនីកា ដែលជាអ្នកនយោបាយជើងចាស់ មកពីអតីតគណបក្សសង្គ្រោះជាតិ បានសម្តែងនូវការសាទរយ៉ាងពេញទំហឹងចំពោះការបង្កើតគណបក្សថ្មីនេះ។ លោកថា ពេញចិត្តយ៉ាងជ្រាលជ្រៅដែលឃើញគណបក្សមួយចេញពីប្រភពអ្នករងគ្រោះ ខណៈដែលរូបលោកនិងកូនប្រុស២នាក់ផ្សេងទៀតជាតំណាងរាស្ត្រអតីតគណបក្សសង្គ្រោះជាតិត្រូវជាប់បំរាមធ្វើនយោបាយរយៈពេល៥ឆ្នាំ។
ទោះយ៉ាងណា ការយកពាក្យទៅដាក់នៅក្រសួងមហាផ្ទៃ ដើម្បីសុំចុះបញ្ជីគណបក្សនយោបាយថ្មី នៅមិនទាន់ត្រូវបានបញ្ជាក់ច្បាស់លាស់នៅឡើយ។ ក៏ប៉ុន្តែស្ថាបនិកគណបក្សនេះអះអាងថានឹងមិនឲ្យយឺតពេលកំណត់តាមកាលវិភាគរបស់គណៈកម្មាធិការជាតិរៀបចំការបោះឆ្នោត ដោយការចុះបញ្ជីគណបក្សនយោបាយនិងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ នឹងត្រូវធ្វើឡើងចាប់ពីថ្ងៃទី៣០ខែមេសា ឆ្នាំ២០១៨ ដល់ថ្ងៃទី១៤ ខែឧសភា ឆ្នាំ២០១៨ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ