លោក ហ៊ុន សែន អះអាងថាគ្មានលុយទិញអ្នកសុំសិទ្ធិធ្វើនយោបាយ មកពីអតីតបក្សប្រឆាំងនោះទេ
ប្រមុខរដ្ឋាភិបាលកម្ពុជា នៅថ្ងៃពុធនេះ បានអះអាងថា លោកគ្មានលុយទៅទិញក្រុមមន្រ្តីអតីតគណបក្សប្រឆាំងម្នាក់ៗចន្លោះពី១០ទៅ២០ម៉ឺនដុល្លារ ដើម្បីឲ្យពួកគេដាក់ពាក្យសុំសិទ្ធិធ្វើនយោបាយឡើងវិញនោះទេ។ ការអះអាងនេះធ្វើឡើងស្របដែល មន្រ្តីអតីតគណបក្សសង្រ្គោះជាតិចំនួន៥រូបទៀត បានទទួលសិទ្ធិធ្វើនយោបាយឡើងវិញកាលពីម្សិលមិញ ដែលធ្វើឲ្យចំនួនអ្នកបានសិទ្ធិធ្វើនយោបាយឡើងវិញកើនឡើងដល់ចំនួន៩នាក់ ក្នុងចំណោមអ្នកនយោបាយចំនួន១១៨រូបដែលត្រូវបានហាមឃាត់។
ចុះផ្សាយនៅថ្ងៃ៖ កែប្រែថ្ងៃទី៖
ពីខេត្តពោធិ៍សាត់ ក្នុងជំនួបជាមួយកម្មករ លោកនាយករដ្ឋមន្រ្តី ហ៊ុន សែន បានអះអាងថា ការដែលអតីតមន្រ្តីបក្សប្រឆាំងដែលសុំសិទ្ធិធ្វើនយោបាយឡើងវិញ គឺជាសិទ្ធិរបស់អ្នកទាំងនោះ សូមកុំភ្ជាប់រឿងនេះជាមួយលោកឲ្យសោះ ខណៈដែលលោកអះអាងថា លោកគ្មានលុយទិញ អ្នកដែលសុំសិទ្ធិធ្វើនយោបាយឡើងវិញពី ១០-២០ម៉ឺនដុល្លារក្នុងម្នាក់នោះទេ។
បើតាមលោកប្រមុខបក្សកាន់អំណាច សមាជិកគណបក្សប្រជាជនកម្ពុជា មួយចំនួនក៏បានដើរចេញពីគណបក្សរបស់លោកដែរ តែគណបក្សចាស់វស្សាមួយនេះមិនដែលមើលស្រាល ឬជេរបុគ្គលទាំងនោះឡើយ។
នៅក្នុងបទសម្ភាសជាមួយវិទ្យុបារាំងអន្តរជាតិ RFI លោក អេង ឆៃអ៊ាង អនុប្រធានអតីតគណបក្សសង្រ្គោះជាតិបានចាត់ទុកអ្នកដែលសុំសិទ្ធិធ្វើនយោបាយឡើងវិញពីលោក ហ៊ុន សែន ជាមនុស្សមិនចេះអត់ធ្មត់ និងអន់ជាងសកម្មជន នៅតាមមូលដ្ឋានទៅទៀត ដែលមិនព្រមចុះចូលជាមួយគណបក្សកាន់អំណាច។
បើតាម លោក អេង ឆៃអ៊ាង អ្នកដែលសុំសិទិ្ធធ្វើនយោបាយឡើងវិញ គឺជាមនុស្សមិនស្មោះត្រង់នឹងលោក កឹម សុខា ដែលសុខចិត្តជាប់ការឃុំឃាំង និងថាក៏មិនស្មោះត្រង់នឹងពលរដ្ឋជាម្ចាស់ឆ្នោតដែលបានគាំទ្រកន្លងមកយ៉ាងដូច្នោះដែរ។
សូមបញ្ជាក់ថា គិតត្រឹមថ្ងៃទី២០ខែមីនា គឺមានមន្រ្តីអតីតគណបក្សសង្រ្គោះជាតិចំនួន៩រូប ក្នុងចំណោម១១៨រូប ដែលទទួលបានសិទ្ធិធ្វើនយោបាយឡើងវិញ ខណៈក្រសួងមហាផ្ទៃអះអាងថានឹងមានមន្រ្តីអតីតគណបក្សប្រឆាំង២៥ទៅ២៦នាក់ សុំសិទ្ធិធ្វើនយោបាយឡើងវិញ។
អតីតថ្នាក់ដឹកនាំបក្សប្រឆាំងទាំងនេះ រួមមាន លោក គង់ គាំ អតីតទីប្រឹក្សាជាន់ខ្ពស់គណបក្សសង្រ្គោះជាតិ លោក គង់ បូរ៉ា លោក រៀល ខេមរិន្ទ លោក អ៊ូ ច័ន្ទរ័ត្ន លោកស្រី ទេព សុទ្ធី លោក កង គឹមហាក់ លោក ជីវ កត្តា លោក ច័ន្ទ សិលា និងលោក ស៊ីម សុវណ្ណនី ដែលពួកគេភាគច្រើនជាអតីតតំណាងរាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ