រដ្ឋាភិបាលកម្ពុជានឹងចេញសារាចរណ៍ហាមប្រាមការជួលដីនៅព្រំដែន
នៅថ្ងៃសុក្រនេះ គណៈរដ្ឋមន្ត្រីកម្ពុជាបានបើកកិច្ចប្រជុំដែលពិភាក្សាលើសេចក្តីព្រាងច្បាប់ស្តីពីសហជីព និងបញ្ហាផ្សេងៗ រួមទាំងការស្នើសុំសច្ចាប័នពីស្ថាប័ននីតិបញ្ញត្តិលើ កិច្ចព្រមព្រៀង ស្តីពីការបង្កើតមជ្ឈមណ្ឌលជីវៈចម្រុះអាស៊ានជាដើម។ ប៉ុន្តែនៅក្នុងកិច្ចប្រជុំនោះ រដ្ឋាភិបាលបានដាក់បញ្ជាឱ្យក្រសួងមហាផ្ទៃ និងក្រសួងការបរទេសចេញសារាចរណ៍ណែនាំដល់ពលរដ្ឋនៅតាមព្រំដែនរបស់កម្ពុជា និងពលរដ្ឋប្រទេសជិតខាង បញ្ឈប់ការជួលដីនៅតាមព្រំដែន។ គណបក្សសង្គ្រោះជាតិ អបអរសាទរចំពោះវិធានការនេះ។
ចុះផ្សាយនៅថ្ងៃ៖
ស្តាប់ - ០២:០៨
ចំពោះការដីជួលនៅតាមព្រំដែនដែលជាបញ្ហាស្មុគស្មាញ រដ្ឋាភិបាលកម្ពុជានឹងចេញវិធានការពីរផ្សេងគ្នា គឺសារាចរណ៍ណែនាំដល់ពលរដ្ឋកម្ពុជានៅតាមព្រំដែនឱ្យបញ្ឈប់ការជួលដីឱ្យពលរដ្ឋបរទេសជិតខាង។ ហើយក្រៅពីនេះ រដ្ឋាភិបាលនឹងផ្ញើលិខិតបីផ្សេងគ្នាទៅកាន់ប្រមុខរដ្ឋាភិបាលប្រទេសថៃ វៀតណាម និងឡាវ ដើម្បីហាមប្រាមពលរដ្ឋរបស់ខ្លួនឈប់មកជួលដីនៅក្នុងព្រំដែនកម្ពុជា។ ជាវិធានការដើម្បីបង្កាជម្លោះព្រំដែនជាមួយប្រទេសជិតខាងជាច្រើនឆ្នាំមកហើយ និងជាការដើម្បីកែលម្អជីវភាពរបស់ពលរដ្ឋខ្មែរនៅតាមព្រំដែនផងដែរ។
ក្រសួងមហាផ្ទៃ និងក្រសួងការបរទេសកម្ពុជា ដែលជាអ្នកអនុវត្តន៍សារាចរណ៍នេះ មិនអាចទាក់ទងបំភ្លឺបាននោះទេ។ ប៉ុន្តែលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីដែលបានចូលរួមកិច្ចប្រជុំ បានឱ្យដឹងថា សារាចរណ៍នេះ គឺនឹងចេញក្នុងរយៈពេលឆាប់បំផុត ព្រោះថាវាជាបទបញ្ជារបស់នាយករដ្ឋមន្ត្រី។ អ្នកនាំពាក្យរូបនេះបានបន្តថាវិធានការនេះ ក៏ជាយន្តការមួយដើម្បីបង្ការបញ្ហាដីធ្លីដែលបានកើតឡើងនៅតាមព្រំដែន និងដើម្បីរៀបចំសណ្តាប់ធ្នាប់។ លោកបន្តថា បើទោះបីដីដែលបានជួលហើយ ក៏ដោយគឺត្រូវតែបញ្ឈប់ជាបន្ទាន់ដែរ។
ប្រធានស្តីទីគណបក្សសង្គ្រោះជាតិលោក ប៉ុល ហំម ស្វាគមន៍ចំពោះវិធានការរបស់រដ្ឋាភិបាលនេះ ព្រោះថាវិធានការនេះនឹងអាចបង្កាការកាន់កាប់ដីពលរដ្ឋបរទេសនៅតាមបណ្តោយព្រំដែន ដែលជាហានិភ័យមួយ។ សូមបញ្ជាក់ថា បញ្ហាការជួលដី ឬការទិញដីពីប្រទេសជិតខាងរបស់កម្ពុជាគឺជាបញ្ហាស្មុគស្មាញមួយក្នុងចំណោមបញ្ហាព្រំដែនកម្ពុជាជាមួយប្រទេសជិតខាង។
យ៉ាងណាក៏ដោយប្រធានស្តីទីគណបក្សរូបនេះ បានលើកឡើងបើទោះបីជាវិធានការណ៍របស់រដ្ឋាភិបាលហាក់ដូចជាយឺតពេលក៏ដោយ ប៉ុន្តែប្រសើរជាងមិនបានធ្វើសោះ។
ក្រៅពីសំដៅទៅបញ្ឈប់ការជួលដីនៅតាមព្រំដែននោះ វិធានការរបស់រដ្ឋាភិបាលដែលសម្រេចក្នុងកិច្ចប្រជុំគណៈរដ្ឋមន្ត្រីនេះ គឺសំដៅលើកកម្ពស់ជីវភាពពលទាហានដែលមានប្រាក់ខែតិច សាក់ទាប និងក្រីក្របំផុត។ ពោលគឺការសាងសង់ផ្ទះ និងការផ្តល់ដីសម្បទានជាដើម។ នេះបើតាមលោកផៃ ស៊ីផាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ