រដ្ឋាភិបាល និង សហជីពប្រារព្ធពិធីអបអរសាទរទិវាពលកម្មអន្តរជាតិ១ឧសភា ផ្សេងគ្នា
ថ្ងៃសុក្រទី០១ ឧសភានេះ គឺជាទិវាពលកម្មអន្តរជាតិ១ឧសភា។ ដូចការគ្រោងទុក ក្រសួងការងារ និងបណ្តុះបណ្តាលវិជ្ជាជីវៈបានរៀបចំកម្មវិធីជួបជុំអបអរសាទរខួបអនុស្សាវរីយ៍ លើកទី១២៩ទិវាពលកម្មអន្តរជាតិ ១ឧសភានេះ នៅទីស្តីការក្រសួង។ ចំណែកសហជីពកម្មករវិញ ក៏បានរៀបចំកម្មវិធីជួបជុំគ្នាដែរ ដោយខ្លះធ្វើនៅលើទីលានប្រជាធិបតេយ្យ និង ខ្លះទៀតធ្វើនៅពីមុខរដ្ឋសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
តាំងពីព្រឹកព្រលឹម កម្មករ កម្មការិនីជាច្រើនរយនាក់ដែលដឹកនាំដោយសហភាពការងារកម្ពុជា បានដង្ហែរក្បួន និងជួបជុំគ្នានៅពីមុខរដ្ឋសភាជាតិ ដើម្បីស្រែកទាមទារ និងសំណូមពរពីបញ្ហាការងារមួយចំនួនដល់រដ្ឋសភា។ ក្រុមកម្មករទាំងនោះ បានស្រែកទាមទារឲ្យរដ្ឋាភិបាល និងរដ្ឋសភាជាតិជំរុញនិយោជិតធ្វើការចរចាឡើងវិញ ដើម្បីដម្លើងប្រាក់ឈ្នួលអប្បបរមា១៧៧ដុល្លារអាមេរិកក្នុងមួយខែជូនកម្មករនិយោជិត វិស័យកាត់ដេរ និងដេរស្បែកជើង។ ក្រុមកម្មករ ក៏បានទាមទារឲ្យរដ្ឋាភិបាលកំណត់ប្រាក់ឈ្នួលអប្បបរមាសម្រាប់កម្មករនិយោជិតក្នុងវិស័យផ្សេងៗ និង ទាមទារលក្ខខណ្ឌការងារមួយចំនួនទៀតផងដែរ។ ជាមួយនឹងការស្រែកទាមទារនេះ ក្រុមកម្មករ ក៏បានដាក់ញត្តិទៅរដ្ឋសភាថែមទៀត។
ក្រៅពីការជួបជុំដែលដឹកនាំដោយលោកអត់ ធន់ ប្រធានសហភាពការងារកម្ពុជានេះ ក៏បានមានសហជីពផ្សេងទៀតបានរៀបចំការជួបជុំដូចគ្នានេះដែរ។ លោកប៉ាវ ស៊ីណា ប្រធានសម្ព័ន្ធសហជីពចលនាកម្មករនៅថ្ងៃសុក្រនេះ បានដឹកនាំកម្មករ កម្មការិនីជាច្រើននាក់ជួបជុំប្រារព្ធពិធីអបអរសាទរទិវាពលកម្មអន្តរជាតិ ថ្ងៃ១ឧសភា នៅទីលានប្រជាធិបតេយ្យ។ ក៏មិនខុសគ្នាដែរ សហជីពសុទ្ធតែបានទាមទារឲ្យរដ្ឋាភិបាលបន្តគិតគូរពីការដម្លើងប្រាក់ឈ្នួលដល់កម្មករ កម្មការិនី។ ចំណែកលោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានដឹកនាំកម្មករ អ្នករត់ម៉ូតូឌុប និងយុវជនជួបជុំនៅពហុកីឡដ្ឋានជាតិអូឡាំពិក និង បានបន្តហែរក្បូនដាក់ញត្តិក្រសួងការងារ ដើម្បីទាមទារលក្ខខណ្ឌការងារផ្សេងៗ។
ដោយឡែក រដ្ឋាភិបាលកម្ពុជាវិញ ចំពោះថ្ងៃពិសេសនេះ ក៏មិនបាននៅស្ងៀមនោះដែរ។ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំពិធីជួបជុំជាមួយតំណាងក្រសួង-ស្ថាប័នរដ្ឋពាក់ព័ន្ធអង្គការវិជ្ជាជីវៈកម្មករនិយោជិត និយោជក អង្គការអន្តរជាតិខាងការងារ ( ILO ) និងអង្គការសង្គមស៊ីវិល។ នៅក្នុងពិធីជួបជុំនេះ ក្រសួងការងារ បានបើកទូលាយឲ្យអ្នកដែលចូលរួមបង្ហាញពីបញ្ហាកង្វល់ និង សំណូមពរផ្សេងៗដល់រដ្ឋមន្ត្រីក្រសួង ដើម្បីឆ្លើយបំភ្លឺ និងដោះស្រាយជូន។ បន្ថែមលើនេះ ក្រសួងក៏បានរៀបចំឲ្យមានវេទិកាប្រឡងជ្រើសរើសកម្មការិនីសម្រស់ឯកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ