អ្នកចូលទៅទំព័រហ្វេសប៊ុករបស់ លោក ហ៊ុន សែន និងលោក សម រង្ស៊ី ធ្លាក់ចុះ
ចំនួនអ្នកចូលទៅទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន និងលោក សម រង្ស៊ី អតីតប្រធានគណបក្សប្រឆាំង បានថយចុះ ក្នុងសប្តាហ៍ចុងក្រោយបន្ទាប់ពីហ្វេសប៊ុកដាក់សាកល្បងមុខងារថ្មីឈ្មោះថា Explore Feed។ ការសាកល្បងមុខងារថ្មីនេះ ធ្វើឡើងក្នុងប្រទេសចំនួន៦ ដែលក្នុងនោះក៏មានប្រទេសកម្ពុជាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
យោងតាមទិន្នន័យរបស់គេហទំព័រ Socialbakers បានបង្ហាញថាការធ្លាក់ចុះនេះ គឺកើតឡើងបន្ទាប់ពីគេហទំព័របណ្តាញសង្គមដ៏ធំរបស់ពិភពលោកបានដាក់ដំណើរការនូវមុខងារថ្មី កាលពីថ្ងៃទី១៩ ខែតុលា កន្លងទៅ។ ក្នុងតារាងទិន្នន័យដដែលបង្ហាញ ថាចំនួនអ្នកចុច បង្ហាញការចូលចិត្ត(Like) ការសម្តែងមតិ(Comment) និងការចែករំលែក(Share)លើអ្វី ដែលបានផ្សាយក្នុងទំព័រទាំងពីរនេះ មានការថយចុះខ្លាំង នៅពេល ដែលក្រុមហ៊ុនហ្វេសប៊ុកបានដាក់ដំណើរការសាកល្បងមុខងារថ្មីនេះ ក្នុងថ្ងៃដំបូង។
បើគិតក្នុងថ្ងៃទី២ ខែវិច្ឆកា ចំនួនអ្នកចូលមកទំព័រហ្វេសប៊ុករបស់លោក ហ៊ុន សែន មានតែប្រមាណ៨.៥ម៉ឺនប៉ុណ្ណោះ ខណៈតួលេខអ្នកចូលមកទំព័រហ្វេសប៊ុករបស់លោក មុនពេលហ្វេសប៊ុកសាកល្បងមុខងារថ្មីនេះ មានរហូតដល់ប្រមាណ១២ម៉ឺន។ ចំណែកទំព័រហ្វេសប៊ុករបស់លោក សម រង្ស៊ី គិតក្នុងថ្ងៃទី២ ខែវិច្ឆកា មានអ្នកចូលមកទំព័រហ្វេសប៊ុករបស់លោកប្រមាណ៣.៣ពាន់ ខណៈតួលេខអ្នកចូលមកទំព័រហ្វេសប៊ុករបស់លោក មុនពេលហ្វេសប៊ុកសាកល្បងមុខងារថ្មី មានរហូតដល់ប្រមាណ១១ម៉ឺនឯណោះ។
គួរជម្រាបជូនថាបើគិតមកដល់ពេលនេះ ចំនួនអ្នកចុចបង្ហាញការចូលចិត្ត(Page Like) ទំព័រហ្វេសប៊ុករបស់លោកនាយករដ្ឋមន្ត្រីហ៊ុន សែនមានប្រមាណ៨.៩លាន និងទំព័រហ្វេសប៊ុកផ្លូវការរបស់លោកសម រង្ស៊ីមានប្រមាណ៤.៤លាន។
បើតាមអ្នកនាំពាក្យបណ្តាញសង្គមហ្វេសប៊ុកមុខងារថ្មី ឬ Explore Feed បានដាក់ឲ្យសាកល្បង នៅក្នុងប្រទេសចំនួន៦ គឺមានកម្ពុជា ស្រីលង្កា បូលីវី ស្លូវ៉ាគី សឺប៊ី និងហ្គាតេម៉ាឡា។ ក្រុមហ៊ុនហ្វេសប៊ុកបញ្ជាក់ថាគេគ្មានគម្រោងបន្តពង្រីកការសាកល្បងនូវមុខងារថ្មីនេះ នៅប្រទេសផ្សេងទៀតទូទាំងពិភពលោកទេ។
Explore Feed គឺជាមុខងារថ្មីមួយទៀត ដែលហ្វេសប៊ុកបង្កើតឡើង ដើម្បីជួញអ្នកប្រើប្រាស់ឲ្យរកឃើញនូវមាតិកាជាច្រើនផ្សេងទៀតនៅក្នុងបណ្តាញសង្គមហ៊្វេសប៊ុក។ មិនតែប៉ុណ្ណោះមុខងារថ្មីនេះនឹងជ្រើសរើសប្រភេទមាតិកា ដូចជាវីដេអូ អត្ថបទ សំឡេង និងរូបភាព ដែលអាចត្រូវនឹងចំណង់ចំណូលចិត្តរបស់អ្នកប្រើប្រាស់ហ្វេសប៊ុកទៀតផង។ ប៉ុន្តែមុខងារថ្មីនេះ ត្រូវបានអ្នកប្រើប្រាស់ហ្វេសប៊ុក ដែលមានទំព័រហ្វេសប៊ុកសម្រាប់ស្ថាប័នរបស់ខ្លួនលើកឡើងថា អាចធ្វើឲ្យថយចុះចំនួនអ្នកចូលមកទំព័រហ្វេសប៊ុករបស់គេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ