រដ្ឋសភា បញ្ជូនសេចក្តីស្នើច្បាប់បើកផ្លូវឱ្យអតីតថ្នាក់ដឹកនាំបក្សប្រឆាំង មានសិទ្ធិធ្វើនយោបាយឡើងវិញ ទៅឱ្យគណៈកម្មការជំនាញសិក្សាមុនអនុម័ត
បន្ទាប់ពីបញ្ចប់កិច្ចប្រជុំគណៈកម្មាធិការអចិន្រ្តៃយ៍ នៅថ្ងៃទី០៥ ធ្នូនេះ រដ្ឋសភា បានបញ្ជូនសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយ ដែលបើកផ្លូវឱ្យថ្នាក់ដឹកនាំនៃអតីតគណបក្សសង្រ្គោះជាតិ មានសិទ្ធិក្នុងការធ្វើនយោបាយឡើងវិញ ទៅឱ្យគណៈកម្មការទី០៦ នៃរដ្ឋសភាសិក្សា មុននឹងអនុម័ត។ កិច្ចប្រជុំនេះ ធ្វើឡើងបន្ទាប់ពីតំណាងរាស្រ្តចំនួន ៨៧រូប មកពីគណបក្សប្រជាជនកម្ពុជា បានផ្តួចផ្តើមធ្វើវិសោធនកម្មច្បាប់ស្តីពីគណបក្សនយោយបាយ ត្រង់មាត្រា ៤៥ ថ្មី (ស្ទួន) ដែលផ្តល់សិទិ្ធដល់នាយករដ្ឋមន្រ្តីធ្វើសំណើទៅព្រះមហាក្សត្រ ឱ្យបុគ្គលជាប់បម្រាមហាមឃាត់សិទ្ធិធ្វើនយោបាយ អាចធ្វើសកម្មភាពឡើងវិញបាន។
ចុះផ្សាយនៅថ្ងៃ៖ កែប្រែថ្ងៃទី៖
កិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា ធ្វើឡើងក្រោមអធិបតីភាព លោក ហេង សំរិន ប្រធានរដ្ឋសភា នៅថ្ងៃទី៥ ធ្នូនេះ បានសម្រេច បញ្ជូនសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយ ដែលបើកផ្លូវឱ្យមន្រ្តីអតីតបក្សប្រឆាំង មានសិទ្ធិពេញលេញក្នុងការធ្វើនយោបាយឡើងវិញនោះ ឱ្យទៅគណៈកម្មការទី០៦ នៃរដ្ឋសភាសិក្សាឱ្យបានច្បាស់លាស់ មុននឹងដាក់បញ្ចូលទៅក្នុងកិច្ចប្រជុំពេញអង្គអនុម័ត។នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា ថ្ងៃទី ៥ ធ្នូ នេះ។
សេចក្តីស្នើច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ ជាការបន្ថែមនូវវាក្សខណ្ឌមួយថ្មី ក្នុងមាត្រា៤៥ថ្មី (ស្ទួនមួយ) ដែលចែងថា៖ «បុគ្គលត្រូវបានតុលាការសម្រេចហាមឃាត់ការ ធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឱ្យគេបោះឆ្នោត ឬធ្វើសកម្មភាពណា មួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលត្រូវបានតុលាការ សម្រេចហាមឃាត់ការធ្វើសកម្មភាពនយោបាយនេះ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្រ្តី តាមសេចក្តីស្នើសុំរបស់រដ្ឋមន្រ្តីក្រសួងមហាផ្ទៃ»។
លោក ស ខេង រដ្ឋមន្រ្តីក្រសួងមហាផ្ទៃ បានថ្លែងកាលពីថ្ងៃទី ៤ ធ្នូ ថា អតីតមន្រ្តីនៃអតីតបក្សសង្រ្គោះជាតិមួយចំនួនធំ ដែលជាប់បំរាម ហើយបានគោរពតាមសាលដីកាតុលាការកំពូល អាចនឹងទទួលបានសិទ្ធិធ្វើសកម្មភាពនយោបាយឡើងវិញ។
ថ្លែងនៅក្នុងពិធីបើកសិក្ខាសាលាផ្សព្វផ្សាយអំពីតួនាទី និងភារកិច្ចរបស់គណៈកម្មាធិការជាតិ ប្រឆាំងទារុណកម្ម លោក ស ខេង បន្ថែមថា រដ្ឋាភិបាលកម្ពុជា បន្តពង្រឹងលទ្ធិប្រជាធិបតេយ្យ កាន់តែល្អថែមទៀត ដើម្បីជាប្រយោជន៍លើកកម្ពស់ ការអភិវឌ្ឍន៍សង្គម សេដ្ឋកិច្ចជាតិ និងជីវភាពរស់នៅរបស់ប្រជាពលរដ្ឋ។
ការបញ្ជូនសេចក្តីស្នើច្បាប់ស្តីពីវិសោធនកម្មច្បាប់គណបក្សនយោបាយធ្វើឡើងបន្ទាប់ពី ក្រសួងការបរទេស បានចេញសេចក្តីថ្លែងការណ៍ស្តីវិធានការណ៍ ដើម្បីពង្រឹងលទ្ធិប្រជាធិបតេយ្យ និងលំហរនយោបាយ។ ខ្លឹមសារនៃសេចក្តីថ្លែងការណ៍នោះ គឺសម្រួលដល់ស្ថានការណ៍អ្នកនយោបាយក្រុមប្រឆាំង ដែលត្រូវតុលាការហាមឃាត់សិទ្ធិធ្វើនយោបាយ ប្រព័ន្ធផ្សព្វផ្សាយបរទេសនៅកម្ពុជា អង្គការសង្គមស៊ីវិល និងសហជីពជាដើម។
សម្រាប់លោក កឹម សុខា ប្រធានអតីតគណបក្សសង្រ្គោះជាតិ តាមរយៈលោកមេធាវី ចាន់ ចេន បានប្រកាសជំហរគាំទ្រចំពោះសេចក្តីថ្លែងការណ៍របស់រដ្ឋាភិបាលកម្ពុជា ដោយចាត់ទុកថា ជាការបន្ធូរស្ថានភាព ហើយធ្វើឡើងដើម្បីស្តារស្ថានភាពសិទ្ធិមនុស្ស និងលទ្ធិប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ