សេចក្តីស្នើច្បាប់ផ្ទះជួល ត្រូវបានអនុម័តជាច្បាប់ផ្លូវការ
រដ្ឋសភាជាតិ នៅព្រឹកថ្ងៃទី ០៦កក្កដានេះ បានអនុម័តជាផ្លូវការហើយ នូវសេចក្តីស្នើច្បាប់ស្តីពីភតិសន្យាពិសេស ឬច្បាប់ផ្ទះជួល ដោយសម្លេងគាំទ្រ ១០២។ សេចក្តីស្នើច្បាប់ផ្ទះជួល ត្រូវបានតំណាងរាស្ត្រគណបក្សសង្គ្រោះជាតិ និងប្រជាជនកម្ពុជា ស្នើបង្កើតក្នុងគោលដៅ រក្សាស្ថេរភាពក្នុងជីវភាពរស់នៅ របស់កម្មករ សិស្ស និងនិស្សិត ដែលស្នាក់នៅបន្ទប់ជួល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
សេចក្តីស្នើច្បាប់ស្តីពីភតិសន្យាពិសេស ឬហៅសាមញ្ញថាសេចក្តីស្នើច្បាប់ផ្ទះជួល ត្រូវបានរដ្ឋសភាជាតិ អនុម័តជាផ្លូវការហើយ នៅព្រឹកថ្ងៃទី ០៦កក្កដានេះ ក្នុងសម័យប្រជុំសភាលើកទី៤ នីតិកាលទី៥ បន្ទាប់ពីមានការគាំទ្រដោយសម្លេង ១០២ លើ១០៤។ ច្បាប់ផ្ទះជួល ជាច្បាប់ដែលតំណាងរាស្ត្រ ក្នុងរដ្ឋសភា បានផ្តួចផ្តើមបង្កើតតាក់តែងរួមគ្នា កាលពីពេលកន្លងមក។
លោកសម រង្ស៊ី អ្នកតំណាងរាស្ត្រគណបក្សសង្គ្រោះជាតិ បានគាំទ្រ និងស្វាគមន៍ ចំពោះការអនុម័តច្បាប់នេះ ដោយលោកបានថ្លែងថា នេះគឺជាជោគជ័យដែលកើតចេញពីវប្បធម៌សន្ទនា។ ចំណែកលោកស ខេង តំណាងរាស្ត្របក្សប្រជាជនកម្ពុជា ក៏បានបញ្ជាក់ថា ច្បាប់នេះជាសមិទ្ធិផល ស្តែងចេញពីការសហការធ្វើការរួមគ្នា រវាងតំណាងរាស្ត្រនៃគណបក្សជាប់ឆ្នោតទាំងពីរ នៅក្នុងរដ្ឋសភា។
ច្បាប់ភតិសន្យា ឬច្បាប់ផ្ទះជួល មាន ៤ជំពូក ដោយចែកចេញជា ១១មាត្រា។ ច្បាប់នេះ មានគោលបំណងគ្រប់គ្រងបន្ទប់ជួល និងទំនាក់ទំនងរវាងកម្មករ សិស្ស និស្សិត ជាមួយនឹងម្ចាស់ផ្ទះ ដែលមានបន្ទប់ជួល ស្នាក់នៅ ឲ្យមានលក្ខណៈរៀបរយ។ ច្បាប់នេះ ចង់ជួយដោះស្រាយសំណូមពររបស់កម្មករ សិស្ស និងនិស្សិត ទាក់ទងនឹងតម្លៃបន្ទប់ជួល ឲ្យសមស្របទៅនឹងប្រាក់កម្រៃគោលប្រចាំខែ។
ច្បាប់នេះ ក៏ជាឧបករណ៍គិតិយុត្តមួយ ដែលផ្តល់នូវកាលានុវត្តភាពជួយជម្រុញ ដល់ការអនុវត្តគោលនយោបាយជាតិ ស្តីពីលំនៅដ្ឋាន និងរួមចំនែកទាក់ទាញការវិនិយោគពីវិស័យឯកជន ក្នុងការសាងសង់បន្ទប់ជួលមានតំលៃឈ្មួលសមរម្យ។
សូមបញ្ជាក់ថា ច្បាប់ផ្ទះជួល ត្រូវបានអនុម័តឡើង ស្របពេលដែលរដ្ឋាភិបាលកម្ពុជា បានចេញយុទ្ធនាចុះភ្ជាប់ចរន្តអគ្គិសនីដល់អ្នកជួលផ្ទះ ឬជួលបន្ទប់ ក្នុងតម្លៃអនុគ្រោះ ៦១០រៀល ក្នុងមួយគីឡូវ៉ាត់ម៉ោង សម្រាប់អ្នកប្រើក្រោម ៥០គីឡូវ៉ាត់ម៉ោង ក្នុងមួយខែ។ គិតត្រឹមចុងខែមិថុនាកន្លងទៅ អគ្គិសនីកម្ពុជា បានបញ្ជាក់ថា គេបានតភ្ជាប់ចរន្តអគ្គិសនី ដល់អ្នកជួលផ្ទះ ឬបន្ទប់ បានជាង ១១ម៉ឺនបន្ទប់ហើយ។
នៅក្នុងអណ្តត្តិទី៥នេះ រដ្ឋាភិបាល ជាពិសេសតំណាងរាស្ត្រនៃគណបក្សជាប់ឆ្នោតទាំងពីរ ហាក់ដូចជាបានយកទុកដាក់ខ្លាំង ចំពោះការសម្រួលដល់អ្នកជួលផ្ទះ ឬបន្ទប់ ដែលភាគច្រើន ជាកម្មករ និងសិស្ស និស្សិត មកពីតាមបណ្តាខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ