លោក ហ៊ុន សែន និងមន្ត្រីសំខាន់ៗរបស់កម្ពុជា ទៅគោរពវិញ្ញាណក្ខន្ធសពអតីតប្រធានាធិបតីវៀតណាមមុនទៅប្រជុំនៅអង្គការសហប្រជាជាតិ
ប្រមុខរដ្ឋាភិបាលកម្ពុជា រួមទាំងមន្ត្រីសំខាន់ៗក្នុងជួររដ្ឋាភិបាលនៅថ្ងៃទី២៦ ខែកញ្ញានេះ បានចូលរួមគោរពវិញ្ញាណក្ខន្ធសពអតីតប្រធានាធិបតីវៀតណាម ដែលទទួលមរណៈភាពកាលពីថ្ងៃទី២១ ខែកញ្ញា។ ដំណើរទៅប្រទេសវៀតណាមឥតព្រាងទុករបស់មេដឹកនាំកម្ពុជា នាពេលនេះធ្វើឡើង មុនគម្រោងដែលបានគ្រោងទុកចេញទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០៨
មេដឹកនាំកម្ពុជា ដែលរួមមានលោកនាយករដ្ឋមន្ត្រី ហ៊ុន សែន លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ លោកស្រីឧបនាយករដ្ឋមន្ត្រី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងមន្រ្តីជាន់ខ្ពស់មួយចំនួនទៀត នៃរាជរដ្ឋាភិបាលកម្ពុជា បានទៅដល់ប្រទេសវៀតណាម នាថ្ងៃទី២៦ ខែកញ្ញានេះ ដើម្បីចូលរួមគោរពវិញ្ញាណក្ខន្ធសព លោក ត្រាន់ ដាយក្វាង ( Tran Dai Quang) អតីតប្រធានាធិបតីនៃសាធារណរដ្ឋសង្គមនិយមវៀតណាម ដែលបានទទួលមរណៈភាព កាលពីថ្ងៃទី២១ ខែកញ្ញា ឆ្នាំ ២០១៨ទៅទីក្រុងហាណូយ។
លោកនាយករដ្ឋមន្ត្រី ហ៊ុន សែន តាមរយៈសារលិខិតរំលែកទុក្ខ កាលពីថ្ងៃទី២១ ខែកញ្ញា ចាត់ទុកមរណៈភាពរបស់លោក ត្រាន់ ដាយក្វាងនេះ គឺជាការបាត់បង់ដ៏ធំធេងនៃថ្នាក់ដឹកនាំដ៏ល្អ និងគួរឲ្យកោតសរសើរម្នាក់របស់ប្រទេសវៀតណាម និងប្រជាជនវៀតណាម និងជាការបាត់បង់មិត្តដ៏ល្អរបស់កម្ពុជា។ លោកនាយករដ្ឋមន្ត្រី ហ៊ុន សែន បានសម្តែងនូវសមានចិត្ត និងការចូលរួមរំលែកទុក្ខដ៏ក្រៀមក្រំបំផុតជូនចំពោះរដ្ឋាភិបាល និងប្រជាជនវៀតណាម។
តាមប្រព័ន្ធផ្សព្វផ្សាយរដ្ឋ វៀតណាម ប្រមុខរដ្ឋវៀតណាម បានទទួលអនិច្ចកម្ម នៅក្នុងអាយុ ៦១ឆ្នាំ ដោយសារជំងឺដ៏ធ្ងន់ធ្ងរ កាលពីថ្ងៃទី២១ ខែកញ្ញា នៅក្នុងមន្ទីរពេទ្យ នាទីក្រុងហាណូយ។ ប្រធានាធិបតីវៀតណាមបានលាចាកលោកទៅ ដោយបន្សល់នូវ កេរ្តិ៍ឈ្មោះ ជាមេដឹកនាំ ដែលបញ្ជាឲ្យមានការបង្រ្កាប ចាប់ដាក់ពន្ធនាគារ ក្រុមប្រឆាំង ហើយ និងក្រុមសកម្មជនសិទ្ធិមនុស្ស។ នេះបើតាមអង្គការការពារសិទ្ធិមនុស្ស។
ដំណើរទៅប្រទេសវៀតណាមរបស់ប្រមុខរដ្ឋាភិបាលកម្ពុជា គឺធ្វើឡើងមួយថ្ងៃមុនពេលលោកធ្វើដំណើរទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ ដែលកម្ពុជាមានតួនាទីដ៏សំខាន់ជាអនុប្រធាននៃមហាសន្និបាត។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា លោកនាយករដ្ឋមន្ត្រីហ៊ុន សែន ត្រូវអញ្ជើញចូលរួមមហាសន្និបាតអង្គការសហប្រជាជាតិ និងកិច្ចប្រជុំពាក់ព័ន្ធផ្សេងៗពីថ្ងៃទី២៥ ដល់ថ្ងៃទី២៩ ខែកញ្ញា នៅទីក្រុងញូវយ៉ក។ ប៉ុន្តែបើតាមការបញ្ជាក់របស់លោកនាយករដ្ឋមន្ត្រីជាថ្មី នៅតាមទំព័រហ្វេសប៊ុក លោកនឹងធ្វើដំណើរទៅក្រុងញូវយ៉កនៅថ្ងៃទី២៧ ខែកញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ