សុវត្ថិភាពកម្មករកាត់ដេរប្រឈមនឹងហានិភ័យ ខណៈរដ្ឋអះអាងពីការយកចិត្តទុកដាក់បន្ទាប់ពីគ្រោះថ្នាក់
ចុះផ្សាយនៅថ្ងៃ៖
ស្តាប់ - ០៤:២៦
ការផ្ទុះឡដុតអុសយកចំហាយ នៅក្នុងរោងចក្រកាត់ដេរមួយក្នុងទីក្រុងភ្នំពេញ គឺជាមេរៀនមួយ ដែលរោងចក្រកាត់ដេរ និងស្ថាប័នមានសមត្ថកិច្ចគួរមានការចាប់អារម្មណ៍ ខណៈដែលបញ្ហានេះ ត្រូវគេសង្ស័យថាបណ្តាលមកពីការធ្វេសប្រហែស និងខ្វះអធិការកិច្ចត្រឹមត្រូវ។ តាមរយៈឧបទ្ទវហេតុនេះ រួមទាំងគ្រោះថ្នាក់ចរាចរណ៍រថយន្តដឹកកម្មករ និងកម្មករសន្លប់ជាបន្តបន្ទាប់នៅតាមរោងចក្រ បង្ហាញថាសុវត្ថិភាពកម្មករនៅក្នុងវិស័យកាត់ដេរនៅមិនទាន់មានទំនុកចិត្តនៅឡើយ។
កម្មការិនីម្នាក់បានស្លាប់ភ្លាមៗ និង ៧នាក់ផ្សេងទៀតរងរបួស ដោយសារការផ្ទុះឡដុតអុស យក ចំហាយកាលពីថ្ងៃពុធ នៅក្នុងរោងចក្រកាត់ដេរមួយឈ្មោះ សិនតៃហ្គាមិន ស្ថិតនៅក្នុងខណ្ឌសែនសុខ រាជធានីភ្នំពេញ។ ការផ្ទុះដ៏កក្រើកនេះបានកំទេចអគារមួយផ្នែក និងសម្ភារៈនៅក្បែរនោះ ឲ្យមានការខូចខាតផងដែរ។
ពិតណាស់វាជាករណីថ្មីមួយដែលមិនធ្លាប់មាន នៅក្នុងវិស័យកាត់ដេរ ក៏ប៉ុន្តែបញ្ហានេះ ជាផ្នែកមួយទាក់ទងទៅនឹងសុវត្ថិភាពរបស់កម្មករ និង និយោជិក នៅក្នុងវិស័យកាត់ដេរផងដែរ ក្រៅពីគ្រោះថ្នាក់ការងារផ្សេងៗទៀត។ ជាទូទៅបើនិយាយពីសុវត្ថិភាពការងាររបស់កម្មករនៅក្នុងវិស័យកាត់ដេរ គេតែងតែមានការលើកឡើងពីសុវត្ថិភាពក្នុងការធ្វើដំណើររបស់កម្មករ ដែលជាញឹកញាប់ បានជួបប្រទះនឹងគ្រោះថ្នាក់ចរាចរកើតឡើង។ បញ្ហាគ្រោះថ្នាក់ចរាចរណ៍ ដែលបង្កឡើងដោយ រថយន្តដឹកកម្មករនៅមិនទាន់មានការដោះស្រាយនៅឡើយ។
បញ្ហាកម្មករសន្លប់នៅតែបន្តកើតមាន ដែលការសន្លប់នេះ ក្រៅពីការបរិភោគមិនគ្រប់គ្រាន់របស់កម្មករ ក៏មានបច្ច័យបន្ទាប់បន្សំជាមួយគ្នាផងដែរ ដូចជាបរិយាកាសនៅក្នុងរោងចក្រមួយចំនួននៅមានសភាពក្តៅ លាយឡំដោយជាតិគីមីចេញពីក្រណាត់ ធូលី និងមិនមាន អុកស៊ីសែន គ្រប់គ្រាន់។
តាមរយៈឧបទ្ទវហេតុនៃការផ្ទុះឡចំហាយនេះ បង្ហាញថាសុវត្ថិភាពនៅកន្លែងធ្វើការ របស់ កម្មករនៅតែមានការប្រឈមនៅឡើយ។ ក្រុមសហជីពការពារសិទ្ធិកម្មករ និងអ្នកពាក់ព័ន្ធនានា បានធ្វើការរិះគន់ភា្លមៗដែរ បន្ទាប់ពីការផ្ទុះដែលមិនដែលកើតមានសម្រាប់រោងចក្រកាត់ដេរដូចពេលនេះ។ ជុំវិញបញ្ហាផ្ទុះឡចំហាយទឹក សម្រាប់អ៊ុតខោអាវនេះ ត្រូវបានកត់សម្គាល់ថា វាទាក់ទងទៅនឹងការធ្វេសប្រហែសផ្នែកបច្ចេកទេស ការមិនយកចិត្តទុកដាក់ ចាប់អារម្មណ៍ចំពោះអ្វីមួយដែលគេយល់ថា អាចនឹងកើតមានគ្រោះថ្នាក់នៅថ្ងៃខាងមុខ។
មួយវិញទៀត បញ្ហានេះ ក៏ទាក់ទងដែរទៅនឹង ការងារអធិការកិច្ចរបស់សមត្ថកិច្ច បន្ទាប់ពីមានការផ្ទុះដ៏កក្រើកនឹងសម្លាប់មនុស្សនេះ ឡើងក៏មានការវាយតម្លៃដំណាលគ្នាដែរថា បញ្ហាអធិការកិច្ចការងារនៅតាមរោងចក្រនៅមានសភាពអន់ខ្សោយនៅឡើយ។ កង្វះខាតនេះ រងការចោទសួរថា អាចមកពីអធិការកិច្ចរបស់សមត្ថកិច្ចមិនបានដឹងជាមុនមែន ឬអធិការកិច្ចមានកំរិត ដោយរោងចក្រមានខ្នងបង្អែកធំ ឬមួយក្រុមអធិការកិច្ចរបស់សមត្ថកិច្ចមានអត្ថប្រយោជន៍ផ្ទាល់ខ្លួន?
ទោះយ៉ាងណា ក្រសួងការងារកម្ពុជា ភា្លមៗដែរក៏បានបង្ហាញនូវការយកចិត្តទុកដាក់ ធ្វើអន្តរាគមន៍ ដល់ជនរងគ្រោះនៃឧបទ្ទវហេតុនេះ តាមរយៈមន្ត្រីបេឡាជាតិរបបសន្តិសុខសង្គមរបស់ខ្លួន។ ក្រសួងការងារដែលបានចេញសារចូលរួមរំលែកទុក្ខកម្មការិនី បាត់បង់ជីវិតនិងរបួសនោះ បានបញ្ជាក់ថានឹងទទួលរ៉ាប់រង ដល់ការធ្វើបុណ្យសព និងផ្តល់សំណងតាវកាលិកដល់ក្រុមគ្រួសារ អ្នកស្លាប់ និងអ្នករបួសផងដែរ។
ដូច្នេះការផ្ទុះឡដុតអុសយកចំហាយនៅរោងចក្រសិនតៃហ្គាមេន វាជាករណីដំបូងមែនពិត ក៏ប៉ុន្តែវាជាមេរៀនមួយ សម្រាប់និយោជក ក៏ដូចជាអាជ្ញាធរមានសមត្ថកិច្ច ក្នុងការចាប់អារម្មណ៍ លើចំណុចដែលមិនគួរមានការធ្វេសប្រហែស លើករណីប្រឈមជាច្រើនទៀត ដែលមិនទាន់កើតមាន ហើយអាចនឹងកើតមាន។ នោះគឺសម្ភារៈ ចាស់ៗ ដែលប្រើប្រាស់យូរឆ្នាំនៅក្នុងរោងចក្រ និងមានការសង្ស័យទៅលើគុណភាព។ ការប្រើប្រាស់សម្ភារៈដែលប្រើហើយពីកន្លែងផ្សេង។
សម្ភារៈដែលប្រកបដោយគ្រោះថ្នាក់ ឬងាយនឹងគ្រោះថ្នាក់ប្រសិនមានការធ្វេសប្រហែសដូចជាឡចំហាយនេះជាដើម គួរតែមានអ្នកមើលការខុសត្រូវ ហើយគួរដាក់សម្ភារៈទាំងនេះ ឲ្យនៅឆ្ងាយពីកម្មករ ដើម្បីចៀសវាងហានិភ័យណាមួយកើតឡើង។ ការត្រួតពិនិត្យរបស់ស្ថាប័នមានសមត្ថកិច្ច ត្រូវតែធ្វើដោយយកចិត្តទុកដាក់ ទៀងទាត់ និងដោយតម្លាភាព។
មួយវិញទៀត ករណីនេះ គេគួរតែមានវិធានការការពារជាមុន ជាជាងរង់ចាំឲ្យមានគ្រោះថ្នាក់ណាមួយកើតឡើង។ ជាមួយគ្នានេះ អ្នកដែលទទួលខុសត្រូវមុនដំបូងគេគឺថៅកែរោងចក្រកាត់ដេរ។ ការធ្វេសប្រហែសរបស់រោងចក្រ លើបញ្ហាណាមួយដែលចាត់ទុកថានឹងអាចមានហានិភ័យ ទៅលើកម្មករ និយោជិក គឺជាការទទួលខុសត្រូវដ៏ចំបងរបស់និយោជកដោយផ្ទាល់។
បើពុំដូច្នោះទេ ការមិនយកចិត្តទុកដាក់ និងការថ្លោះធ្លោយនៅតែកើតមាន ហើយអ្នករងគ្រោះគឺកម្មករ និយោជិក ដែលធ្វើការដើម្បីផលប្រយោជន៍ដ៏ធំធេងរបស់ថៅកែរោងចក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ