លោកហ៊ុន សែន ហៅរដ្ឋមន្ត្រីរបស់លោក នៅអាណត្តិថ្មីនេះថា «ខ្ញីកាន់តែចាស់ កាន់តែហិរ»
ដូចការគ្រោងទុក នៅព្រឹកថ្ងៃសុក្រនេះ លោកនាយករដ្ឋមន្ត្រីហ៊ុន សែន បានបើកកិច្ចប្រជុំលើកដំបូងនៃគណៈរដ្ឋមន្ត្រីអាណត្តិទី៦ នៅវិមានសន្តិភាព។ គណៈរដ្ឋមន្រ្តីថ្មីរបស់កម្ពុជា មិនត្រូវបាននាយករដ្ឋមន្ត្រីផ្លាស់ប្តូររដ្ឋមន្រ្តីណាមួយនោះឡើយ។ នេះ ដោយសារតែលោកហ៊ុន សែន នៅតែមានការទុកចិត្តលើរដ្ឋមន្ត្រីចាស់របស់លោកដដែល រហូតដល់លោកហៅពួកគេទាំងនេះថា “ខ្ញីកាន់តែចាស់ កាន់តែហិរ”ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
“ខ្ញីកាន់តែចាស់ កាន់តែហិរ” គឺជាងារថ្មីដែលលោកនាយករដ្ឋមន្ត្រីហ៊ុន សែន បានដាក់ឲ្យរដ្ឋមន្ត្រីចាស់របស់លោក ដែលត្រូវបានជ្រើសរើសឲ្យធ្វើជារដ្ឋមន្ត្រីថ្មីសម្រាប់អាណត្តិទី៦នេះ។ លោកនាយករដ្ឋមន្ត្រី បានបញ្ជាក់ថា មន្ត្រីចាស់ក៏នៅតែអាចធ្វើការបានដែរ មិនមែនទាល់តែមនុស្សថ្មីវ័យក្មេងនោះទេ។ លោកនាយករដ្ឋមន្ត្រី បានបញ្ជាក់ថា បញ្ហាមិនមែនស្ថិតនៅលើការដូរមនុស្សនោះឡើយ ប៉ុន្តែគឺមនុស្សដដែលនេះត្រូវចេះធ្វើកិច្ចការ ដោយដួលនៅត្រង់កន្លែងណា ត្រួវងើបឡើងវិញនៅកន្លែងហ្នឹង។
ការលើកឡើងរបស់លោកនាយករដ្ឋមន្ត្រីហ៊ុន សែន នេះ គឺជាការឆ្លើយតបទៅនឹងការរិះគន់នានា មកលើ សមាសភាពគណៈរដ្ឋមន្ត្រីថ្មី ដែលលោកនៅតែប្រើប្រាស់រដ្ឋមន្ត្រីចាស់ដដែល គឺគ្មានការផ្លាស់ប្តូរសូម្បីតែម្នាក់។ សម្រាប់អ្នករិះគន់ ការប្រើប្រាស់នូវរដ្ឋមន្ត្រីចាស់បែបនេះ គឺនឹងមិនធ្វើឲ្យប្រសិទ្ធភាពការងាររបស់រដ្ឋាភិបាលថ្មីបានប្រសើរជាងមុនឡើយ។
ប៉ុន្តែលោកនាយករដ្ឋមន្ត្រី ហ៊ុន សែន វិញ មិនយល់បែបនោះឡើយ។ លោកបានពន្យល់ថា ការកែទម្រង់មិនមែនមានន័យថា ទាល់តែដោះដូរមនុស្សនោះទេ ហើយការគិតបែបនេះ គឺជាការគិតខ្លីតែប៉ុណ្ណោះ។ លោកហ៊ុន សែន បានអះអាងទៀតថា ការកែទម្រង់ណាមួយដោយគ្រាន់តែដូរមនុស្សនោះ គឺមិនខុសពីសម្លាប់ខ្លួនឯងឡើយ។ លោកនាយករដ្ឋមន្ត្រី មិនបានខ្វល់នឹងការផ្លាស់ប្តូរមនុស្សទេ ប៉ុន្តែអ្វីដែលលោកខ្វល់ខ្វាយខ្លាំងនោះ គឺខ្លឹមសារ និងប្រសិទ្ធភាពការងារ។
សូមបញ្ជាក់ថា នៅអាណត្តិថ្មីនេះ សមាសភាពរាជរដ្ឋាភិបាលកម្ពុជា មានចំនួន៤៦រូប ដោយរាប់ទាំងនាយករដ្ឋមន្ត្រីផង។ ចំនួននេះ គឺមិនរាប់បញ្ចូលនូវឧបនាយករដ្ឋមន្ត្រី និងទេសរដ្ឋមន្ត្រី មួយចំនួន ដែលមិនកាន់ស្ថាប័នឡើយ។ សមាសភាពរាជរដ្ឋាភិបាលកម្ពុជាទាំង៤៦រូបនេះ កាន់កាប់ក្រសួងចំនួន២៨ រដ្ឋលេខាធិការដ្ឋានមួយ និងស្ថាប័នផ្សេងទៀតរបស់រដ្ឋាភិបាល។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ការបង្កើតរដ្ឋាភិបាលថ្មីនេះ គឺកើតចេញមកពីជោគជ័យរបស់គណបក្សប្រជាជនកម្ពុជា ហើយជោគជ័យនេះ កើតចេញពីការរួមចំណែកពីរដ្ឋមន្ត្រីទាំងអស់។ ដូច្នេះ នៅពេលដែលឈ្នះហើយស្រាប់តែបោះបង់រដ្ឋមន្ត្រីទាំងនោះចោល គឺជារឿងអគុណធម៌ណាស់សម្រាប់រូបលោក។ ចំពោះលោកនាយករដ្ឋមន្ត្រី ការដោះដូរមនុស្សចាស់ ដាក់មនុស្សថ្មី មិនមែនជាទម្លាប់របស់លោកឡើយ។ ប៉ុន្តែការរក្សាមនុស្សចាស់ ហើយបញ្ចូលមនុស្សថ្មីឲ្យធ្វើការជាមួយ ទើបជាទម្លាប់របស់លោកដោយលោកអះអាងថា វាគឺជារឿងចាំបាច់ណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ