លោកហ៊ុន សែន ទាត់ចោលការប្រើគោរមងារ “សម្តេច”
នៅព្រឹកថ្ងៃទី៨ កក្កដានេះ លោកនាយករដ្ឋមន្ត្រីហ៊ុន សែនបានដឹកនាំកិច្ចប្រជុំគណៈរដ្ឋមន្ត្រីរបស់ខ្លួន ដើម្បីពិភាក្សាទៅសេចក្តីព្រាងច្បាប់ និងពិធីសារមួយចំនួន។ ប៉ុន្តែនៅក្នុងនោះ ប្រមុខរដ្ឋាភិបាល បានប្រកាសទាត់ចោលការណែនាំឱ្យប្រើប្រាស់គោរមងារ«សម្តេច» បន្ទាប់ពីក្រសួងព័ត៌មានបានដាក់កំហិតខ្លាំង។
ចុះផ្សាយនៅថ្ងៃ៖
ស្តាប់ - ០១:៤៩
នៅទីបំផុត លោកនាយករដ្ឋមន្ត្រីហ៊ុន សែន បានសម្រេចទាត់ចោលការណែនាំឱ្យប្រើគោរមងារជា “សម្តេច”។ ការសម្រេចរបស់ប្រមុខរដ្ឋាភិបាល ដែលមានងារជាសម្តេចអគ្គមហាសេនាបតីតេជោ គឺបន្ទាប់ពីក្រសួងព័ត៌មានកាលពីថ្ងៃទី ៦កក្កដា បានដាក់កំហិត និងព្រមានខ្លាំងៗជាលើកចុងក្រោយដល់ស្ថាប័នប្រព័ន្ធផ្សព្វផ្សាយទាំងអស់ ត្រូវតែប្រើគោរមងារសម្តេចនៅក្នុងការអត្ថាធិប្បាយ ឬសំណេររបស់ខ្លួន។ ក្រសួងបន្តថា ស្ថាប័នដែលអនុវត្តផ្ទុយពីការណែនាំនេះ នឹងត្រូវប្រឈមនឹងការដកអាជ្ញាប័ណ្ណ។
សូមរំលឹកថា មុនការព្រមានខ្លាំងៗនេះ ក្រសួងកាលពីថ្ងៃទី១២ ឧសភា កន្លងទៅបានណែនាំផ្ទាល់មាត់ទៅដល់ម្ចាស់ស្ថាប័នប្រព័ន្ធផ្សព្វផ្សាយទាំងអស់ឱ្យប្រើគោរមងារជាសម្តេចដែលព្រះមហាក្សត្រប្រទានដល់ថ្នាក់ដឹកនាំជាតិ។ ហើយឱសានុវាទ ដែលត្រូវផុតកំណត់នោះ គឺចុងខែមិថុនាកន្លងទៅនេះ។ ប៉ុន្តែស្ថាប័នសារព័ត៌មានមួយចំនួន មិនបានគោរពតាមការណែនាំនេះទេដូចជាកាសែត ភ្នំពេញប៉ុស្តិ៍ និងកាសែតឌឹខេមបូឌាដេលី វិទ្យុសំឡេងសហរដ្ឋអាមេរិក វិទ្យុអាស៊ីសេរី និងវិទ្យុបារាំងអន្តរជាតិជាខេមរភាសាជាដើម។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបញ្ជាក់មូលហេតុ ដែលលោកនាយករដ្ឋមន្ត្រីសម្រេចទាត់ចោលការណែនាំនេះ គឺលោកមិនគាំទ្រដល់ចំណាត់ការរបស់ក្រសួងព័ត៌មាននោះទេ។ ជាការមិនគាំទ្រ ព្រោះតែនោះ គឺជាការបង្ខិតបង្ខំទៅដល់អ្នកសារព័ត៌មាន។ សម្រាប់លោកនាយករដ្ឋមន្ត្រីហ៊ុន សែន សារព័ត៌មានទាំងអស់មានជម្រើសក្នុងការប្រើគោរមងារជាសម្តេចនេះ។
ក្រៅពីនេះ ក្នុងកិច្ចប្រជុំគណៈរដ្ឋមន្ត្រី ប្រមុខរដ្ឋាភិបាលកម្ពុជា ក៏បានដឹកនាំការពិភាក្សាពីកិច្ចព្រមព្រៀង និងពិធីសារមួយចំនួន ដូចជាកិច្ចព្រមព្រៀងស្ដីពីការបង្កើតអង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ និងពិធីសារស្តីពីការបើកចំហសេវាហិរញ្ញវត្ថុជាដើម។
យ៉ាងណាក៏ដោយ បន្ទាប់ពីការព្រមានខ្លាំងៗពីក្រសួងព័ត៌មាន ស្ថាប័នមួយចំនួនដូចជាវិទ្យុវីអូឌីជាដើម ក៏បានប្តូរការប្រើគោរមងារពីលោក មកជាសម្តេចវិញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ