ការប្រលងបាក់ឌុបឆ្នាំនេះនឹងត្រូវពង្រឹងឲ្យមានស្តង់ដាខ្ពស់
រដ្ឋមន្ត្រីក្រសួងអប់រំថ្លែងថា ក្រសួងនឹងរឹតបន្តឹងការប្រលងសញ្ញាបត្រមធ្យមសិក្សាទុតិយភូមិ ឬការប្រលងបាក់ឌុបនៅឆ្នាំនេះ ដើម្បីទទួលនូវគុណភាពខ្ពស់ និងមានលក្ខណៈជាស្តង់ដាអន្តរជាតិ។ ការលើកឡើងដូច្នេះ បានធ្វើឡើងនៅក្នុងសន្និសីទសារព័ត៌មានមួយ កាលពីថ្ងៃច័ន្ទទី១០កក្កដា នៅក្រសួងអប់រំ។អត្ថបទដោយ៖ ហេង ពុធីរៈ
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
លោកហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឲ្យដឹងថា ក្រសួងមិនត្រឹមតែមានការរៀបចំវិញ្ញាសាស្តង់ដានោះទេ ថែមទាំងមានអ្នកជំនាញដើម្បីជួយកំណត់កំហុសក្នុងការធើ្វកំណែវិញ្ញាសាទៀតផង។ លោកបានបន្ថែមថា ក្រសួងបានរៀបចំមណ្ឌលប្រលងចំនួន ១៧៨មណ្ឌល ហើយក្នុងនោះមាន ១០០មណ្ឌលដែលបានជួសជុលរួចរាល់។ ហើយក្រសួងនឹងធ្វើការរឹតបន្តឹងលើការប្រលងបាក់ឌុបនាពេលខាងមុខនេះឲ្យកាន់តែប្រសើរឡើង ព្រមទាំងមានការចូលរួមពីអង្គភាពប្រឆាំងអំពើពុករលួយ ACU ផងដែរ។ នេះបើយោងតាម លោក ហង់ ជួន ណារ៉ុន។
ការប្រលងសញ្ញាបត្រមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី២១សីហាខាងមុខនេះចំនួនពីរថ្ងៃដោយ មានបេក្ខជនចូលរួមប្រលងសរុបជាង១០ម៉ឺននាក់នៅទូទាំងប្រទេស។ ចំពោះវិញ្ញាសាប្រលង ក្រសួងកំណត់ឲ្យសិស្សថ្នាក់ទី១២ទាំងអស់ ប្រលងចំនួន៧មុខវិជ្ជា ហើយនៅថ្ងៃទី២១ កក្កដាខាងមុខនេះក្រសួងនឹងជ្រើសរើសមុខវិជ្ជាទី៧សម្រាប់ការប្រលង។ សម្រាប់ការចំនាយ ក្រសួងបានរៀបចំថវិកាចំនួន ១៥ពាន់លានរៀលស្មើនឹងជាង៣,៥លានដុល្លារសហរដ្ឋអាមេរិក។
ក្នុងឱកាសនេះដែរ ក្រសួងបានសង្កត់ធ្ងន់ដែរថា សិស្សានុសិស្សទាំងអស់មិនអនុញ្ញាតឲ្យមានការនាំចូលឬប្រើប្រាស់ឧបករណ៍អេឡិចត្រូនិច ដូចជាទូរស័ព្ទដៃ ម៉ាស៊ីនគិតលេខ នាឡិកាដៃទំនើប ជាដើម។ បើពុំដូចនេះទេ សិស្សនឹងត្រូវធ្លាក់ដោយស្វ័យប្រវត្តិ។ ជាមួយគ្នានេះ ក្រសួងបានសន្យាថា នឹងមិនឲ្យមានការបែកធ្លាយវិញ្ញាសាប្រលង និងការចម្លងវិញ្ញាសាសរសេរពីគ្នា។
សូមរំឭកថា កាលពីឆ្នាំ២០១៤ សិស្សដែលប្រលងជាប់បាក់ឌុបលើកទី១ប្រមាណ ២៥% និងលើកទី២ប្រមាណជា១៧% ហើយឆ្នាំ២០១៥ជាប់ប្រហែលជា ៥០% និង ២០១៦ ប្រហែល៦២%។ ចំពោះអ្នកធ្លាក់ ក្រសួងលើកទឹកចិត្តឲ្យទៅរៀនបំពេញវិជ្ជាបន្ថែម ឬរៀនបន្តមធ្យមសិក្សាផ្នែកវិជ្ជាជីវៈណាមួយ ជាជាងការបោះបង់ចោលការសិក្សា។
ចំណែកឯការប្រលងឆ្នាំនេះវិញ ក្រសួងរំពឹងទុកថា នឹងទទួលបានលទ្ធផលរឹតតែប្រសើរជាងឆ្នាំកន្លងទៅ ដោយសារការខិតខំប្រឹងប្រែងរបស់សិស្សានុសិស្ស ការចូលរួមលើកទឹកចិត្តពីមាតាបិតាអាណាព្យាបាលសិស្ស ការយកចិត្តទុកដាក់បង្រៀនពីសំណាក់លោកគ្រូ អ្នកគ្រូ ភាគីពាក់ព័ន្ធ ថ្នាក់ដឹកនាំ និងមន្ត្រីជំនាញគ្រប់កម្រិតថ្នាក់ ដែលជាកត្តាសំខាន់ធ្វើឲ្យសមត្ថភាពសិស្សានុសិស្សមានការរីកចម្រើនកើនឡើងជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ