រដ្ឋាភិបាលផ្សាយពីការទប់ស្កាត់ចលនាបដិវត្តន៍ពណ៌តាមរយៈសៀវភៅ៧ម៉ឺនក្បាល
អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី អះអាងថា សៀវភៅ«ស» ចំនួន៧ម៉ឺនក្បាល ត្រូវបោះពុម្ពដើម្បីធ្វើការផ្សព្វផ្សាយជាសាធារណៈ ប្រកាសពីការទប់ស្កាត់ចលនា បដិវត្តន៍ពណ៌ ក្រោយពីរំលាយគណបក្សប្រឆាំងដ៏ធំជាងគេនៅកម្ពុជា។ ប៉ុន្តែអ្នកវិភាគយល់ថា ប្រជាពលរដ្ឋបច្ចុប្បន្នមិនសូវចូលចិត្តអានសៀវភៅប្រភេទនេះទេ ហើយថាអ្វីដែលរដ្ឋាភិបាលព្យាយាមបកស្រាយពីវិធានការរបស់ខ្លួនដែលរំលាយគណបក្សប្រឆាំងនោះ គឺដើម្បីទប់ទល់នឹងអ្នកគាំទ្របក្សសង្រ្គោះជាតិជាង៣លាននាក់ និងសហគមន៍អន្តរជាតិដែលបន្តរិះគន់។
ចុះផ្សាយនៅថ្ងៃ៖
ស្តាប់ - ០២:២៦
អត្ថបទដោយ៖ អ៊ឹង ប៊ុនថន
នៅក្នុងសៀវភៅ«ស»កម្រាស់១២២ទំព័រ ស្តីពីស្ថានការណ៍នយោបាយនៅកម្ពុជានោះ រដ្ឋាភិបាល បានព្យាយាមការពារចំណាត់ការរបស់ខ្លួន ទៅលើគណបក្សប្រឆាំង អង្គការស៊ីវិលនិងស្ថាប័នសារព័ត៌មានមួយចំនួនកន្លងមកនោះថាជា«ការពង្រឹងនីតិរដ្ឋ និងដំណើរការលទ្ធិប្រជាធិបតេយ្យ»នៅកម្ពុជា។
សៀវភៅដដែលនេះ ក៏បានអះអាងថា ពីជោគជ័យរបស់រដ្ឋាភិបាលកម្ពុជា ក្នុងការទប់ស្កាត់ចលនាបដិវត្តន៍ពណ៌ តាមរយៈការរំលាយអង្គការចាត់តាំងនយោបាយ ដោយវិធានការច្បាប់ ពោលគឺការចាប់ខ្លួន លោក កឹម សុខា និងរំលាយគណបក្សសង្រ្គោះជាតិ។ លើសពីនេះទៀត សៀវភៅក៏បានកត់ត្រាផងដែរ ឈ្មោះអង្គការសង្គមស៊ីវិល រួមមាន NDI អាដហុក លីកាដូ ខុមហ្រ្វែល CISA និងPDP ជាដើម គឺសុទ្ធសឹងតែត្រូវបានរដ្ឋាភិបាលចោទថាជាអ្នកមានទំនាក់ទំនងប្រទាក់ក្រឡាគ្នាជាមួយគណបក្សប្រឆាំង។ ចំណែក ការបិទកាសែត The Cambodia Daily វិទ្យុអាស៊ីសេរី និងVOA ត្រូវបានរដ្ឋាភិបាល បកស្រាយថា មកពីស្ថាប័នដែលតែងតែរិះគន់រដ្ឋាភិបាលទាំងនេះមិនគោរពច្បាប់របស់កម្ពុជា។
រាល់ចំណាត់ការទាំងប៉ុន្មានពីសំណាក់រដ្ឋាភិបាលកម្ពុជាទៅលើគូរប្រជែង និងអ្នករិះគន់នោះ ត្រូវបានពន្យល់បកស្រាយនៅក្នុងសៀវភៅសថា «គឺជាការធ្វើឡើងដើម្បីធានានូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គម និងការអភិវឌ្ឍ»។ ក្រៅពីនេះ ក៏មានការរំលេចផងដែរនូវការទទួលខុសត្រូវរបស់រាជរដ្ឋាភិបាល ក្នុងការប្តេជ្ញាចិត្តបន្តដឹកនាំប្រទេសជាតិស្របតាមរដ្ឋធម្មនុញ្ញ ដោយគោរពតាមគោលការណ៍នីតិរដ្ឋ លទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស។
ក៏ប៉ុន្តែលោក បណ្ឌិត មាស នី អ្នកវិភាគពីបញ្ហាសង្គម យល់ថាប្រជាពលរដ្ឋខ្មែរបច្ចុប្បន្នមិនសូវចូលចិត្តអានសៀវភៅប្រភេទនេះទេ ហើយថាអ្វីដែលរដ្ឋាភិបាលព្យាយាមបកស្រាយពីវិធានការរបស់ខ្លួនដែលរំលាយគណបក្សប្រឆាំងនោះ គឺដើម្បីទប់ទល់នឹងអ្នកគាំទ្របក្សសង្រ្គោះជាតិជាង៣លាននាក់ និងសហគមន៍អន្តរជាតិដែលបន្តរិះគន់។
បើតាម លោក មាស នី យុទ្ធសាស្ត្ររបស់រដ្ឋាភិបាលបែបនេះ គឺចំណាយលុយច្រើន តែមិនសូវមានប្រសិទ្ធិភាពនោះទេ ព្រោះប្រជាពលរដ្ឋមានការយល់ដឹងច្រើនពីបញ្ហានយោបាយបច្ចុប្បន្ន។
សូមបញ្ជាក់ថា ការចេញសៀវភៅ«ស»របស់អង្គភាពព័ត៌មាន និងប្រតិកម្មរហ័សនេះ គឺធ្វើឡើងក្រោយអង្គភាពដដែលនេះ បានចេញវីដេអូ ស្តីពី ចលនាបដិវត្តន៍ក្នុងន័យដូចគ្នានេះដែរ កាលពីមុនថ្ងៃ៧មករាឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ