ខ្មាន់កាំភ្លើង បាញ់សម្លាប់មនុស្សនៅម្តុំផ្សារសុវណ្ណាពីសប្តាហ៍មុន នឹងអាចត្រូវទទួលទោសអតិបរមា!
នគរបាលព្រហ្មទណ្ឌ បានបង្ហាញមុខខ្មាន់កាំភ្លើងម្នាក់ និងគូកនម្នាក់ ពីម្សិលមិញ។ ពួកគេទាំងពីរនិងបក្សពួក បានប្លន់និងបាញ់សម្លាប់បុរសម្នាក់ ហើយធ្វើឲ្យនារី ២នាក់ រងរបួស នៅជិតផ្សារសុវណ្ណា ខណ្ឌចំការមន កាលពីសប្ដាហ៍មុន។ តាមរយៈវីដេអូនៃព្រឹត្តិការណ៍ប្លន់ដ៏សាហាវនោះ បានធ្វើឲ្យកក្រើកពេញបណ្តាញសង្គម Facebook។ ទន្ទឹមនេះ ក៏មានប៉ូលីសម្នាក់ បានចង្អុរបង្ហាញតាម Facebook ថា ខ្មាន់កាំភ្លើងម្នាក់ក្នុងចំណោមពីរនាក់នោះ គឺគាត់ធ្លាប់ចាប់បានម្តងហើយ តែបែរជាត្រូវតុលាការដោះលែង ហើយអាចមានឱកាសមកប្រព្រឹត្តបទល្មើសជាថ្មីទៀត។ ផ្ទុយពីនេះ មន្ត្រីក្រសួងយុត្តិធម៌ ថាជាការចៃដន្យដែលជននោះលួចរត់ នៅពេលសុំទៅព្យាបាលជំងឺ គឺពុំមែនតុលាការជាអ្នកដោះលែងនោះទេ។
ចុះផ្សាយនៅថ្ងៃ៖
ស្តាប់ - ០២:០០
អ្នកនាំពាក្យអយ្យការសាលាដំបូងរាជធានីភ្នំពេញ លោក លី សុផាន់ណា បានបញ្ជាក់ថា បុគ្គលម្នាក់ក្នុងចំណោមពួកគេទាំងពីរនាក់នោះ គឺមានជនល្មើសឈ្មោះ អ៊ុំ សួស្តី ហៅពៅ ឬហៅក្បាលធំ ដែលត្រូវតុលាការកាត់ទោសដាក់គុក៨ឆ្នាំ ពីបទលួចមានស្ថានទម្ងន់ទោស។ ហើយក្នុងកំលុងពេលអនុវត្តទោសក្នុងពន្ធនាគារ ទណ្ឌិតរូបនេះ បានសុំទៅព្យាបាលជំងឺនៅមន្ទីរពេទ្យ ហើយបានរត់គេចខ្លួននៅពេលបញ្ជូនទៅសម្រាកនៅមន្ទីរពេទ្យ។
លោក លី សុផាន់ណា អះអាងថា តុលាការបានចេញដីកាបង្គាប់ឲ្យចាប់ខ្លួនទណ្ឌិតរូបនេះទៅអនុវត្តទោស ហើយកំពុងអនុវត្តដីកាបង្គាប់ឲ្យចាប់ខ្លួនមកដល់ពេលនេះ ហើយស្រាប់តែទណ្ឌិតរូបនេះ បង្ហាញខ្លួននិងប្រព្រឹត្តបទល្មើសថ្មីបន្ថែមទៀត។
ក៏ប៉ុន្តែ ទោះយ៉ាងណាក្តី ដីកាបង្គាប់ឲ្យចាប់ខ្លួននោះ គឺមិនទាន់ត្រូវបង្ហាញឲ្យបានឃើញនៅឡើយទេ។ ចំណែក ក្រុមអ្នកធ្វើការសង្គមស៊ីវិលខ្លះ សង្ស័យថា ជនល្មើសនេះ និងជនល្មើសខ្លះទៀត អាចរួចខ្លួន និងត្រួវដោះលែងតាមរយៈការបន្ធូរបន្ថយទោស ក្នុងឱកាសបុណ្យជាតិធំៗ។
ទោះយ៉ាងណាក្តី អ្នកនាំពាក្យអយ្យការតុលាការភ្នំពេញ បានលើកឡើងថា តុលាការបានអនុវត្តយ៉ាងត្រឹមត្រូវតាមច្បាប់ និងនីតិវិធីក្នុងការសម្រេចផ្តន្ទាទោស និងអនុវត្តទោសទៅលើទណ្ឌិតរូបនេះ។
ជាការកត់សម្គាល់ ជនដៃដល់ អ៊ុំ សួស្ដី ដែលបានបាញ់សម្លាប់ជនរងគ្រោះកាលពីអាទិត្យមុននេះ គឺបានប្រព្រឹត្តសកម្មភាពខុសច្បាប់ចំនួនដល់ទៅ៤ដង ដូចជាប្លន់ម៉ូតូ ប្លន់អ្នកស៊ីការគ្រឿងអលង្ការ និងយកលុយកាក់ជាដើម ហើយប្លន់លើកទី ៤នេះ គឺបានបាញ់សម្លាប់ជាច្រើនគ្រាប់ទៅលើជនរងគ្រោះ នៅជិតផ្សារសុវណ្ណា នេះតែម្ដង។
លោក ជិន ម៉ាលីន អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ខ្មែរ បានគូសបង្ហាញប្រាប់វិទ្យុបារាំងថា ជនល្មើសខាងលើនេះ អាចនឹងត្រូវទទួលទោសអតិបរមានៃទោស! បានន័យថា តុលាការត្រូវដាក់ទោសកម្រិតធ្ងន់បំផុតនៃកម្រិតបទល្មើសរបស់ខ្លួន ហើយគេត្រូវទទួលអនុវត្តទោសថ្មី រួមទាំងទោសចាស់ពីមុនមកទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ