កម្មករផ្ទុះបាតុកម្មទាមទារប្រាក់សំណងខណៈថៅកែរត់ចោលរោងចក្រ
ក្រុមការងារ ក្រសួងការងារ និងសហជីពពាក់ព័ន្ធ បានបញ្ចប់កិច្ចពិភាក្សាស្វែងរកដំណោះស្រាយករណីថៅកែរោងចក្រ ៣កន្លែង ស្ថិតនៅក្នុងខណ្ឌពោធិ៍សែនជ័យ គេចវេស មិនបើកប្រាក់ខែឲ្យកម្មករ។ ជំនួបនេះធ្វើឡើងបន្ទាប់ពីកម្មករប្រមាណជា៧០០នាក់ ចុះផ្លូវធ្វើកូដកម្មដើម្បីរកដំណោះស្រាយចាប់តាំងពី ថ្ងៃពុធម្សិលមិញមកទល់ពេលថ្ងៃនេះ។
ចុះផ្សាយនៅថ្ងៃ៖
ស្តាប់ - ០២:១៩
លោក លី សុធា អគ្គលេខាធិការរងនៃគណៈកម្មាការដោះស្រាយបាតុកម្ម កូដកម្ម គ្រប់មុខសញ្ញា បានថ្លែងប្រាប់វិទ្យុបារាំងអន្តរជាតិថាជំនួបនៅព្រឹកមិញនេះ នៅមិនទាន់មានលទ្ធផលបែបនៅឡើយទេ ក្រោយជំនួបបានបិទបញ្ចប់ ។ តែទោះជាបែបណាក៏ដោយជំនួបនឹងចាប់ផ្ដើមម្ដងទៀតនៅថ្ងៃចន្ទខាងមុខ ដើម្បីទុកពេលឲ្យថៅកែរោងចក្រចូលខ្លួនមកដោះស្រាយ។ ជានីតិវិធី ក្នុងករណីដែលថៅកែរោងចក្រនៅតែមិនចូលខ្លួនមកដោះស្រាយទៀតក្រសួងការងារ នឹងដាក់ពាក្យប្ដឹងទៅតុលាការដើម្បីសុំលក់សម្ភារៈក្នុងរោងចក្រដើម្បីលក់យកលុយមកឲ្យកម្មករទៅតាមលទ្ធភាពជាក់ស្ដែង។
ចំណែក លោក ប៉ាវ ស៊ីណា ប្រធានសហភាពចលនាកម្មករកម្ពុជា ថ្លែងប្រាប់វិទ្យុបារាំងអន្តរជាតិRFI នៅថ្ងៃនេះថា ប្រសិនបើគេមិនប្រញាប់រកដំណោះស្រាយជូនកម្មករទេ ពួកគេនឹងប្រឈមដោយការបណ្ដេញចេញពីម្ចាស់ផ្ទះជួល ព្រោះគ្មានប្រាក់បង់ថ្លៃផ្ទះប្រចាំខែ។
ក្រៅពីផ្ទះជួល ពួកគេនៅប្រឈមតម្លៃអគ្គិសនី និងទឹកទៀតផង។ គិតមកដល់ម៉ោងនេះកម្មករ កម្មាការិនី នៅរក្សាភាពស្ងៀមស្ងាត់សិន ។ តែភាពស្ងៀមស្ងាត់ទំនងជារក្សាមិនបានយូរទេ ប្រសិនបើដំណោះស្រាយសម្រាប់ពួកគេនៅតែមិនមាននោះ ។ នេះបើតាមការបញ្ជាក់របស់លោក ប៉ា ស៊ីណា។
សូមបញ្ជាក់ថា រោងចក្រកាត់ដេរសម្លៀកបំពាក់៣កន្លែង ដែលថៅកែបានរត់គេចខ្លួនមិនបើកប្រាក់ខែជូនកម្មករ កម្មាការិនីនោះមានឈ្មោះថា យ៉ូដាហ្គាមិន អ៊ីហ្វាហ្គាមិន
អេស អ អ៊ី ហ្គាមេន ស្ថិតនៅម្ដុំព្រៃទា ក្នុងខណ្ឌពោធិសែនជ័យ ដែលមានកម្មករកំពុងធ្វើការនៅទីនោះប្រមាណជា១៥០០នាក់។ បើតាមការឲ្យដឹងពីសហជីព រោងចក្រ៣កន្លែងដែលថៅកែរត់គេចខ្លួននេះស្ថិតនៅក្នុងចំណោមរោងចក្រ៤ផ្សេងទៀត ក្នុងខណ្ឌពោធិ៍សែនជ័យ ដែលទីតាំងនេះទើបតែត្រូវបានលោកនាយករដ្ឋមន្ត្រី ហ៊ុន សែន ចុះទៅជួបសំណេះសំណាលជាមួយកម្មករកាលពីថ្ងៃពុធម្សិលមិញ។
ជាការកត់សម្គាល់ កាលដែលថៅកែរត់គេចខ្លួនមិនបើកប្រាក់ខែជូនកម្មករនៅពេលនេះធ្វើឡើងស្របពេល កម្មកររោងចក្រក្នុងវិស័យកាត់ដេរ ពួកគេទទួលបានប្រាក់ខែគោល១៧០ដុល្លារ សម្រាប់ខែដំបូងក្នុងឆ្នាំ២០១៨នេះ។ ដោយឡែក បើយោងតាមរបាយការណ៍ប្រចាំឆ្នាំ របស់សហជីពបង្ហាញថា ចាប់តាំងពីខែមករា ដល់ខែធ្នូក្នុងឆ្នាំ២០១៧ រោងចក្រចំនួន៤បានបិទទ្វារ ។ ហើយបានប៉ះពាល់ដល់កម្មករ២៥៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ