រដ្ឋាភិបាលហាមលក់ដូរនិងពិសារគ្រឿងស្រវឹងក្នុងថ្ងៃស និងថ្ងៃបោះឆ្នោត
ការលក់ដូរនិងពិសារគ្រឿងស្រវឹងក្នុងថ្ងៃស និងថ្ងៃបោះឆ្នោត មិនត្រូវបានអនុញ្ញាតទេ។ រដ្ឋាភិបាលកម្ពុជាបានណែនាំយ៉ាងដូច្នេះ ដើម្បីឲ្យការបោះឆ្នោតប្រព្រឹត្តឡើងក្នុងបរិយាកាសល្អ សេរី ត្រឹមត្រូវ យុត្តិធម៌ និងគ្មានអំពើហិង្សា។ នេះបើតាមសេចក្ដីណែនាំរបស់រដ្ឋាភិបាលកម្ពុជា ចុះថ្ងៃទី០៦កក្កដា។
ចុះផ្សាយនៅថ្ងៃ៖
ស្តាប់ - ០១:៥៨
ជាង២០ថ្ងៃមុនការបោះឆ្នោតជាតិ ពោលគឺនៅថ្ងៃទី០៦កក្កដា លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋខ្មែរ និងជនបរទេសដែលរស់នៅកម្ពុជា មិនឲ្យពិសារគ្រឿងស្រវឹងនៅថ្ងៃស និងថ្ងៃបោះឆ្នោត។ ពោលគឺថ្ងៃទី២៨ ដល់ថ្ងៃទី២៩ ខែកក្កដា។ ព្រមពេលជាមួយគ្នា ប្រមុខរាជរដ្ឋាភិបាលកម្ពុជាបានអំពាវនាវនៅក្នុងសេចក្តីណែនាំរបស់ខ្លួន ទៅដល់អ្នកលក់ដូរគ្រឿងស្រវឹងទាំងឡាយ ត្រូវផ្អាកសកម្មភាពរបស់ខ្លួននៅថ្ងៃនោះផងដែរ។
លោកនាយករដ្ឋមន្ត្រី ហ៊ុន សែន បានបញ្ជាក់ថា សេចក្តីណែនាំសុំផ្អាកលក់ និងពិសារគ្រឿងស្រវឹងនៅថ្ងៃមុនបោះឆ្នោត និងថ្ងៃបោះឆ្នោតនោះ គឺធ្វើឡើងដើម្បីទប់ស្កាត់អំពើហិង្សា ការគំរាមកំហែង ការបំភិតបំភ័យ គ្រោះថ្នាក់ចរាចរណ៍ គ្រោះថ្នាក់សង្គម និងបាតុភាពនានាដែលបណ្តាលមកពីការពិសារគ្រឿងស្រវឹងគ្រប់ប្រភេទ។ ដើម្បីឲ្យសេចក្តីណែនាំចុះថ្ងៃ០៦កក្កដាកាន់តែមានប្រសិទ្ធភាពបន្ថែមទៀតនោះ លោកនាយករដ្ឋមន្ត្រី បានអំពាវនាវឲ្យក្រសួងពាក់ព័ន្ធទាំងអស់ អនុវត្តសេចក្តីណែនាំនេះ ដោយចុះផ្សព្វផ្សាយនិងអប់រំណែនាំពលរដ្ឋនៅក្នុងមូលដ្ឋានរបស់ខ្លួន។
ជាការកត់សម្គាល់ នេះមិនមែនជាលើកទីមួយទេ ដែលប្រមុខរដ្ឋាភិបាលអំពាវនាវកុំឲ្យលក់និងទទួលទានគ្រឿងស្រវឹងក្នុងថ្ងៃស ក៏ដូចជាថ្ងៃបោះឆ្នោត។ កាលពីថ្ងៃទី០៥កក្កដាកន្លងទៅ ក្នុងពិធីជួបសំណេះសំណាលជាមួយកម្មករនៅខេត្តកណ្ដាល លោក ហ៊ុន សែន ក៏បានធ្វើការអំពាវនាវផ្ទាល់មាត់ក្នុងខ្លឹមសារដូចគ្នានេះដែរ។ លោកថា ការអំពាវនាវដូច្នេះ ធ្វើឡើងតាមសំណើរបស់គណៈកម្មាធិការជាតិរៀបចំការបោះឆ្នោត ដើម្បីទប់ស្កាត់អំពើហិង្សានានា។
សូមបញ្ជាក់ថា ប្រជាពលរដ្ឋខ្មែរជិត៨លាន៤សែននាក់ នឹងត្រូវទៅបោះឆ្នោតជ្រើសតាំងតំណាងរាស្ត្រអាណត្តិទី៦ នៅថ្ងៃទី២៩ ខែកក្កដាខាងមុខនេះ។ ការបោះឆ្នោតនេះ មានគណបក្សចំនួន២០ចូលរួមប្រកួតប្រជែង ដើម្បីដណ្ដើមយកអាសនៈតំណាងរាស្ត្រ ចំនួន១២៥នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ