មន្ត្រីសិទ្ធិមនុស្សដែលត្រូវសន្តិសុខវាយ ត្រូវតុលាការកោះហៅទៅបំភ្លឺក្នុងនាមជាជនសង្ស័យ
នៅវេលាម៉ោង៣ រសៀលថ្ងៃស្អែកនេះ លោកអំ សំអាត ប្រធានផ្នែកឃ្លាំមើលនិងការពារសិទ្ធិមនុស្សនៃអង្គការលីកាដូ និងលោក ច័ន្ទ ពុទ្ធិស័ក្ដតំណាងសហគមន៍បឹងកក់ ត្រូវចូលទៅកាន់តុលាការក្រុងភ្នំពេញតាមការកោះហៅ ដើម្បីឆ្លើយបំភ្លឺពាក់ព័ន្ធនឹងអំពើហិង្សាកាលពីថ្ងៃទី១០ តុលា ឆ្នាំ២០១៦កន្លងទៅ។ លោកអំ សំអាត និងលោក ច័ន្ទ ពុទ្ធិស័ក្ដដែលពេលនោះ ត្រូវបានគេមើលឃើញជាទូទៅថា ត្រូវបានក្រុមសន្តិសុខវាយដំទាំងកម្រោលនោះ ត្រូវបានតុលាកោះហៅក្នុងនាមជាជនសង្ស័យទៅវិញ។
ចុះផ្សាយនៅថ្ងៃ៖
ស្តាប់ - ០២:១២
បើក្រឡេកទៅមើលរឿងរ៉ាវដែលបានកើតឡើងកាលពីថ្ងៃទី១០ ខែតុលា ឆ្នាំ២០១៦ គឺនៅពេលនោះ លោកអំ សំអាត បានទៅចូលរួមឃ្លាំមើលការដង្ហែក្បូនក្នុងទិវាសិទ្ធិលំនៅដ្ឋានពិភពលោក រីឯលោកច័ន្ទ ពុទ្ធិស័ក្តិវិញ បានទៅថតសកម្មភាពនៃព្រឹតិ្តការណ៍នោះ។ គឺនៅពេលដែលក្រុមសន្តិសុខខណ្ឌដូនពេញជាច្រើននាក់កំពុងប្រឈមមុខជាមួយក្រុមអ្នកដង្ហែក្បួននោះហើយ ក្រុមសន្តិសុខមួយក្រុមបានព្រួតគ្នាវាយទៅលើលោកអំ សំអាត និងលោកច័ន្ទ ពុទ្ធិស័ក្តិទាំងកម្រោលតែម្តងដែលបណ្តាលឲ្យរងបួសហើមប៉ោងមុខមាត់។ នេះកុំតែអ្នកចូលរួមដង្ហែក្បួនជួយឃាត់ផង កុំអីមិនដឹងជាយ៉ាងណានោះទេ។
ភ្លាមៗនោះ លោកអំ សំអាត ក៏បានដាក់ពាក្យប្តឹងនៅប៉ុស្តិ៍នគរបាលមូលដ្ឋានដែរ ដើម្បីស្វែងរកយុត្តិធម៌។ បន្ទាប់ពីស្ងាត់ឈឹងមួយរយៈ សំណុំរឿងហិង្សានេះក៏បានទៅដល់ដៃតុលាការ ហើយនៅថ្ងៃទី២០ ខែមករា តុលាការក៏បានចេញដីកាកោះហៅអ្នកទាំងពីរចូលទៅតុលាការនៅរសៀលថ្ងៃទី៨កុម្ភៈ ដែលអាចចាត់ទុកថា ជាក្តីសង្ឃឹមសម្រាប់ជនរងគ្រោះ។ តែមានឯណា ការកោះហៅនេះ ហៅទៅបំភ្លឺក្នុងនាមជាជនសង្ស័យប្រព្រឹត្តិអំពើហិង្សាទៅវិញដែលដើមបណ្ដឹងគឺជាសន្ដិសុខខណ្ឌ។
សម្រាប់លោកអំ សំអាតខ្លួនឯងលោកថា លោកហួសចិត្តរកអ្វីមកថ្លែងមិនបានបន្ទាប់ពីត្រូវបានតុលាការកោះហៅទៅបំភ្លឺក្នុងនាមជាជនសង្ស័យបែបនេះ។ ចំពោះអ្នកការពារសិទ្ធិមនុស្សយូរឆ្នាំរូបនេះ វាគឺជារឿងដ៏អាម៉ាសមួយដែលសមត្ថកិច្ចដែលកសាងសំណុំរឿងនេះ បញ្ច្រាសដំណើររឿងដូច្នេះទៅវិញ ដែលនេះនឹងធ្វើឲ្យប៉ះពាល់ដល់រដ្ឋាភិបាល និងស្ថាប័នសមត្ថកិច្ច។ លោកអំ សំអាត ក៏បានអំពាវនាវឲ្យសមត្ថកិច្ចពិនិត្យមើលសំណុំរឿងនេះឡើងវិញផងដែរ។
ចំណែកលោកថាវ គឹមសាន នាយកអង្គការលីកាដូ បានចាត់ទុកការកោះហៅអ្នកទាំងពីរនេះក្នុងនាមជាជនសង្ស័យថាបង្ហាញពីភាពលំអៀងរបស់អាជ្ញាធរប្រឆាំងទៅនឹងការជួបជុំដោយសន្ដិវិធី ដោយសារអ្នកទាំងពីរត្រូវបានក្រុមសន្ដិសុខវាយដំ ក្នុងខណៈពេលដែលអ្នកទាំងពីរព្យាយាមបញ្ចៀសកុំឲ្យអំពើហិង្សាបន្តទៀតនិងកំពុងថតសកម្មភាព។ សម្រាប់លោកថាវ គឺមសាន នេះគឺជានិទ្ទណ្ឌភាពរបស់ក្រុមសន្ដិសុខដែលបានប្រព្រឹត្តអំពើហិង្សា។
បើទោះបីហួសចិត្តនឹងការកោះហៅទៅបំភ្លឺក្នុងនាមជាជនសង្ស័យពីសំណាក់តុលាការយ៉ាងណាក៏ដោយ ក៏ទាំងលោកអំ សំអាត និងលោកច័ន្ទ ពុទ្ធិស័ក្តិ សុទ្ធតែអះអាងថា ពួកគេនឹងទៅកាន់តុលាការ ដើម្បីឆ្លើយបំភ្លឺតាមការកំណត់នៅរសៀលថ្ងៃទី៨ កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ