លោក ហ៊ុន សែន៖ មនុស្សខ្លាំងដូច លោក គួច ចំរើន សមដឹកនាំខេត្តព្រះសីហនុ
លោកនាយករដ្ឋមន្ត្រី ហ៊ុន សែន បានផ្ដល់សេចក្ដីទុកចិត្តដល់ លោក គួច ចំរើន ថាជាមនុស្សខ្លាំង ដោយផ្ទេរពីអភិបាលខេត្តកំពង់ចាម មកកាន់តំណែងជាអភិបាលខេត្តព្រះសីហនុជំនួស លោក យន្ត មីន។ ពីអភិបាលខណ្ឌដែលគ្រប់គ្រងផ្នែកមួយនៃទីក្រុងភ្នំពេញ ក្លាយជាអភិបាលខេត្តព្រះសីហនុ លោក គួច ចំរើន ជានរណា ហើយមានប្រវត្តិការងារនិងការសិក្សាបែបណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
មុនក្លាយជាអភិបាលខេត្តកំពង់ចាម ហើយផ្ទេរមកជាអភិបាលខេត្តព្រះសីហនុ លោក គួច ចំរើន ធ្លាប់កាន់ការងារមួយចំនួននៅរាជធានីភ្នំពេញ។ ពីឆ្នាំ១៩៩៨ដល់ឆ្នាំ១៩៩៩ លោកគួច ចំរើន ជាបុគ្គលិកចាត់តាំងសាលាខណ្ឌចំការមន។ ពីឆ្នាំ១៩៩៩ដល់ឆ្នាំ២០០៤ លោកគួច ចំរើន ជាអភិបាលរងខណ្ឌចំការមន ហើយនៅក្នុងឆ្នាំ២០០៤ លោក គួច ចំរើន ជាអភិបាលខណ្ឌមានជ័យនិងឆ្នាំ២០១៤ដល់ឆ្នាំ២០១៦ជាអភិបាលខណ្ឌដូនពេញ។ ក្រោយមកទៀតនៅចុងឆ្នាំ២០១៦ មកដល់បច្ចុប្បន្នជាអភិបាលខេត្តកំពង់ចាម ដែលបន្ថែមលើមុខងារបច្ចុប្បន្នជាអគ្គនាយករងរដ្ឋបាលនៃក្រសួងមហាផ្ទៃ។
មុនកាន់ការងារទាំងនេះ នៅឆ្នាំ១៩៩០ លោកចំរើន បានចូលរៀននៅមហាវិទ្យាល័យបច្ចេកទេសកងទព័ ប្រទេសវៀតណាម ក្រោយមកនៅឆ្នាំ១៩៩៣ បានសិក្សាបន្តនៅមហាវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ចដោយទទួលបានបរិញ្ញាបត្រវិទ្យាសាស្ត្រសេដ្ឋកិច្ច ។ នៅថ្ងៃទី០១ខែតុលាឆ្នាំ២០០៤ បានចូលសិក្សានៅសាកលវិទ្យាល័យនីតិសាស្ត្រនិងវិទ្យាសាស្ត្រសេដ្ឋកិច្ចទទួលបានបរិញ្ញាបត្រជាន់ខ្ពស់រដ្ឋបាលសាធារណៈនៅថ្ងៃទី០១ខែសីហាឆ្នាំ២០១៧។
កើតនៅឆ្នាំ១៩៧២ នៅភូមិតាព័រលើ ឃុំពង្រក្រោម ស្រុកជីក្រែង ខេត្តសៀមរាប លោកគួច ចំរើន ជាកូនទី៤ នៃបងប្អូនទាំង៥នាក់។ បច្ចុប្បន្នលោក គួច ចំរើន មានវ័យ៤៧ឆ្នាំ។
សូមជម្រាបជូនថា នៅសល់ពេលតែ៤ថ្ងៃទៀតទេ ពោលគឺនៅថ្ងៃទី២៩ខែមិថុនា លោក គួច ចំរើន ដែលផ្ទេរចេញពីអភិបាលខេត្តកំពង់ចាម នឹងចូលកាន់តំណែងអភិបាលខេត្តព្រះសីហនុ ជាផ្លូវការ។ «ខេត្តព្រះសីហនុត្រូវការមនុស្សខ្លាំងដូច គួច ចំរើន មកគ្រប់គ្រង» នេះជាការលើកសសើរបស់លោកនាយករដ្ឋមន្ត្រី ហ៊ុន សែន ទៅកាន់លោក គួច ចំរើន។
គួរឲ្យកត់សម្គាល់ដែរថា មហាជនមួយចំនួនសាទរបន្ទាប់ពីលោកនាយករដ្ឋមន្ត្រី ហ៊ុន សែន ដាក់បេក្ខភាពលោក គួច ចំរើន ជាអ្នកគ្រប់គ្រងខេត្តព្រះសីហនុ។ ខេត្តព្រះសីហនុដែលបញ្ហាដើរទន្ទឹមនឹងការអភិវឌ្ឍត្រូវបានគេមើលឃើញថា ជាបន្ទុកមួយធ្ងន់ធ្ងរចំពោះលោក គួច ចំរើនដែលទទួលបានងារជាមនុស្សខ្លាំងពីលោក ហ៊ុន សែន ក្នុងការស្ដារមុខមាត់ខេត្តខ្មែរមួយនេះឡើងវិញ។ ទន្ទឹមនឹងការស្វាគមន៍មហាជនកំពុងរងចាំមើលថា ក្រោមការដឹកនាំរបស់លោក គួច ចំរើន ខេត្តព្រះសីហនុ ប្រែមុខមាត់និងកេរ្តិ៍ឈ្មោះថ្មីបានកម្រិតណា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ