លោក ហោ ណាំហុង៖ លោក សម រង្ស៊ី មាក់ងាយការងារកំណត់ព្រំដែនកម្ពុជា
ការអះអាងរបស់លោក សម រង្ស៊ី ថាបានទិញផែនទីកម្ពុជាពីប្រទេសបារាំងក្នុងតម្លៃ១៦៨ដុល្លារ ត្រូវបានលោក ហោ ណាំហុង ហៅថា ជាការមាក់ងាយការងារកំណត់និងបោះបង្គោលព្រំដែន របស់រាជរដ្ឋាភិបាលកម្ពុជា។ ប្រតិកម្មរបស់ប្រមុខការទូតកម្ពុជាដូច្នេះ ធ្វើឡើងបន្ទាប់ពីលោក សម រង្ស៊ី គូសបញ្ជាក់ថា គណបក្សសង្គ្រោះជាតិបានទិញផែនទីខ្នាត១លើ១០០ពាន់ ចំនួន២៦ផ្ទាំង ពីបារាំង ក្នុងតម្លៃត្រឹមតែ១៦៨ដុល្លារតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បើទោះបីជាមិនទាន់បានឃើញផែនទីដែលបក្សប្រឆាំងទិញមកពីប្រទេសបារាំងក៏ដោយ ក៏លោក ហោ ណាំហុង ហាក់គ្មានជំនឿថា ផែនទីចំណាស់ដ៏មានសារៈសំខាន់នេះ ត្រូវគេដាក់លក់លើទីផ្សារ ក្នុងតម្លៃត្រឹមតែ១៦៨ដុល្លារនោះទេ។ ការអះអាងរបស់លោក សម រង្ស៊ី អំពីការទិញផែនទីខ្នាត១លើ១រយពាន់របស់កម្ពុជាក្នុងតម្លៃតែ១៦៨ដុល្លារ ត្រូវបានប្រមុខការទូតកម្ពុជា ហៅថា ជាការមាក់ងាយការងារកំណត់និងបោះបង្គោលព្រំដែន របស់រាជរដ្ឋាភិបាលកម្ពុជា។ រាជរដ្ឋាភិបាលកម្ពុជា ដែលកំណត់និងបោះបង្គោលព្រំដែនកម្ពុជា និងប្រទេសជិតខាង ដោយផ្អែកតាមផែនទីខ្នាត១លើ១រយពាន់ របស់ក្រុមភូមិសាស្ត្រឥណ្ឌូចិន តាំងពីដើមរៀងមក។ នេះបើតាម លោក ហោ ណាំហុង។
ប្រតិកម្មទៅលើការលើកឡើងរបស់ប្រមុខបក្សប្រឆាំង មិនមែនមានតែពីលោក ហោ ណាំហុងទេ។ ក៏មានដែរពីអ្នកនាំពាក្យអង្គភាពព័ត៌មាននិងប្រតិកម្មរហ័សនៃទីស្ដីការគណៈរដ្ឋមន្ដ្រី បានហៅទង្វើរបស់លោក សម រង្ស៊ី ថាជាការប្រមាថយ៉ាងធ្ងន់ធ្ងរចំពោះអធិបតេយ្យជាតិនិងបូរណភាពទឹកដីកម្ពុជា។ អ្នកនាំពាក្យនៃអង្គភាពនេះ បានចោទជាសំណួរថា តើតម្លៃអធិបតេយ្យជាតិកម្ពុជាក្នុងទស្សនៈប្រធានបក្សសង្គ្រោះជាតិ មានត្រឹមតែ១៦៨ដុល្លារអាមេរិកមែនឬយ៉ាងណា?
ជាការឆ្លើយតប លោក សម រង្ស៊ី បានអះអាងប្រាប់វិទ្យុបារាំងថា អ្វីដែលលោកលើកឡើង គឺគ្រាន់តែជាព័ត៌មាន។ ព័ត៌មានដែលថា ផែនទីខ្នាត១លើ១រយពាន់ បង្ហាញពីព្រំដែនកម្ពុជាវៀតណាម មុនឆ្នាំ១៩៥៣ មានដាក់លក់នៅវិទ្យាស្ថានជាតិភូមិសាស្ត្រប្រទេសបារាំង ក្នុងតម្លៃ១៦៨ដុល្លារ។ ព័ត៌មានដែលសរសេរនៅលើបណ្ដាញសង្គមនោះ មិនមែនជាការប្រមាថទៅលើការងាររបស់នរណាម្នាក់ឡើយ។ នេះបើតាមការបញ្ជាក់របស់លោក សម រង្ស៊ី។
ជាការកត់សម្គាល់ ផែនទីខ្នាត១លើ១រយពាន់ មុនឆ្នាំ១៩៥៣ ដែលគណបក្សសង្គ្រោះជាតិទិញពីបារាំងនោះ គឺជាច្បាប់ចម្លងតាមប្រព័ន្ធអេឡិចត្រូនិក ដាក់បញ្ជូលក្នុង DVD ប៉ុន្តែវាដូចគ្នាបេះបិទទៅនឹងច្បាប់ដើមនៃផែនទី។ បើតាមលោក សម រង្ស៊ី នៅវិទ្យាស្ថានជាតិភូមិសាស្ត្របារាំងនោះ មិនមែនមានលក់តែផែនទីកម្ពុជាទេ។ ក៏មានផែនទីនៃប្រទេសផ្សេងទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ