កម្ពុជា-នយោបាយ

ការគ្រប់គ្រងបុគ្គលិកនៃអង្គភាពជំនាញថ្នាក់ក្រោមជាតិត្រូវធ្លាក់ទៅលើគណៈអភិបាល

ដើមឆ្នាំ២០១៨ រដ្ឋាភិបាលកម្ពុជាបានសម្រេចផ្ទេរការគ្រប់គ្រងបុគ្គលិកនៃអង្គភាពជំនាញនៅតាមរាជធានី ខេត្ត ក្រុង ស្រុក ខណ្ឌ ទៅឲ្យរដ្ឋបាលថ្នាក់ក្រោមជាតិជាអ្នកតែងតាំង ឬបញ្ចប់មុខតំណែង របស់មន្ត្រី នៅតាមមន្ទីរ ឬអង្គភាព និងការិយាល័យជំនាញនានានៃក្រសួងដែលបំពេញមុខងារថ្នាក់ក្រោមជាតិ។ ទាក់ទងរឿងនេះ អង្គការសង្គមស៊ីវិលដែលធ្វើការផ្នែកតម្លាភាពសង្គម បានសារទរចំពោះការសម្រេចថ្មីនេះ តែបារម្ភថានឹងមានបញ្ហាអំពើពុករលួយនិងបក្សពួកនិយមកាន់តែច្រើនឡើង។

ចុះផ្សាយនៅថ្ងៃ៖ 06/01/2018 - 07:45កែប្រែថ្ងៃទី៖ 06/01/2018 - 07:50

ផ្សាយពាណិជ្ជកម្ម

ក្នុងអនុក្រឹត្យចុះថ្ងៃទី២៧ ធ្នូ ឆ្នាំ២០១៧ រដ្ឋាភិបាលបានអះអាងថា ការសម្រេចនេះធ្វើឡើងដើម្បីលើកកម្ពស់ប្រសិទ្ធិភាពការងារនៃមន្ត្រីរាជការថ្នាក់ក្រោម។

អ្នកនាំពាក្យក្រសួងមុខងារសាធារណៈ លោក ស សាម៉ីឌី មានប្រសាសន៍ថាការសម្រេចនេះគ្រាន់តែជាការកែសម្រួលបន្ថែមទៅលើអនុក្រឹត្យចាស់ឆ្នាំ២០១៣។ អនុក្រឹត្យឆ្នាំ២០១៣គឺការសម្រេចមុខតំណែងគ្រប់គ្រងទាំងអស់ត្រូវតែឆ្លងកាត់ប្រធានក្រុមប្រឹក្សា ដែលមាននីតិវិធីវែងឆ្ងាយប៉ុន្តែអនុក្រឹត្យថ្មីនេះគឺមុខតំណែងមួយចំនួនទៀតមិនចាំបាច់ឆ្លងកាត់ប្រធានក្រុមប្រឹក្សាពិនិត្យទេគឺត្រឹមតែគណៈអភិបាលខេត្ត ក្រុង ស្រុក ខណ្ឌ ជាអ្នកពិនិត្យឲ្យស្របតាមការកំណត់របស់ច្បាប់ គឺអាចរៀបចំចាត់ចែងតាមនោះបាន។

បើតាម អនុក្រឹត្យនេះ ក្រុមប្រឹក្សាខេត្ត ក្រុង ស្រុក ខណ្ឌ ជាអ្នករៀបចំផែនការបុគ្គលិក កំណត់ប្រាក់ឧបត្ថម្ភ ការតែងតាំង និងបញ្ចប់មុខនាទីនាយករដ្ឋបាលទីចាត់ការ ឬប្រធានអង្គភាព ប្រធានការិយាល័យ ដែលស្ថិតក្រោមការគ្រប់គ្រងរបស់ថ្នាក់នីមួយៗ។ ចំណែកគណៈអភិបាលមានសិទ្ធិ ជ្រើសរើសបុគ្គលិក បង្ហាត់បង្រៀន ផ្លាស់ប្តូរ ដាក់វិន័យ ចូលនិវត្តន៍ តែងតាំង និងបញ្ចប់ពីមុខតំណែងចាប់ពីនាយករងទីចាត់ការ ឬអនុប្រធានអង្គភាពចុះទៅតាមថ្នាក់គ្រប់គ្រងនីមួយៗផងដែរ។

សម្រាប់ លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គម បានសារទរចំពោះការសម្រេចរបស់រដ្ឋាភិបាលនេះតែលោកមានការបារម្ភពីសមត្ថភាពរបស់អ្នកថ្នាក់ក្រោមជាមួយនឹងបញ្ហាអំពើពុករលួយ និងបក្សពួកនិយម អាចធ្វើឲ្យការអនុវត្តនេះមានបញ្ហាខ្លះដែរ។

បើតាម លោក សន ជ័យ គេត្រូវរៀបចំយន្តការតាមដានត្រួតពិនិត្យនិងវាយតម្លៃ ដែលធានាថាធ្វើឡើងដោយយុត្តិធម៌ត្រឹមត្រូវ ផ្អែកទៅលើមូលដ្ឋានសមត្ថភាព និងគុណភាពជាចម្បង

ដើម្បីជួយទប់ស្កាត់ការជ្រើសរើសបុគ្គលិកឬមន្រ្តីដែលពាក់ព័ន្ធនឹងបក្សពួកនិយម ។

ប៉ុន្តែអ្នកនាំពាក្យក្រសួងមុខងារសាធារណៈ លោក ស សាម៉ីឌី បញ្ជាក់ថា នៅក្នុងអនុក្រឹត្យថ្មីនេះ ក៏មានមាត្រាមួយបានចងមិនឲ្យគណៈអភិបាលប្រើប្រាស់អំណាចហួសពីច្បាប់កំណត់នោះដែរ។

គិតត្រឹមឆ្នាំ២០១៧ ចំនួនមន្ត្រីរាជការស៊ីវិលថ្នាក់ក្រោមជាតិមានជាង១៥ម៉ឺននាក់ក្នុងនោះស្រ្តីជាង៦ម៉ឺននាក់។នេះបើតាមរបាយការណ៍របស់ក្រសួងមុខងារសាធារណៈ៕