គណបក្សកាន់អំណាចចេញលិខិតក្រើនរំឭកពីវប្បធម៌សន្ទនាដល់គណបក្សប្រឆាំង
គណបក្សប្រជាជនកម្ពុជាទើបបានចេញលិខិតមួយក្រើនរំឭកដល់មេដឹកនាំគណបក្សដៃគូសន្ទនារបស់ខ្លួនគឺគណបក្សសង្គ្រោះជាតិ ឲ្យគោរពតាមគោលការណ៍នៃវប្បធម៌សន្ទនា។ វប្បធម៌សន្ទនាដែលគណបក្សទាំងពីរសុទ្ធតែឲ្យតម្លៃថា មានសារៈសំខាន់ខ្លាំងណាស់សម្រាប់ការដឹកនាំប្រទេសកម្ពុជាឲ្យរីកចម្រើនទៅមុខបាន ហើយមានឆន្ទនៈថានឹងបន្តអនុវត្តវប្បធម៌សន្ទនានេះឲ្យបានយូរអង្វែង។
ចុះផ្សាយនៅថ្ងៃ៖
ស្តាប់ - ០១:២១
គណបក្សប្រជាជនកម្ពុជាបានចេញលិខិតមួយកាលពីថ្ងៃទី៥ មេសា កន្លងទៅនេះ ជម្រាបជូនដល់ប្រធានគណៈកម្មាធិការគណបក្សរាជធានី ខេត្តរបស់ខ្លួន ឲ្យតាមដានស្តាប់និងកត់ត្រាឲ្យបានច្បាស់នូវការបំពានដោយបន្តជេរប្រមាថ មកលើគណបក្សនិងថ្នាក់ដឹកនាំបក្ស។ នៅក្នុងលិខិតនោះបានបញ្ជាក់ពីពាក្យជេរប្រមាថទាំងអស់នោះមានដូចជា អាក្បាលយួនខ្លួនខ្មែរ ពួកកុម្មុយនីស្តផ្តាច់ការ អាយ៉ងយួន ពួកអាក្បត់ជាតិ ពួកអាលក់ជាតិ អាមេចោរ និងភាសាជេរប្រមាថផ្សេងទៀត។
លោកសួស យ៉ារ៉ា អ្នកនាំពាក្យគណបក្សប្រជាជនកម្ពុជាបានបញ្ជាក់ប្រាប់វិទ្យុបារាំងថា គណបក្សកាន់អំណាចចេញលិខិតនេះ គ្រាន់តែចង់ក្រើនរំលឹកដល់ថ្នាក់ដឹកនាំ «គណបក្សដៃគូសន្ទនារបស់ខ្លួនគឺគណបក្សសង្គ្រោះជាតិឲ្យបន្តគោរពវប្បធម៌សន្ទនា ដែលជាវប្បធម៌មួយស្តែងពីការគោរពសិទ្ធិគ្នាទៅវិញទៅមក។ លោកបានបន្តថា គណបក្សប្រជាជនកម្ពុជាចង់ឲ្យ នឹងចង់ឃើញវប្បធម៌សន្ទនានេះរស់បានយូរអង្វែង ព្រោះវាជាគ្រោងឆ្អឹងដ៏សំខាន់ក្នុងការដឹកនាំប្រទេសកម្ពុជាទៅរកភាពរីកចម្រើន។
ជាមួយគ្នានេះដែរ លោកយ៉ែម ប៉ុញ្ញារិទ្ធិ អ្នកនាំពាក្យគណបក្សសង្រ្គោះជាតិបានលើកឡើងថា កន្លងមកនិងរហូតមកទល់នឹងពេលនេះ គណបក្សសង្រ្គោះជាតិតែងតែគោរព លើវប្បធម៌សន្ទនានេះ ហើយក៏បានប្រាប់ដល់សមាជិករបស់ខ្លួននៅតាមមូលដ្ឋាននានាមិនត្រូវប្រើពាក្យមិនសមរម្យនោះដែរ។ ប៉ុន្តែលោកបានបញ្ជាក់ថា ប្រសិនបើសង្កេតឃើញថាមានភាពអសកម្មអ្វីមួយនោះ គណបក្សសង្រ្គោះជាតិនឹងធ្វើការរិះគន់ ក្នុងន័យស្ថាបនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ