លោក ហ៊ុន សែន ចេញទៅប្រជុំសំខាន់ពីរនៅអឺរ៉ុប ចំពេលមានកិច្ចដំណើរការដក EBA ពីកម្ពុជា
លោកនាយករដ្ឋមន្ត្រី ហ៊ុន សែន កាលពីវេលាម៉ោង១២និង២០នាទីយប់មិញនេះ បានដឹកនាំគណៈប្រតិភូ ចាកចេញពីប្រទេសកម្ពុជា ដើម្បីទៅចូលរួមកិច្ចប្រជុំចំនួនពីរនៅអឺរ៉ុប ដែលនឹងធ្វើឡើងចាប់ពីថ្ងៃទី ១៨ ដល់ថ្ងៃទី ២៤ តុលា។ ដំណើរចេញទៅប្រជុំនៅអឺរ៉ុបជាលើកដំបូងរបស់លោកនាយករដ្ឋមន្ត្រី ហ៊ុន សែន នៅក្នុងអាណត្តិទី៦នេះ ធ្វើឡើងចំពេលមានកិច្ចដំណើរការដកប្រព័ន្ធអនុគ្រោះពន្ធ ឬ EBA ពីប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:៥៧
នៅក្នុងដំណើរទៅចូលរួមកិច្ចប្រជុំនៅអឺរ៉ុបជាលើកដំបូងនេះ ប្រមុខរដ្ឋាភិបាលកម្ពុជា លោក ហ៊ុន សែន នឹងចូលរួមកិច្ចប្រជុំសំខាន់ៗចំនួនពីរ។ ទី១ គឺកិច្ចប្រជុំកំពូលអាស៊ីអឺរុប ASEM លើកទី១២ ដែលនឹងប្រព្រឹត្តទៅចាប់ពីថ្ងៃទី ១៨ ដល់ថ្ងៃទី ១៩ តុលា នៅទីក្រុងព្រុចហ្សែល ប្រទេសប៊ែលហ្ស៊ិក។ កិច្ចប្រជុំនេះ ធ្វើឡើងក្នុងគោលបំណង ដើម្បីពង្រឹងកិច្ចសន្ទនា និងកិច្ចសហប្រតិបត្តិការរវាងតំបន់អាស៊ីនិងអឺរ៉ុប ខណៈដែលតំបន់ទាំងពីរនេះ នឹងជំរុញការកសាងកម្លាំងរួមគ្នា ដើម្បីដោះស្រាយបញ្ហាជាច្រើន ចាប់ពីការបង្កើនពាណិជ្ជកម្មនិងវិនិយោគ ការតភ្ជាប់ ការអភិវឌ្ឍប្រកបដោយចីរភាព និងបំរែបំរួលអាកាសធាតុជាដើម។ កិច្ចប្រជុំនេះ នឹងធ្វើឡើងក្រោមមូលបទ អឺរ៉ុបនិងអាស៊ី៖ ដៃគូសកលសម្រាប់បញ្ហាប្រឈមសកល ហើយក្នុងនោះ លោកនាយករដ្ឋមន្ត្រី ហ៊ុន សែន នឹងធ្វើបទអន្តរាគមន៍មួយ ស្តីពី របៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាពនិងបរិយាប័ន្ន។
ក្រៅពីនេះ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលអ្នកដឹកនាំវិនិយោគសាកល នៃវេទិកាវិនិយោគពិភពលោកឆ្នាំ២០១៨ របស់សន្និសីទសហប្រជាជាតិ ស្តីពី ពាណិជ្ជកម្ម និងការអភិវឌ្ឍ។ កិច្ចប្រជុំទី២នេះ នឹងធ្វើឡើងនៅទីក្រុងហ្សឺណែវ ប្រទេសស្វីស ចាប់ពីថ្ងៃទី ២២ ដល់ថ្ងៃទី ២៤ តុលា។ នៅចន្លោះកិច្ចប្រជុំសំខាន់ៗទាំងពីរនេះ ប្រមុខរដ្ឋាភិបាលកម្ពុជា នឹងបំពេញទស្សនកិច្ចនៅប្រទេសតួកគី ចាប់ពីថ្ងៃទី ២០ ដល់ថ្ងៃទី ២២ តុលា។ នេះបើតាមការប្រកាសរបស់លោកនាយករដ្ឋមន្ត្រី តាមរយៈគណនីយហ្វេសបុកផ្លូវការរបស់លោក។
អ្វីជាការកត់សម្គាល់ នេះគឺជាដំណើរចេញទៅចូលរួមកិច្ចប្រជុំសំខាន់ពីរនៅអឺរ៉ុប និងជាលើកដំបូងរបស់លោក ហ៊ុន សែន បន្ទាប់ពីលោកបានជាប់ឆ្នោតជានាយករដ្ឋមន្ត្រីកម្ពុជាអាណត្តិទី៦។ ដំណើរទៅអឺរ៉ុបរបស់លោក ហ៊ុន សែន ធ្វើឡើងចំពេលដែលគណៈកម្មការអឺរ៉ុបខាងពាណិជ្ជកម្ម កំពុងដំណើរការដកកម្ពុជាចេញពីប្រព័ន្ធអនុគ្រោះពន្ធ EBA បន្ទាប់ពីមានការរិះគន់ពីការរំលោភសិទ្ធិមនុស្ស និងសិទ្ធិនយោបាយនៅកម្ពុជា។ យ៉ាងណាក៏ដោយ កាលពីថ្ងៃទី ១៦ តុលា សភាពាណិជ្ជកម្មអឺរ៉ុបប្រចាំនៅកម្ពុជា បានសរសេរលិខិតមួយច្បាប់ ផ្ញើទៅកាន់លោកស្រី Cecilia Malmstrom ស្នងការទទួលបន្ទុកពាណិជ្ជកម្មគណៈកម្មការអឺរ៉ុប ដើម្បីជួបពិភាក្សានៅក្រៅកិច្ចប្រជុំកំពូលអាស៊ីអឺរ៉ុប ខណៈដែលមន្ដ្រីរដ្ឋាភិបាលកម្ពុជាអះអាងថា ខ្លួនកំពុងតែខិតខំដោះស្រាយបញ្ហានេះ។
សូមបញ្ជាក់ថា ក្នុងអំឡុងពេលស្នាក់នៅក្នុងប្រទេសបែលហ្ស៊ិក និងប្រទេសស្វីស លោកនាយករដ្ឋមន្ត្រី ហ៊ុន សែន នឹងមានជំនួបទ្វេភាគីដាច់ដោយឡែកពីគ្នាជាមួយមេដឹកនាំ និងថ្នាក់ដឹកនាំគណៈប្រតិភូដទៃទៀត។ ក្នុងនោះមិនខុសពីទំលាប់រាល់ដង លោកនាយករដ្ឋមន្ត្រី ហ៊ុន សែន ក៏នឹងជួបសំណេះសំណាលជាមួយសហគមន៍ខ្មែរ សិស្ស និស្សិត ដែលកំពុងរស់នៅនិងសិក្សា នៅក្នុងប្រទេសបែលហ្ស៊ិក និងប្រទេសស្វីស ផងដែរ។ បើតាមគម្រោង លោកនាយករដ្ឋមន្ត្រី ហ៊ុន សែន នឹងមកដល់ប្រទេសកម្ពុជាវិញ នៅថ្ងៃទី ២៥ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ