លោកហ៊ុន សែន៖ រដ្ឋាភិបាលបើកចំហចំពោះការពិនិត្យផែនទីក្រោយយូអ៊ិន និងមហាអំណាចបានផ្តល់ឱ្យ
ក្រោយការផ្ញើលិខិតទៅកាន់អង្គការសហប្រជាជាតិ សហរដ្ឋអាមេរិក និងអង់គ្លេស រួមទាំងបារាំង ដើម្បីស្នើសុំយកផែនទីបោនមកបញ្ជាក់ពីភាពស្អាតស្អំរបស់រដ្ឋាភិបាល លោកនាយករដ្ឋមន្ត្រីនៅថ្ងៃព្រហស្បតិ៍ទី១៦ កក្កដានេះបានប្រកាសថា រដ្ឋាភិបាលនឹងបើកចំហរឱ្យគ្រប់គណបក្សនយោបាយ អាចចូលពិនិត្យបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
“មិនអាចទុកឱ្យគេចោទប្រកាន់ បើទោះបីយើងខំប្រឹងពន្យល់យ៉ាងណា អញ្ចឹងទេសុំផែនទីពីបរទេស។ អ្នកផលិតគឺបារាំង ហើយហៅអ្នកឯកទេសបារាំងមកតែម្តង ហើយគឺថាពេលហ្នឹងបក្សនានា បក្សណាប៉ុន្មានក៏ដោយមួយប្រទេសចង់ចូលមកពិនិត្យមកផ្ទៀងមក សូមអញ្ជើញ”។ នេះជាការប្រកាសពីលោកនាយករដ្ឋមន្ត្រីហ៊ុន សែនចំពោះបញ្ហាព្រំដែនជាមួយប្រទេសវៀតណាម។
ការប្រកាសនៅថ្ងៃព្រហស្បតិ៍នេះ គឺមួយថ្ងៃបន្ទាប់ពីលោកបានផ្ញើលិខិតបីផ្សេងគ្នាទៅកាន់ប្រទេសមហាអំណាចអង់គ្លេស បារាំង និងសហរដ្ឋអាមេរិក។ មហាអំណាចទាំងបីដែលបារាំងជាអ្នកផលិតផែនទី ហើយអង់គ្លេសអាមេរិកជាអ្នកទទួលស្គាល់ផែនទីបោន ដែលកម្ពុជាបានយកទៅតម្កល់ទុកនៅអង្គការសហប្រជាជាតិឆ្នាំ១៩៦៤ ។ លោកនាយករដ្ឋមន្ត្រីបានបញ្ជាក់ថា ការចោទពីបក្សប្រឆាំងរឿងប្រើប្រាស់ផែនទីក្លែងក្លាយ គឺជារឿងអយុត្តិធម៌ចំពោះរូបលោក និងរដ្ឋាភិបាលនៃបក្សកាន់អំណាចដែលមិនអាចទទួលយកបានទេ។
លោកហ៊ុន សែនកាលពីល្ងាចថ្ងៃពុធ បានសរសេរលិខិតបីច្បាប់ទៅកាន់ប្រធានាធិបតីបារាំងក្នុងនាមដែលបារាំងជាអ្នកគូសផែនទីខ្នាតលើ១/១រយពាន់ ប្រធានាធិបតីអាមេរិក និងនាយករដ្ឋមន្ត្រីអង់គ្លេស ក្នុងនាមប្រទេសមហាអំណាចទាំងពីរជាអ្នកទទួលស្គាល់អធិបតេយ្យភាពកម្ពុជា។ អធិបតេយ្យភាពដែលកម្ពុជាបានប្រកាសនៅក្នុងការរៀបចំសន្និសីទចតុភាគី ឆ្នាំ១៩៦៤ដែលមានប្រទេសអង់គ្លេស និងអាមេរិក ជាអ្នកដឹងឮ។
បន្ថែមពីលើនេះ អង់គ្លេស និងអាមេរិក ទាំងសម័យរដ្ឋាភិបាលសង្គមរាស្ត្រនិយម និងសម័យរដ្ឋាភិបាលបច្ចុប្បន្ន បានឆ្លើយឆ្លងជាមួយកម្ពុជាពីកិច្ចការព្រំដែននេះ ហើយកម្ពុជាជឿជាក់ថាប្រទេសទាំងពីរនេះ នឹងមានផែនទីបោន។ ផែនទីដែលនឹងអាចដោះស្រាយចម្ងល់ចំពោះការបោះបង្គោលព្រំដែនជាមួយវៀតណាម បន្ទាប់ពីបក្សប្រឆាំងនិងមតិសង្គមជាតិមួយចំនួន បានចោទរដ្ឋាភិបាលកម្ពុជាថាបានធ្វើឱ្យបាត់បង់ទឹកដី។
ក្រៅពីនេះ លោកនាយករដ្ឋមន្ត្រីហ៊ុន សែន បានសង្កត់ធ្ងន់ថា ការផ្តល់ផែនដើមគឺនឹងអាចបញ្ចប់ការញុះញង់បង្កើតឱ្យមានស្មារតីជាតិនិយមជ្រុលដែលអាចបង្កើតមហន្តរាយដ៏ធំធេងដល់ជាតិកម្ពុជា។ សូមបញ្ជាក់ថា បញ្ហាព្រំដែនកម្ពុជា និងវៀតណាម បានកើនកម្តៅមិនធ្លាប់មាននាពេលថ្មីៗនេះ។ ប្រជាពលរដ្ឋប្រទេសទាំងពីរបានផ្ទុះអំពើហិង្សានៅព្រំដែនដែលបណ្តាលឱ្យមានរបួសទាំងសងខាង កម្ពុជាបានចេញកំណត់ទូតប្រឆាំងនឹងសកម្មភាពវៀតណាមនៅតាមព្រំដែនក្នុងខេត្តរតនៈគីរី និងខេត្តកណ្តាលជាដើម។
លោកយ៉ែម បុញ្ញឫទ្ធិ បានអះអាងថា គណបក្សសង្គ្រោះជាតិសូមគាំទ្រ ប៉ុន្តែការអនុញ្ញាតិមើលផែនទីពីរដ្ឋាភិបាលគឺជាជំហ៊ានដំបូងតែប៉ុណ្ណោះ។ បើតាមអ្នកនាំពាក្យរូបនេះ ការបង្កើតគណៈកម្មការចម្រុះចំពោះកិច្ចដែលមានសមាភាពមកពីគណបក្សនយោបាយនៅក្នុងអាសនៈសភាគឺជាយន្តការបន្តដើម្បីបង្ហាញពីតម្លាភាព។លោក សុខទូច បន្ថែមថា ការអនុញ្ញាតិឱ្យគ្រប់និន្នាការចូលរួមពិនិត្យមើលផែនទីដែលបានពីអន្តរជាតិនោះ គឺនឹងអាចបញ្ចប់ការមិនទុកចិត្តគ្នា និងបញ្ចប់ការធ្វើពាណិជ្ជកម្មលើបញ្ហាព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ