លោក ហ៊ុន សែន និង អ្នកពាក់ព័ន្ធត្រៀមជួបគ្នាដើម្បីមូលមាត់ឈានទៅអភិរក្សធនធានធម្មជាតិរួមគ្នា
លោកនាយករដ្ឋមន្ត្រី ហ៊ុន សែន នៅថ្ងៃចន្ទស្អែកនេះនឹងអញ្ជើញចូលរួមក្នុងវេទិកាស្តីពីការការពារនិងអភិរក្សធនធាន ធម្មជាតិ នាវិមានសន្តិភាព។ ជាវេទិការថ្នាក់ជាតិធ្វើឡើងជាលើកដំបូងបន្ទាប់ពីប្រមុខរដ្ឋាភិបាល លោក ហ៊ុន សែន ប្រកាសឲ្យសកម្មជនបរិស្ថាន អង្គការសង្គមស៊ីវិលនិងស្ថាប័នរដ្ឋធ្វើការរួមគ្នាក្នុងទិសដៅតែមួយគឺជួយ ការពារ និងអភិរក្សធនធានធម្មជាតិ។ បើតាមគម្រោងវេទិកានាស្អែកនេះបើកឱកាសឲ្យអ្នកចូលរួមលើកជាសំណូមពរនិងកង្វល់នៅចំពោះមុខប្រមុខរដ្ឋាភិបាលដើម្បីមូលមាត់គ្នាក្នុងការអភិរក្សធនធានធម្មជាតិ។
ចុះផ្សាយនៅថ្ងៃ៖
ស្តាប់ - ០១:៤៤
សកម្មជនល្បីៗដែលធ្លាប់ចេញមុខការពារបរិស្ថានតាមរយៈការ អភិរក្សធនធានធម្មជាតិត្រូវបានអញ្ជើញឲ្យចូលរួមនៅក្នុងវេទិកា ស្ដីពីការការពារនិងអភិរក្សធនធានធម្មជាតិ។
ក្នុងនោះរួមមានៈ ព្រះតេជគុណ ប៊ុត ប៊ុនតិញ ប្រធានអង្គការព្រះពុទ្ធសាសនា ដើម្បីសន្តិភាព និងជាស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម។ ព្រះអង្គនឹងនិមន្តចូលរួមនៅក្នុងវេទិកាដែលរៀបចំឡើងនាស្អែកនេះ។
ព្រះអង្គចាត់ទុកវេទិកានេះមានលក្ខណៈនយោបាយបន្តិច។ ប៉ុន្តែព្រះអង្គចង់យកឱកាសនេះជជែកអំពីបញ្ហាមួយចំនួនទាក់ទិនការ បំផ្លិចបំផ្លាញបរិស្ថានធម្មជាតិដ៏ធ្ងន់ធ្ងរនៅកម្ពុជានិងទាមទារឲ្យ មានការប្ដេជ្ញាការពារបរិស្ថានពីរដ្ឋមន្ត្រីនិងអាជ្ញាធរពាក់ព័ន្ធ លើធនធានធម្មជាតិនិងព្រៃឈើ ដែលនៅសេសសល់។
ក្រៅពីព្រះអង្គ ប៊ុត ប៊ុនតិញ ក្រសួងបរិស្ថានក៏បានអញ្ជើញ លោក សួន ប៊ុនសាក់ អគ្គលេខាធិការគណៈកម្មាធិការប្រព្រឹត្តកម្មនៃអង្គការការពារសិទ្ធិ មនុស្សកម្ពុជា។
លោក អ៊ូច ឡេង ម្ចាស់ជ័យលាភីរង្វាន់វីរជនបរិស្ថាន Goldman Environmental Prize ប្រចាំឆ្នាំ២០១៦ និង កញ្ញា ធី សុវណ្ណថា ជាដើម។ ប៉ុន្តែ លោក អ៊ូច ឡេង មិនបានចូលរួមនោះទេព្រោះជាប់លោកបំពេញការងារនៅក្រៅប្រទេស។
បន្ថែមពីលើនេះទៀតក៏នឹងមានការចូលរួមពីខាងភាគីស្ថាប័នជាតិរួមមានៈ សមាជិកព្រឹទ្ធសភា សមាជិករដ្ឋសភា សមាជិករាជរដ្ឋាភិបាល តំណាងក្រសួង ស្ថាប័នរដ្ឋ អង្គទូត ដៃគូអភិវឌ្ឍន៍ អង្គការមិនមែនរដ្ឋាភិបាល និង សិល្បៈករ។
ថ្លែងប្រាប់វិទ្យុបារាំង លោក សៅ សុភាព អ្នកនាំពាក្យក្រសួងបរិស្ថានលើកឡើងថា គ្រប់អ្នកពាក់ព័ន្ធដែលចូលរួមក្នុងវេទិកាស្ដីពីការការពារនិង អភិរក្សធនធានធម្មជាតិពួកគេនឹងមានឱកាសស្ដាប់ការប្ដេជ្ញាចិត្តរបស់ រដ្ឋាភិបាលក្នុងការការពារនិងអភិរក្សធនធានធម្មជាតិនៅកម្ពុជា។ ហើយវេទិកានេះនឹងមានវគ្គសំណួរចម្លើយនិងសំណូមពរផ្សេងៗពីអ្នកចូល រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ