លោក ហ៊ុន សែន៖ ការឃោសនាមិនឲ្យពលរដ្ឋទៅបោះឆ្នោត គឺរំលោភច្បាប់ប្រទេស
លោកនាយករដ្ឋមន្រ្តី ហ៊ុន សែន នៅថ្ងៃទី ៤ ឧសភានេះ បានគូសបញ្ជាក់ជាថ្មីថា ការឃោសនាមិនឲ្យប្រជាពលរដ្ឋទៅបោះឆ្នោត គឺជាការរំលោភច្បាប់ប្រទេស ដូចមានចែងច្បាស់នៅក្នុងមាត្រា១៤២ នៃច្បាប់ស្តីពីការជ្រើសតាំងតំណាងរាស្រ្ត។ ការលើកឡើងរបស់លោកនាយករដ្ឋមន្រ្តីនៅថ្ងៃនេះ គឺទំនងជាការឆ្លើយតប ទៅនឹងការអំពាវនាវរបស់លោកសម រង្ស៊ី អតីតប្រធានគណបក្សប្រឆាំង ដែលអំពាវនាវកុំឲ្យពលរដ្ឋទៅបោះឆ្នោត។
ចុះផ្សាយនៅថ្ងៃ៖
ស្តាប់ - ០២:៥៨
ការគូសបញ្ជាក់នេះ គឺធ្វើឡើងតាមរយៈគណនីហ៊្វេសបុករបស់លោក នៅព្រឹកព្រលឹម ថ្ងៃទី ៤ ឧសភានេះ។ បើតាមលោកនាយករដ្ឋមន្រ្តី ហ៊ុន សែន ការបោះឆ្នោតជាតិនៅថ្ងៃទី ២៩ កក្កដា ខាងមុខនេះ គឺសំខាន់ខ្លាំងណាស់។ តាមរយៈសំណេរនៅលើគណនីហ្វ៊េសបុក លោកនាយករដ្ឋមន្រ្តីបានយោងមាត្រា ៣៤ នៃរដ្ឋធម្មនុញ្ញ ឆ្នាំ១៩៩៣ ដែលជាច្បាប់កំពូលរបស់កម្ពុជា។ មាត្រា៣៤នៃរដ្ឋធម្មនុញ្ញបានបញ្ជាក់ច្បាស់ អំពីសិទ្ធិជាមូលដ្ឋានរបស់ពលរដ្ឋខ្មែរទាំង២ភេទ ដែលមានសិទ្ធិបោះឆ្នោត និងមានសិទ្ធិឈរឈ្មោះបោះឆ្នោត នៅក្នុងរបបដឹកនាំប្រជាធិបតេយ្យសេរីពហុបក្ស។ ហើយការឃោសនាមិនឲ្យពលរដ្ឋទៅបោះឆ្នោត គឺជាការរំលោភច្បាប់ប្រទេសដែលបានចែងច្បាស់នៅក្នុងមាត្រា ១៤២ នៃច្បាប់ ស្តីពី ការជ្រើសតាំងតំណាងរាស្រ្ត។
មាត្រា ១៤២ នៃច្បាប់ស្តីពីការជ្រើសតាំងតំណាងរាស្រ្ត ចែងថា “ជនទាំងឡាយណាដែលប្រើប្រាស់សកម្មភាពគ្រប់មធ្យោបាយ ដូចជា រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត ការធ្វើឲ្យមានការភាន់ច្រឡំនាំឲ្យបាត់ទំនុកចិត្តលើការបោះឆ្នោត និងសកម្មភាពដែលបង្កការរំខានមិនឲ្យដំណើរការបោះឆ្នោតបាន នឹងត្រូវប្រឈមការផាកពិន័យជាប្រាក់ពី៥លានរៀល ទៅ២០លានរៀល ដោយ គជប។ នេះនៅពុំទាន់គិតដល់ទោសព្រហ្មទណ្ឌផ្សេងទៀតផង។
គួរកត់សម្គាល់ថា ការគូសបញ្ជាក់របស់លោកនាយករដ្ឋមន្រ្តី ហ៊ុន សែន ដូច្នេះ ទំនងជាធ្វើឡើងដើម្បីឆ្លើយតបទៅនឹងការអំពាវនាវរបស់អតីតប្រធានគណបក្សប្រឆាំងលោក សម រង្ស៊ី។ លោក សម រង្ស៊ី អំពាវនាវកុំឲ្យប្រជាពលរដ្ឋទៅបោះឆ្នោតនៅខែកក្កដាខាងមុខ បើគ្មានវត្តមានគណបក្សសង្រ្គោះជាតិនៅលើសន្លឹកឆ្នោតទេនោះ។ បន្ថែមលើការអំពាវនាវដូច្នេះ លោក សម រង្ស៊ី ដែលកំពុងនិរទេសខ្លួននៅក្រៅប្រទេស ក៏បានសុំឲ្យអ្នកគាំទ្រលោក បោះពុម្ពខិត្តប័ណ្ណចែកចាយដល់ពលរដ្ឋប្រាប់កុំឲ្យទៅបោះឆ្នោត។ ការអំពាវនាវនេះត្រូវបានអ្នកនាំពាក្យគណៈកម្មាធិការជាតិរៀបចំការបោះឆ្នោត លោក ឌឹម សុវណ្ណារុំ ចាត់ទុកជាការបំពានទៅលើច្បាប់ ស្តីពី ការបោះឆ្នោត ហើយអាចនាំឲ្យមានចំណាត់ការផ្លូវច្បាប់ប្រឆាំងនឹងលោក សម រង្ស៊ីផង។
ការបោះឆ្នោតជ្រើសតាំងតំណាងរាស្រ្តអាណត្តិទី៦ នឹងធ្វើឡើងនៅថ្ងៃអាទិត្យ ទី២៩ ខែកក្កដា ដោយគេរំពឹងថា នឹងមានគណបក្សនយោបាយប្រមាណជាង២០ចូលរួម។ ហើយបើគិតត្រឹមថ្ងៃទី ៤ ឧសភានេះ មានគណបក្សនយោបាយចំនួន៣ហើយ ដែលបានចុះបញ្ជីរួចរាល់នៅ គជប៖ ទី១.គឺគណបក្សយុវជនកម្ពុជា ទី២.គណបក្សប្រជាជនកម្ពុជា និងទី៣. គឺគណបក្សសញ្ជាតិកម្ពុជា។ ទន្ទឹមគ្នានេះ គណបក្សនយោបាយ៦ទៀត ក៏បានបញ្ជាក់ជំហរចូលរួមការបោះឆ្នោតរួចរាល់ហើយដែរ តាមរយៈការតម្កល់ប្រាក់១៥លានរៀលរួចរាល់នៅរតនាគាជាតិនៃកម្ពុជា ខណៈគណបក្សនយោបាយចំនួន១២ផ្សេងទៀត បានមកទទួលពាក្យដើម្បីបំពេញបែបបទចុះឈ្មោះ។ យ៉ាងណាក៏ដោយ រហូតមកទល់នឹងពេលនេះ មានគណបក្សនយោបាយចំនួន២ហើយ ដែលបានប្រកាសជំហរមិនចូលរួមការបោះឆ្នោត។ នោះគឺគណបក្សអំណាចខ្មែររបស់លោក សួង សុភ័ណ្ឌ និងគណបក្សភ្លើងទៀន អតីតគណបក្ស សម រង្ស៊ី ខណៈដែលគណបក្សប្រជាធិបតេយ្យមូលដ្ឋាន នៅមិនទាន់សម្រេចចិត្តនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ