រដ្ឋាភិបាលបើកផ្លូវឲ្យវិទ្យុរបស់អតីតមន្ត្រីជាន់ខ្ពស់បក្សប្រឆាំងម្នាក់ បើកការិយាល័យនៅកម្ពុជាឡើងវិញ
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបើកផ្លូវឲ្យវិទ្យុខ្មែរប៉ុស្តិ៍របស់លោក មាជ សុវណ្ណារ៉ា អតីតបេក្ខជនតំណាងរាស្ត្រគណបក្សប្រឆាំង បើកការិយាល័យនៅកម្ពុជាឡើងវិញ។ សូមបញ្ជាក់ថា វិទ្យុខ្មែរប៉ុស្តិ៍ដែលមានទីស្នាក់ការនៅសហរដ្ឋអាមេរិក បានផ្អាកការផ្សាយរបស់ខ្លួន តាមរលកធាតុអាកាស FM 105 នៃវិទ្យុសំបុកឃ្មុំ តាមការបញ្ឈប់ផ្អាកការផ្សាយពីក្រសួងព័ត៌មាន កាលពីអំឡុងឆ្នាំ២០១២។
ចុះផ្សាយនៅថ្ងៃ៖
ស្តាប់ - ០២:៣៣
នៅទីបំផុតទៅ ក្រសួងព័ត៌មានតំណាងឲ្យរដ្ឋាភិបាលកម្ពុជា បានអនុញ្ញាតឲ្យវិទ្យុខ្មែរប៉ុស្តិ៍របស់លោក មាជ សុវណ្ណារ៉ា អតីតបេក្ខជនតំណាងរាស្ត្រគណបក្សប្រឆាំង បើកដំណើរការនៅកម្ពុជាឡើងវិញហើយ។ ក៏ប៉ុន្តែត្រូវតែបំពេញលិខិតស្នាមតាមផ្លូវច្បាប់របស់កម្ពុជាដែលបានកំណត់។ នេះបើតាមការបញ្ជាក់ពីលោក មាស សុភ័ណ្ឌ អ្នកនាំពាក្យក្រសួងព័ត៌មាន។
ការលើកឡើងរបស់លោក មាស សុភ័ណ្ឌ គឺបន្ទាប់ពីមានជំនួបប្រមាណជាងមួយម៉ោងរវាងរដ្ឋមន្ត្រីក្រសួងព័ត៌មានលោក ខៀវ កាញារីទ្ធ និងលោក មាជ សុវណ្ណារ៉ា ស្ថាបនិកនៃមជ្ឈមណ្ឌលព័ត៌មានខ្មែរប៉ុស្តិ៍ (វិទ្យុខ្មែរប៉ុស្តិ៍) និងសហការី កាលពីរសៀលថ្ងៃទី ២២ វិច្ឆិកា។ បើតាមលោក មាស សុភ័ណ្ឌ ជាគោលការណ៍លោករដ្ឋមន្ត្រីបានគាំទ្រសំណើរបស់លោក មាជ សុវណ្ណារ៉ា ដែលស្នើសុំបើកការិយាល័យវិទ្យុខ្មែរប៉ុស្តិ៍នៅកម្ពុជាឡើងវិញ។ ក៏ប៉ុន្តែលោក មាជ សុវណ្ណារ៉ា ត្រូវបំពេញតាមលក្ខខ័ណ្ឌ និងច្បាប់របស់កម្ពុជាដែលបានកំណត់។
សូមជំរាបជូនថា វិទ្យុខ្មែរប៉ុស្តិ៍ ដែលមានមូលដ្ឋាននៅទីក្រុងឡុងប៊ិចសហរដ្ឋអាមេរិកនេះ បានផ្អាកការផ្សាយរបស់ខ្លួនតាមរលកធាតុអាកាស FM 105 នៃវិទ្យុសំបុកឃ្មុំ ក្រោយពីការបញ្ឈប់ការផ្សាយពីក្រសួងព័ត៌មាន តាំងពីឆ្នាំ២០១២មក។ ក្រោយមកវិទ្យុរបស់អតីតបេក្ខជនតំណាងរាស្ត្រគណបក្សប្រឆាំងលោក មាជ សុវណ្ណារ៉ា នេះ បានផ្សព្វផ្សាយតាមរលកធាតុអាកាសខ្លី (Short Wave) និងអន្តរបណ្តាញ online ពីសហរដ្ឋអាមេរិកតែប៉ុណ្ណោះ។
អ្វីជាការកត់សំគាល់ មួយរយៈពេលចុងក្រោយនេះ រដ្ឋាភិបាលកម្ពុជាតាមរយៈក្រសួងព័ត៌មាន បានបើកភ្លើងខៀវជាបន្តបន្ទាប់ ឲ្យវិទ្យុសម្លេងសហរដ្ឋអាមេរិក VOA និងវិទ្យុអាស៊ីសេរី RFA ជួលម៉ោងផ្សាយនៅលើវិទ្យុ FM 102 និងវិទ្យុសំបុកឃ្មុំ FM 105 ឡើងវិញ បន្ទាប់ពីមានជំនួប រវាងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាលោក Partrick Murphy ជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជា កាលពីថ្ងៃទី ១៥ វិច្ឆិកា។ ប៉ុន្តែសម្រាប់វិទ្យុអាស៊ីសេរី RFA គឺភ្ជាប់ជាមួយលក្ខខណ្ឌមួយថា វិទ្យុអាស៊ីសេរី មិនត្រូវប្រើពាក្យ «របបក្រុងភ្នំពេញ» ទៀតនោះឡើយ។
យ៉ាងណាក្តី លោក មាជ សុវណ្ណារ៉ា ស្ថាបនិកនៃមជ្ឈមណ្ឌលព័ត៌មានខ្មែរប៉ុស្តិ៍ (វិទ្យុខ្មែរប៉ុស្តិ៍) បានសរសេរនៅលើបណ្តាញសង្គមហ្វេសបុករបស់លោក ក្រោយពីជំនួបជាមួយលោក ខៀវ កាញារីទ្ធ នៅថ្ងៃទី ២២ វិច្ឆិកាថា បន្ទាប់ពីមានទំនាក់ទំនងការទូតល្អឡើងវិញ រវាងរដ្ឋាភិបាលកម្ពុជា និងសហរដ្ឋអាមេរិក រដ្ឋាភិបាលកម្ពុជាបានអនុញ្ញាតអោយវិទ្យុបរទេសផ្សាយជាខេរមភាសា និងវិទ្យុខ្មែរប៉ុស្តិ៍ KPR របស់លោក បើកការិយាល័យនៅកម្ពុជាឡើងវិញហើយ។ ក៏ប៉ុន្តែសម្រាប់វិទ្យុ FM ប្រមាណជា៣០ ដែលរដ្ឋាភិបាលកម្ពុជាបានបិទ កាលពីមុនឆ្នាំ ២០១៧ នៅអំឡុងពេលមានការធ្វើទុក្ខបុកម្នេញលើប្រព័ន្ធផ្សព្វផ្សាយ និងគណបក្សប្រឆាំងនៅកម្ពុជានោះ នៅមិនទាន់មានសញ្ញាអនុញ្ញាតឲ្យបើកឡើងវិញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ