លោកហ៊ុន សែន៖ ការបែងចែកឱ្យដាច់រវាងក្រសួងបរិស្ថាន និងកសិកម្មជាកំណែទម្រង់ការចាំបាច់
លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី២៥ ខែកុម្ភៈនេះ បានចូលរួមពិធីសម្ពោធក្រសួងបរិស្ថានថ្មី និងពិធីបើកសន្និបាទក្រសួងបរិស្ថាន។ ប្រមុខរដ្ឋាភិបាលរូបនេះ បានសម្រេចឱ្យមានការផ្ទេរឱ្យដាច់ស្រាច់នៅការទទួលខុសត្រូវរវាងក្រសួងបរិស្ថាន និងក្រសួងកសកម្ម។ បើតាមលោកនាយករដ្ឋមន្ត្រី នេះគឺជាកំណែទម្រង់ចាំបាច់សម្រាប់រដ្ឋាភិបាលរបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ចាប់ពេលនេះតទៅក្រសួងបរិស្ថាន និងក្រសួងកសិកម្មនឹងមានភារៈកិច្ច និងការទទួលខុសត្រូវដាច់ដោយឡែកពីគ្នាចំពោះការគ្រប់គ្រងដីសម្បទាន និងការថែរក្សាធនធានធម្មជាតិ។ ថ្លែងដោយកាយវិការចង្អុលទៅកាន់មន្ត្រីក្រោមបញ្ជា លោកនាយករដ្ឋមន្ត្រី៖
ប្រមុខរដ្ឋាភិបាលរូបនេះបានបន្ថែមថា ក្រសួងបរិស្ថាននឹងត្រូវផ្ទេររាល់គម្រោងអភិវឌ្ឍន៍ដីសម្បទានសេដ្ឋកិច្ច និងដំណាំកសិកម្មទៅឱ្យក្រសួងកសិកម្មគ្រប់គ្រង ហើយក្រសួងកសិកម្មវិញក៏ត្រូវផ្ទេររាល់កិច្ចការងារថែរក្សាការពារ តំបន់អភិរក្សមកឱ្យក្រសួងបរិស្ថានវិញផងដែរ។ មិនត្រឹមតែប៉ុណ្ណោះ លោកនាយករដ្ឋមន្ត្រីហ៊ុន សែនបានណែនាំឱ្យមន្ត្រីក្រោមឱវាទរៀបចំកែប្រែឈ្មោះក្រសួងបរិស្ថានបច្ចុប្បន្នទៅជាក្រសួងធនធានធម្មជាតិ និងបរិស្ថាន។ ជាការកែប្រែដែលប្រមុខរដ្ឋាភិបាលថា ដើម្បីឆ្លើយតបទៅនឹងវិសាលភាពការងារ និងសមស្របតាមនិន្នាការក្នុងតំបន់។
លោកសៅ សុភាពអ្នកនាំពាក្យក្រសួងបរិស្ថានបានបន្ថែមថាការផ្ទេរស្ថាប័នរវាងក្រសួងទាំងពីរនេះនឹងជួយសម្រួលការងារថែរក្សាធនធានធម្មជាតិដែលគួរតែនៅក្រោមក្រសួងបរិស្ថាន និងការងារអភិវឌ្ឍន៍គួរតែនៅក្រោមក្រសួងកសិកម្មដើម្បីបម្រើដល់បុព្វហេតុនៃការអភិរក្សថែរក្សា និងការអភិវឌ្ឍប្រកបដោយចិរភាព។ លោកសៅ សុភាព ក៏បានទទួលស្គាល់ថាកន្លងមក ក្រសួងមានភាពលំបាកក្នុងកិច្ចការងាររបស់ខ្លួនព្រោះតែជាន់ដែនសមត្ថកិច្ចគ្នា។ ទន្ទឹមនឹងនេះ អ្នកនាំពាក្យក្រសួងបរិស្ថាន បានឱ្យដឹងថា ក្រសួងរបស់លោកនឹងត្រូវផ្ទេរចំនួន១នាយកដ្ឋានដែលធ្វើការងារលើផ្នែកអភិវឌ្ឍន៍។ដោយឡែក លោកអ៊ុក រ៉ាប៊ុន រដ្ឋមន្ត្រីក្រសួងកសិកម្ម នៅមិនទាន់ហ៊ានឆ្លើយថាក្រសួងរបស់លោកត្រូវផ្ទេរនាយកដ្ឋាន ឬរដ្ឋបាលណាខ្លះមកឱ្យក្រសួងបរិស្ថាននោះទេព្រោះថាត្រូវរងចាំប្រជុំសិន។
ដោយឡែកលោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាលស្តីពីកម្ពុជា បានគាំទ្រចំពោះការផ្ទេរមុខងារ និងភារៈកិច្ចរបស់ក្រសួងទាំងពីរនេះ ដើម្បីធានាដល់ការគ្រប់គ្រងឱ្យបានច្បាស់លាស់ និងដាច់ដោយឡែកពីគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ