មន្ត្រីជាន់ខ្ពស់រដ្ឋាភិបាលថាស្ថានភាពកុមារកម្ពុជានៅមានភាពប្រឈមនៅឡើយ
នៅថ្ងៃនេះ លោកស្រីម៉ែន សំអន ឧបនាយករដ្ឋមន្ត្រីបាន ថ្លែងនៅក្នុងកម្មវីធីផ្សព្វផ្សាយផែនការសកម្មភាពទប់ស្កាត់ហិង្សាលើកុមារថា ស្ថានភាពកុមារនៅកម្ពុជានៅមានភាពប្រឈមនៅឡើយ ទោះបីជាមានគោលនយោបាយ និងកម្មវិធីជាតិស្តីពីការអភិវឌ្ឍកុមារកំពុងដំណើរការល្អមែន។ ចំណែកអង្គការក្រៅរដ្ឋាភិបាលលើកឡើងថាស្ថានភាពហិង្សាលើកុមារនៅកម្ពុជាស្ថិតនៅទ្រឹងក្នុងឆ្នាំ២០១៧នេះ។
ចុះផ្សាយនៅថ្ងៃ៖
ស្តាប់ - ០២:១១
ថ្លែងក្នុងឱកាសប្រកាសផ្សព្វផ្សាយផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារក្នុងប្រទេសកម្ពុជា លោកស្រីម៉ែន សំអន ឧបនាយករដ្ឋមន្ដ្រី ក្រសួងទំនាក់ទំនង ជាមួយរដ្ឋសភាព្រឹទ្ធសភា និងអធិការកិច្ច ថា ទោះបីជាមានគោលនយោបាយ និងកម្មវិធីជាតិ ស្តីពីការអភិវឌ្ឍកុមារកំពុងដំណើរការល្អមែន ក៏ស្ថានភាពកុមារកម្ពុជានៅមានភាពប្រឈមនៅឡើយ។ លោកស្រីបន្ថែមថា ពិសេសគឺអំពើហិង្សាលើកុមារ ដែលជាបរិបទថ្មីមួយទៀត កំពុងរីករាលដាលជារូបភាពផ្សេងៗនៅក្នុងប្រទេសកម្ពុជា និងសាកលលោក។
លោកស្រីម៉ែន សំអន បញ្ជាក់ថា រដ្ឋាភិបាលកម្ពុជាបានយកចិត្តទុកដាក់ខ្ពស់ ចំពោះកិច្ចការពារកុមារ លើគ្រប់វិស័យ និងបានកំណត់ថា កុមារគឺជាសសរទ្រូងរបស់ប្រទេសកម្ពុជា។
ប្រធានផ្នែកស្ត្រី និងកុមាររបស់សមាគមអាដហុក (ADHOC) លោកស្រី ឆន សុគន្ធា បានថ្លែងប្រាប់វិទ្យុបារាំងនៅថ្ងៃទី១១ ខែធ្នូ នេះថា ស្ថានភាពហិង្សាទៅលើកុមារក្នុងប្រទេសកម្ពុជា នៅតែបន្តកើតមានឡើងដដែល នៅឆ្នាំ២០១៧នេះ ដូចទៅនឹងឆ្នាំ២០១៦កន្លងទៅដែរ ពោលគឺមិនមានការថយចុះអ្វីគួរឲ្យកត់សម្គាល់នោះទេ។
លោកស្រី បន្ថែមថា រដ្ឋាភិបាលកម្ពុជាមានគោលនយោបាយល្អ ប៉ុន្តែការអនុវត្តនៅមានបញ្ហាខ្វះចន្លោះនៅឡើយ ជាពិសេសនៅថ្នាក់ក្រោមជាតិ។ លោកស្រី ក៏បានស្នើឲ្យរដ្ឋាភិបាលទម្លាក់កញ្ចប់ថវិកាឲ្យបានគ្រប់គ្រាន់ទៅតាមគោលនយោបាយ ដែលរដ្ឋាភិបាលបានដាក់ចេញឲ្យអនុវត្តផងដែរ។
យោងតាមអង្គការទស្សនៈពិភពលោកបានឲ្យដឹងថាកុមារនៅក្នុងប្រទេសកម្ពុជាប្រមាណ៧៥ភាគរយជួបប្រទះអំពើហិង្សាយ៉ាងហោចណាស់មួយទម្រង់មុនពេលពួកគេមានអាយុ១៨ឆ្នាំ។ ការស្ទង់មតិថ្នាក់ជាតិមួយបង្ហាញថា កុមារកម្ពុជាច្រើនជាង៥០ភាគរយ ទទួលរងនូវអំពើហិង្សាលើរូបរាងកាយ ២៥ភាគរយ ទទួលរងអំពើហិង្សាផ្នែកផ្លូវចិត្ត និងប្រមាណ៥ភាគរយទទួលរងនូវអំពើហិង្សាផ្នែកផ្លូវភេទ។
បើតាមអង្គការយូនីសេហ្វ បន្ទុកសេដ្ឋកិច្ចប្រចាំឆ្នាំដោយសារផលវិបាកផ្នែកសុខភាព ដែលបង្កឡើងដោយអំពើហិង្សាលើកុមារក្នុងប្រទេសកម្ពុជា ត្រូវបានគេប៉ាន់ស្មានថាមានយ៉ាងហោចណាស់១៦៨លានដុល្លារអាមេរិក ពោលគឺច្រើនជាង១ភាគរយ នៃផលិតផលក្នុងស្រុកសរុបរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ