អ្នកច្បាប់ថា លោក ហ៊ុន សែន អាចប្តឹងទារជំងឺចិត្តច្រើនជាង ១លានដុល្លារពីលោក សម រង្ស៊ី
លោកនាយករដ្ឋមន្រ្តី ហ៊ុន សែន បានព្រមានប្តឹងបង្កកយកទ្រព្យសម្បត្តិលោក សម រង្ស៊ី ព្រមទាំងរឹបអូសយកទីស្នាក់ការគណបក្សប្រឆាំងផង តាមរយៈពាក្យបណ្តឹងជាច្រើនដែលកំពុងស្ថិតនៅក្នុងដៃរបស់តុលាការ។ បណ្តឹងមួយក្នុងចំណោមបណ្តឹងយ៉ាងតិច ៨ដែលកំពុងប្រឆាំងលោក សម រង្ស៊ី ត្រូវបានតុលាការកោះហៅដើមបណ្តឹង គឺកញ្ញា ធី សុវណ្ណថា ឲ្យទៅឆ្លើយបំភ្លឺនៅថ្ងៃនេះ ដោយបានបង្កើនទាមទារប្រាក់សំណងជំងឺចិត្ត ពី ២៥ម៉ឺនដុល្លារ ដល់ ៥០ម៉ឺនដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:២៤
អ្នកច្បាប់ខ្លះបានអះអាងថា តាមច្បាប់ក្រមព្រហ្មទណ្ឌកម្ពុជា លោកនាយករដ្ឋមន្រ្តី ហ៊ុន សែន មិនអាចប្តឹងទាមទារសំណងជំងឺចិត្តពីលោក សម រង្ស៊ី លើសពី ១០លានរៀលនោះទេ។ ព្រោះបើយោងតាមមាត្រា ៣០៥ នៃក្រមព្រហ្មទណ្ឌព្រះរាជាណាចក្រកម្ពុជាបានចែងពីការបង់ប្រាក់ពិន័យត្រឹមតែ ១០ម៉ឺនរៀលយ៉ាងតិច និង ១០លានរៀលយ៉ាងច្រើន។ ដូច្នេះ តុលាការមិនអាចកាត់ក្តីលើសពីការចែងនៅក្នុងច្បាប់នេះឡើយ។ ប៉ុន្តែក្រុមមេធាវី និងអ្នកច្បាប់រដ្ឋាភិបាលកម្ពុជាបានអះអាងថា ទឹកប្រាក់នោះ គ្រាន់តែជាការពិន័យចូលរដ្ឋតែប៉ុណ្ណោះ ពោលគឺមិនគិតបញ្ចូលប្រាក់សំណងរដ្ឋប្បវេណីដែលជាតម្លៃនៃការខូចខាត ឬប៉ះពាល់ដល់កិត្តិយស និងសេចក្តីថ្លៃថ្នូរ របស់បុគ្គលជាដើមបណ្តឹងនោះឡើយ។
លោក គី តិច មេធាវីការពារក្តីលោកនាយករដ្ឋមន្រ្តី ហ៊ុន សែន បានលើកឡើងថា បណ្តឹងរបស់លោកនាយករដ្ឋមន្រ្តី ហ៊ុន សែន ទាមទារ ១លានដុល្លារពីលោក សម រង្ស៊ី គឺជាបណ្តឹងទាមទារសំណងជំងឺចិត្ត ដែលលោកយល់ថា ការលើកឡើងរបស់លោក សម រង្ស៊ី បានធ្វើឲ្យប៉ះពាល់ធ្ងន់ធ្ងរ ដល់កិត្តិយស និងសេចក្តីថ្លៃថ្នូររបស់លោកក្នុងនាមជាប្រមុខរដ្ឋាភិបាលកម្ពុជា។
ចំណែកលោក គឹម សន្តិភាព អ្នកនាំពាក្យក្រសួងយុត្តិធម៌ បានលើកឡើងថា តាមច្បាប់កម្ពុជា មិនមានការចែងពីការកំណត់ប្រាក់សំណងជំងឺចិត្តនោះទេ តែការកាត់សេចក្តីយ៉ាងណានោះ គឺវាអាស្រ័យទៅលើឆន្ទានុសិទ្ធិរបស់ចៅក្រម ដែលនឹងធ្វើសេចក្តីសម្រេចចិត្តដោយផ្អែកទៅលើទំហំនៃការខូចខាត ឬប៉ះពាល់ដល់កិត្តិយសរបស់ភាគីជាដើមបណ្តឹង។
យ៉ាងណាក៏ដោយ លោកមេធាវី សុខ សំអឿន ប្រធានក្រុមអ្នកច្បាប់ការពារសិទ្ធិមនុស្សកម្ពុជា បានចាត់ទុកថា បណ្តឹងរបស់លោកនាយករដ្ឋមន្រ្តី ហ៊ុន សែន ទាមទារសំណងជំងឺចិត្ត ១លានដុល្លារពីលោក សម រង្ស៊ី នោះ អាចចាត់ទុកថា ជាបណ្តឹងទី ១ហើយ នៅក្នុងប្រវត្តិសាស្រ្តកម្ពុជា។
លោក សម រង្ស៊ី ប្រធានគណបក្សសង្រ្គោះជាតិដែលកំពុងរស់នៅឯបរទេស ត្រូវបានតុលាការកាត់ទោសឱ្យជាប់ពន្ធនាគារ ២ឆ្នាំពីបទបរិហាកេរ្តិ៍លោកឧបនាយករដ្ឋមន្រ្តី ហោ ណាំហុង អតីតរដ្ឋមន្រ្តីការបរទេសកម្ពុជា និងត្រូវបានតុលាការកាត់ទោសឱ្យជាប់ពន្ធនាគារ ៥ឆ្នាំទៀត កាលពីចុងឆ្នាំ ២០១៦ ពាក់ព័ន្ធនឹងករណីក្លែងឯកសារព្រំដែនកម្ពុជា-វៀតណាម។ រហូតមកដល់ពេលនេះ លោក សម រង្ស៊ី បានរងបណ្តឹងចំនួន៨ករណីហើយ។ ហើយបណ្តឹងមួយក្នុងចំណោមបណ្តឹងយ៉ាងតិច ៨ដែលកំពុងប្រឆាំងនឹងប្រធានគណបក្សប្រឆាំងរូបនេះ ត្រូវបានតុលាការកោះហៅភាគីដើមបណ្តឹង គឺកញ្ញា ធី សុវណ្ណថា ទៅសាកសួរនៅថ្ងៃនេះ ដោយបាន បង្កើនការទាមទារប្រាក់សំណងជំងឺចិត្តពីលោក សម រង្ស៊ី ពី ២៥ម៉ឺនដុល្លារ ដល់ ៥០ម៉ឺនដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ