អ្នកភូមិជាង ៦០០នាក់ផ្អើលទៅពិនិត្យឈាមបន្ទាប់ពីផ្ទុះរឿងអាស្រូវជំងឺអេដស៍នៅឃុំរកា
ប្រជាពលរដ្ឋក្នុងឃុំរកាស្រុកសង្កែ ខេត្តបាត់ដំបងជាង៦០០នាក់ បាននាំគ្នាផ្អើលទៅធ្វើតេស្ត៍ឈាមរកមេរោគអេដស៍ចាប់តាំងពីថ្ងៃទី៥ ខែធ្នូ រហូតមកដល់ថ្ងៃទី១៦ ខែធ្នូ ក្រោយពីមនុស្សនៅក្នុងឃុំប្រមាណ៩០នាក់ ត្រូវបានមណ្ឌលសុខភាពស្រុកបញ្ជាក់ថាពួកគាត់មានផ្ទុកមេរោគអេដស៍។ គ្រូពេទ្យប្រចាំភូមិម្នាក់ត្រូវបានសង្ស័យថាជាអ្នកចម្លងមេរោគនេះដល់អ្នកភូមិ។ អាជ្ញាធរសុខាភិបាលកំពុងស៊ើបអង្កេតបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ប្រជាជនក្នុងឃុំរកា ប្រមាណជាង៦០០នាក់ ដែលមានទាំងចាស់ទាំងក្មេង បាននាំគ្នា ទៅធ្វើតេស្ត៍ឈាម ក្រោយពីមានការសង្ស័យថាពួកគាត់អាចនឹងមានផ្ទុកមេរោគអេដស៍។ ក្រោយពីការធ្វើតេស្ត៍ឈាមលើកតំបូង ចាប់តាំងពីថ្ងៃទី៥ ខែធ្នូមក មានមនុស្សប្រមាណជាង១០០នាក់ហើយដែលត្រូវបានអះអាងដោយមណ្ឌលសុខភាពស្រុកថាមានផ្ទុកមេរោគអេដស៍។ ក្នុងចំណោមនោះ ក៏មានទាំងកុមារអាយុក្រោម១៥ឆ្នាំ ចំនួន១៩នាក់ផងដែរ។
នេះបើយោងតាមការបញ្ជាក់របស់ លោកតែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ដែលបានប្រាប់វិទ្យុបារាំងនៅថ្ងៃទី១៧ខែធ្នូនេះ។ លោកឲ្យដឹងទៀតថា លទ្ធផលធ្វើតេស្ត៍ឈាមលើកទី២ នៅឯមន្ទីរពេទ្យខេត្ត បានរកឃើញថាមនុស្ស៨២នាក់បានផ្ទុកមេរោកអេដស៍ ខណៈមនុស្សចំនួន៨នាក់ផ្សេងទៀត មិនទាន់បានទទួលលទ្ធផលនៅឡើយទេ។ ការធ្វើតេស្ត៍ឈាមលើកទី៣ក៏គ្រោងធ្វើដែរដើម្បីបញ្ជាក់ឲ្យបានកាន់តែច្បាស់ចំពោះការឆ្លងមេរោគអេដស៍នេះ។
គួរបញ្ជាក់ថា ការផ្អើលឆោឡោបានកើតឡើងបន្ទាប់ពីអ្នកភូមិជាច្រើន ទាំងក្មេង ទាំងចាស់ នៅក្នុងឃុំខាងលើត្រូវបានរកឃើញថាមានផ្ទុកមេរោគ HIV ។ ជុំវិញមូលហេតុនៃការចម្លងនេះ លោកតែង គន្ធី បានអះអាងថា ទីតាំងភូមិសាស្ត្រនៅក្នុងតំបន់នេះ មិនអាចធ្វើឲ្យមានលទ្ធភាពនៃការឆ្លងជំងឺអេដស៍តាមការរួមភេទបានទេ ព្រោះតំបន់នេះ ជាតំបន់ជនបទ ដែលគ្មានសេវាកម្សាន្តផ្សេងៗ ដូចក្នុងតំបន់ប្រជុំជននោះឡើយ។ អាជ្ញាធរជាតិប្រយុទ្ធនឹងជំងឺអេដស៍មានការសង្ស័យលើគ្រូពេទ្យម្នាក់ដែលព្យាបាលជំងឺប្រជាពលរដ្ឋក្នុងឃុំនេះ ហើយអាជ្ញាធរជាតិប្រយុទ្ធនឹងជំងឺអេដស៍កំពុងស៊ើបអង្កេតបញ្ហានេះ។
លោកស្រី មួរ សុខហួរ អ្នកតំណាងរាស្ត្រគណបក្សសង្គ្រោះជាតិមណ្ឌលខេត្តបាត់ដំបង បានបញ្ជាក់ថា បញ្ហា នេះគឺជាកង្វះខាតវិធានការនៃការគ្រប់គ្រងគ្លីនិចមួយចំនួន ឬក្រុមគ្រូពេទ្យមួយចំនួន ដែលគ្មានអាជ្ញាប័ណ្ណត្រឹមត្រូវពីក្រសួងសុខាភិបាល។ លោកស្រី បានសុំឲ្យក្រសួងសុខាភិបាលគួរតែមានវិធានការជាបន្ទាន់។
បើតាមលោក តែង គន្ធី ក្រសួងសុខាភិបាលក៏ដូជាក្រុមអាជ្ញាធរជាតិប្រយុទ្ធនឹងជំងឺអេដស៍ នឹងលើកទឹកចិត្តឲ្យប្រជាពលរដ្ឋក្នុងភូមិមកធ្វើតេស្ត៍ឈាមជាបន្តទៀត និងសម្រួលអារម្មណ៍របស់ប្រជាពលរដ្ឋដែលឆ្លងជំងឺនេះ គឺក្រសួងនឹងផ្តល់កញ្ចប់សេវាកម្មប្រឆាំងនឹងជំងឺអេដស៍ដល់ពួកគាត់ ដើម្បីការពារខ្លួនពីជំងឺឳកាសនិយមផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ