មន្ត្រីប៉ូលីស៖ អគ្គិភ័យដើមឆ្នាំនេះមានលក្ខណៈធំដុំ និងបានសម្លាប់មនុស្ស៦នាក់
តូបអាជីវករប្រមាណជាង៦០០តូបត្រូវបានឆាបឆេះ ដោយសារអណ្ដាតភ្លើងឆេះផ្សារច្បារអំពៅចាប់ពីម៉ោង១២យប់មិញបន្តរហូតទល់ភ្លឺ។ មន្ត្រីជំនាញខាងពន្លត់អគ្គិភ័យបានកត់សម្គាល់ថា ការឆេះផ្សារច្បារអំពៅនេះ គឺជាករណីធំនៅដើមឆ្នាំ បូករួមនឹងករណីឆេះមជ្ឈមណ្ឌលកំសាន្តរ៉ុក ធ្វើឲ្យអគ្គិភ័យនៅដើមឆ្នាំមានរូបភាពធំដុំ និងមានមនុស្ស៦នាក់ស្លាប់។
ចុះផ្សាយនៅថ្ងៃ៖
ស្តាប់ - ០១:៤៨
អគ្គិភ័យគិតត្រឹមរយៈពេល៣ខែដើមឆ្នាំ២០១៨នេះ បានធ្វើឲ្យមនុស្ស៦នាក់ និងរបួសជាង១០នាក់។ លោកឧត្តមសេនីយ៍ នេត វណ្ណថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ នៃក្រសួងមហាផ្ទៃ បានលើកឡើងថា ចំនួនមនុស្សស្លាប់មានការកើនឡើងខ្លាំងចំពោះគ្រោះអគ្គិភ័យនៅដើមឆ្នាំ បើធៀបនឹងរយៈពេលមួយឆ្នាំ២០១៧ ដែលមានមនុស្សស្លាប់ចំនួន១៤នាក់។
ទាក់ទងទៅនឹងអគ្គិភ័យនេះ ករណីឆេះផ្សារច្បារអំពៅ និងឆេះមណ្ឌលកំសាន្តរ៉ុកត្រូវបានកត់សម្គាល់ថា ជាករណីឆេះធំដុំនៅដើមឆ្នាំនេះ។ ហើយកន្លែងទាំងពីរនេះ ពិបាកនឹងធ្វើអន្តរាគមន៍ជួយសង្គ្រោះទៀតផង។ បើតាមលោក នេត វណ្ណថា ផ្សារច្បារអំពៅកម្លាំងពន្លត់អគ្គិភ័យពិបាកនាំយកឡានទឹកទៅបាញ់ពន្លត់ភ្លើងព្រោះថា ផ្លូវមានលក្ខណៈតូចចង្អៀត បូករួមនឹងការរំខានពីពលរដ្ឋ។ ជាមួយគ្នានេះ លោក នេត វណ្ណថា ក៏បានទទួលស្គាល់ពីកង្វះខាតឧបករណ៍ទំនើបៗរបស់ក្រុមការងារពន្លត់អគ្គិភ័យ ក៏ជាផ្នែកមួយធ្វើឲ្យដំណើរការពន្លត់អគ្គិភ័យជួបបញ្ហារអាក់រអួលមិនទាន់ចិត្តដែរ នៅក្នុងករណីឆាបឆេះធំដុំបែបនេះ។
ជាដំណោះស្រាយលោក នេត វណ្ណថា បានគូសបញ្ជាក់ថា កម្លាំងពន្លត់អគ្គិភ័យកំពុងសិក្សាបន្ថែមលើជំនាញពន្លត់អគ្គិភ័យ។ ហើយលោកក៏កំពុងស្វែងរកម្ចាស់ជំនួយដើម្បីមានលទ្ធភាព រករថយន្តពន្លត់អគ្គិភ័យដែលមានលក្ខណៈទំនើបជាងរាល់ថ្ងៃ។ ចំណែកពលរដ្ឋ និងអាជ្ញាធរវិញ លោក នេត វណ្ណថា ស្នើសុំឲ្យមានការចុះទៅពន្យល់អំពីការការពារបញ្ហាអគ្គិភ័យ ហើយជាពិសេសពលរដ្ឋជាអាជីវករតែម្ដងនៅពេលសាងសង់អ្វីមួយត្រូវទុកចន្លោះផ្លូវឲ្យបានធំដើម្បីងាយស្រួលរថយន្តពន្លត់ចូលទៅអន្តរាគមន៍។
ដោយឡែក នៅថ្ងៃទី១៦មីនានេះ អគ្គិភ័យក៏បានឆាបឆេះសាលមហោស្រពអង្គរ នៅក្រុងសៀមរាបជាទ្រង់ទ្រាយធំដែរ ក៏ប៉ុន្តែគេនៅមិនទាន់មានការវាយតម្លៃនៃការខូចខាតយ៉ាងណានៅឡើយ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ