រដ្ឋាភិបាលកម្ពុជាអនុម័តលើសេចក្តីព្រាងច្បាប់ថ្មីស្តីពីសញ្ជាតិ
កិច្ចប្រជុំគណៈរដ្ឋមន្រ្តីនៅថ្ងៃសុក្រនេះ បានពិភាក្សា និងអនុម័តលើ “សេចក្តីព្រាងច្បាប់ថ្មីស្តីពីសញ្ជាតិ ខណៈច្បាប់ចាស់ដែលកំពុងប្រើនោះមានអាយុកាល២២ឆ្នាំហើយ។ បើតាមរដ្ឋាភិបាល សេចក្តីព្រាងច្បាប់ថ្មីនេះតាក់តែងឡើងដោយឈរលើមូលដ្ឋានបីគឺ ទីមួយរក្សាទុកនូវបទប្បញ្ញតិទំាងឡាយនៃច្បាប់ចាស់ ដែលមានលក្ខណៈសមស្របក្នុងការអនុវត្ត ទីពីរកែសម្រួល ឬលុបចោលនូវបទបញ្ញត្តិទំាងឡាយ ដែលមិនអាចអនុវត្តបាន និងទីបីបន្ថែមបទបញ្ញត្តិថ្មី ឲ្យស្របតាមការវិវត្តផ្នែកសេដ្ឋកិច្ច និងសង្គមកម្ពុជាបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:១៣
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានសរសេរបញ្ជាក់នៅលើហ្វេសប៊ុករបស់លោកថា សេចក្តីព្រាងច្បាប់ស្តីពីសញ្ជាតិនេះ ធ្វើឡើងដើម្បីពង្រឹងការគ្រប់គ្រងកិច្ចការសញ្ជាតិឲ្យកាន់តែមានប្រសិទ្ធភាព សំដៅធានានូវសិទ្ធិរបស់ប្រជាពលរដ្ឋ ការពារសន្តិសុខ និងផលប្រយោជន៍របស់ជាតិ។ លើសពីនេះទៀត សេចក្តីព្រាងច្បាប់ថ្មីនេះ ក៏មានគោលបំណងធានាការអនុវត្តដែនយុត្តាធិការរបស់កម្ពុជា ទៅលើរូបវន្តបុគ្គល ដើម្បីកំណត់នូវសិទ្ធិទទួលបាន និងសិទ្ធិលះបង់សញ្ជាតិខ្មែរ ចំពោះជនដែលរស់នៅលើទឹកដីកម្ពុជា ឬនៅបរទេស និងដែលបានបំពេញតាមលក្ខខណ្ឌនៃច្បាប់នេះ។
ក្រៅពីនេះទៀត ច្បាប់សញ្ជាតិថ្មីនេះ មានគោលដៅកំណត់អំពី៖ ការទទួលបានសញ្ជាតិខ្មែរពីកំណើត ការទទួលបានសញ្ជាតិខ្មែរដោយការស្មុំកូនពេញលេញ ការទទួលបានសញ្ជាតិខ្មែរដោយអាពាហ៍ពិពាហ៍ ការទទួលបានសញ្ជាតិខ្មែរដោយសញ្ជាតូបនីយកម្ម និងការបាត់សញ្ជាតិខ្មែរ។ នេះបើតាមលោក ផៃ ស៊ីផាន។
លោកមេធាវី សុខ សំអឿន នៃការិយាល័យមេធាវីអម្រិន្ទ យល់ថាច្បាប់សញ្ជាតិចាស់មិនបានចែងលម្អិតឬនិយាយបានថា មានលក្ខណៈទូលាយពេកក្នុងការទទួលបានសញ្ជាតិខ្មែរ។ ទូលាយពេកត្រង់ថាច្បាប់ចាស់មិនបានកំណត់ឲ្យជនបរទេស ត្រូវតែចេះអក្សរខ្មែរកំរិតណា យល់ដឹងពីប្រវត្តិសាស្ត្រខ្មែរបានកំរិតណា ទើបអាចសុំចូលសញ្ជាតិខ្មែរបាននោះទេ ដោយទុកសិទ្ធិឲ្យក្រសួងមហាផ្ទៃជាអ្នកសម្រេច។ នេះជាការលើកឡើងរបស់មេធាវីជើងចាស់រូបនេះ។
សូមបញ្ជាក់ថា ច្បាប់សញ្ជាតិចាស់ត្រូវបានអនុម័ត និងប្រកាសឲ្យប្រើតាំងពីខែតុលាឆ្នាំ១៩៩៦ ដែល២៣មាត្រា ពោលមានរយៈពេលជិត២២ឆ្នំាហើយ។
មាត្រា៨នៃច្បាប់ចាស់នោះ បានកំណត់ថា ជនបរទេសអាចសុំចូលសញ្ជាតិខ្មែរបានគឺត្រូវរស់នៅកម្ពុជា៧ឆ្នាំដោយមានលិខិតបញ្ជាក់ពីអាជ្ញាធរខ្មែរ ចេះនិយាយភាសាខ្មែរ ចេះអក្សរខ្មែរ និងដឹងពីប្រវត្តិសាស្ត្រខ្មែរខ្លះៗប៉ុណ្ណោះ។ ប៉ុន្តែមាត្រា១២ចែងថា ជនបរទេសដែលធ្វើអំណោយថវិកាចំនួនមួយពាន់លានរៀលឬ២៥ម៉ឺនដុល្លារ សម្រាប់ប្រយោជន៍សង្គម គឺអាចសុំចូលសញ្ជាតិខ្មែរបានដែរ ដោយត្រូវភ្ជាប់នឹងលក្ខខណ្ឌមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ