សម្ព័ន្ធសហជីពចលនាកម្មករ ប្រកាសថា សិទ្ធិសេរីភាពសហជីព បាននិងកំពុងដើរថយក្រោយ
សម្ព័ន្ធសហជីពចលនាកម្មករ របស់លោកប៉ាវស៊ីណា បានប្រកាសថានៅចុងឆ្នាំ២០១៤ សិទ្ធិសេរីភាពសហជីព បាន និងកំពុងដើរថយក្រោយ។ ក្នុងនោះ មានថ្នាក់ដឹកនាំ និងសកម្មជនសហជីពចលនាកម្មករ ៦៥ នាក់ ត្រូវបានក្រុមហ៊ុនថៅកែរោងចក្រកាត់ដេរ បញ្ឈប់ពីការងារ ហើយថ្នាក់ដឹកនាំ និងមន្ត្រីសហជីពចលនាកម្មករ ២២ នាក់ បានជាប់បណ្តឹងព្រហ្មទណ្ឌ នៅតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅចុងឆ្នាំ២០១៤ យ៉ាងហោចណាស់ មានថ្នាក់ដឹកនាំ និងសកម្មជនសហជីពចលនាកម្មករ ៦៥ នាក់ ត្រូវបានក្រុមហ៊ុន បញ្ឈប់ពីការងារ ដោយមិនបានអនុវត្តតាមនីតិវិធីនៃច្បាប់ការងារ និងអនុសញ្ញាអន្តរជាតិខាងការងារ ILO។ នេះបើតាមសេចក្តីថ្លែងការណ៍។
សេចក្តីថ្លែងការណ៍ ស្តីពី សិទ្ធិសេរីភាពសហជីព និងសិទ្ធិធ្វើកូដកម្ម របស់សម្ព័ន្ធសហជីពចលនាកម្មករ បង្ហាញថា ថ្នាក់ដឹកនាំ និងមន្ត្រីសហជីពចលនាកម្មករ តែងតែទទួលរងនូវការគំរាមកំហែងពីសំណាក់ក្រុមអាជ្ញាធរ ក្រុមបងធំ នៅពេលដែលក្រុមការងារសហជីពចលនាកម្មករ ចុះទៅបំពេញភារកិច្ចក្នុងកំឡុងពេលមានកូដកម្មកើតឡើង។
ជាងនេះទៅទៀត សេចក្តីថ្លែងការណ៍បង្ហាញថា ថ្នាក់ដឹកនាំ និងមន្ត្រីសម្ព័ន្ធសហជីពចលនាកម្មករ ២២ នាក់ នៅឆ្នាំ២០១៤ ត្រូវបានអាជ្ញាធរប្តឹងទៅតុលាការ ធ្វើការចោទប្រកាន់ពីបទញុះញង់ឲ្យកម្មករនិយោជិត ប្រព្រឹត្តបទឧក្រិដ្ឋញុះញង់ឲ្យធ្វើកូដកម្មខុសច្បាប់ និងបិទផ្លូវសាធារណៈ ហើយត្រូវបានតុលាការ ចេញដីកាសម្រេចដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ ជាពិសេស ហាមមិនឲ្យចូលរួម និងដឹកនាំធ្វើកូដកម្មតវ៉ាជាមួយកម្មករនិយោជិតនោះឡើយ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានថ្លែងក្នុងសន្និសីទកាសែត នៅព្រឹកថ្ងៃទី២៧មករាថា សិទ្ធិនៃការធ្វើកូដកម្មដោយអហឹង្សារបស់កម្មករវិញ ក៏ត្រូវបានហាមឃាត់ដោយប្រព័ន្ធតុលាការ តាមពាក្យបណ្តឹងរបស់ភាគីនិយោជក ឲ្យកម្មករបញ្ឈប់នូវរាល់សកម្មភាពកូដកម្មជាបន្ទាន់ ក្នុងករណីមិនអនុវត្តតាមដីកាសម្រេចរបស់តុលាការទេ នោះកម្មករនឹងប្រឈមការបណ្តេញចេញពីការងារ ហើយថ្នាក់ដឹកនាំ និងសកម្មជនសហជីពប្រចាំមូលដ្ឋាន ត្រូវបានតុលាការហាមឃាត់មិនឲ្យចូលធ្វើការ និងចោទប្រកាន់ពីបទព្រហ្មទណ្ឌទៀតផង។
សម្ព័ន្ធសហជីពចលនាកម្មករ បានអំពាវនាវដល់រដ្ឋាភិបាល អន្តរាគមន៍ឲ្យនិយោជក ទទួលយកថ្នាក់ដឹកនាំ និងសកម្មជនសហជីព ដែលក្រុមហ៊ុនបានបញ្ឈប់ដោយអយុត្តិធម៌ឲ្យបានចូលធ្វើការដូចធម្មតាវិញ។ រដ្ឋាភិបាលត្រូវធានាឲ្យមានការគោរពសិទ្ធិសហជីពឲ្យបានពេញលេញ និងសូមឲ្យក្រសួងយុត្តិធម៌ ត្រួតពិនិត្យឡើងវិញ ចំពោះប្រព័ន្ធតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ