លោក ហ៊ុន សែន៖ «សម រង្ស៊ី ជាដៃគូដ៏ល្អរបស់ខ្ញុំ»
លោកនាយករដ្ឋមន្ត្រី ហ៊ុន សែន ថ្លែងថ្ងៃនេះថា លោក សម រង្ស៊ី គឺជាសមភាគី និងជាដៃគូដ៏ល្អមួយរបស់លោក។ នៅក្នុងពិធីបើកព្រឹត្តិការណ៍អង្គរសង្ក្រាន្ត ឯខេត្តសៀមរាប លោកនាយករដ្ឋមន្ត្រី អំពាវវ នាវឲ្យគាំទ្រវប្បធម៌សន្ទនា ហើយសូមឲ្យពលរដ្ឋគ្រប់និន្នាការទាំងអស់ ត្រូវតែរួបរួមគ្នា ដើម្បីសេចក្តីសុខនិងការអភិវឌ្ឍរបស់ជាតិយើងទាំងអស់គ្នា។ ចំណែក លោក សម រង្ស៊ី កាលពីម្សិលមិញ ក៏បានថ្លែងដែរថា ឆ្នាំថ្មី ឆ្នាំមមែនេះ គឺជាឆ្នាំល្អ។ ភាពតានតឹងបានបញ្ចប់ជាស្ថាពរ ហើយគណបក្សសង្គ្រោះជាតិ នឹងនៅតែបន្តវប្បធម៌សន្ទនា ជាមួយគណបក្សកាន់អំណាច ដោយការគោរពនិងទុកចិត្តគ្នាទៅវិញទៅមក។
ចុះផ្សាយនៅថ្ងៃ៖
លោកនាយករដ្ឋមន្ត្រី ហ៊ុន សែន បានថ្លែងពីខេត្តសៀមរាបមកថា លោកសប្បាយរីករាយណាស់ ដែលមានប្រមុខបក្សក្រៅរដ្ឋាភិបាល គឺ លោក សម រង្ស៊ី បានចូលរួមនៅក្នុងពិធីបើកព្រឹត្តិការណ៍អង្គរសង្ក្រាន្តដែរ ព្រោះនេះគឺជាប្រវត្តិសាស្ត្រដែលប្រមុខបក្សនៅក្នុងនិងក្រៅរដ្ឋាភិបាល បានជួបជុំនិងចូលរួមពិធីបុណ្យចូលឆ្នាំប្រពៃណីជាតិជាមួយគ្នា។ លោកអនុប្រធានបក្សប្រជាជន បានសម្តែងភាពជិតស្និតជាមួយនឹងលោក សម រង្ស៊ី ដែលគេកម្រនឹងបានឮ។
លោកនាយករដ្ឋមន្ត្រី ហ៊ុន សែន ៖ «ខ្ញុំបានជួបដៃគូដ៏ល្អមួយ គឺឯកឧត្តម សម រង្ស៊ី ដែលថ្ងៃនេះ មានវត្តមាន។ ខ្ញុំបាននិយាយនៅក្នុងការចរចា អំពីបញ្ហាពាក់ព័ន្ធ ជាមួយថា យើងត្រូវបង្កើតការសន្ទនាឲ្យបានច្រើនបំផុតតាមដែលអាចធ្វើទៅបាន។ ឯកឧត្តម សម រង្ស៊ី ក៏បានទទួលយក ហើយយើងបានក្លាយជាសហស្ថានិកនៃវប្បធម៌សន្ទនាដែលយើងទទួលភារកិច្ចបន្ត និងដឹកនាំការងារនេះ ផ្ទាល់របស់យើង។ សូមអបអរសារទ»
បន្ថែមពីលោក ហ៊ុន សែន បានរម្លឹកថា ជាងពាក់កណ្តាលជីវិតរបស់លោក គឺលោកចរចាដើម្បីសន្តិភាពច្រើនជាងធ្វើចម្បាំង។ លោកចង់ឲ្យប្រជាពលរដ្ឋគ្រប់រូបនិងគ្រប់គណបក្សនយោបាយទាំងអស់នៅកម្ពុជា ប្រកាន់យកវប្បធម៌សន្ទនា។ លោកនាយករដ្ឋមន្ត្រី បានប្រកាសថា វប្បធម៌សន្ទនាដែលលោកនិងលោកសម រង្ស៊ី ជាសហស្ថាបនិកនេះ គឺមិនមែនសម្រាប់តែមួយជំនាន់របស់លោកនោះទេ គឺសម្រាប់ជនជំនាន់ក្រោយ និង ជំនាន់កូនៗរបស់លោកបន្ថែមទៀត។
លោកនាយករដ្ឋមន្ត្រី ហ៊ុន សែន ក៏បានអំពាវឲ្យប្រជាពលរដ្ឋ មិនថា អ្នកបោះឆ្នោតគាំទ្រគណបក្សណាមួយនោះទេ គឺជាជនជាតិខ្មែរទាំងអស់គ្នា ត្រូវតែរួបរួមសាមគ្គី ជជែកចរចាគ្នា ដើម្បីសេចក្តីសុខនិងវឌ្ឍនភាពរបស់ជាតិទាំងអស់គ្នា។ លោក សម រង្ស៊ី និងភរិយា បានស្តាប់សុន្ទរកថាដោយយកចិត្តទុកដាក់ ហើយពេលខ្លះ លោកប្រមុខបក្សសង្គ្រោះជាតិនិងភរិយា ញញឹម និងបាន ងក់ក្បាលយល់ស្របតាម ព្រមទាំងទះដៃអបអរសារទផងដែរ។ ទោះយ៉ាងណា លោក ហ៊ុន សែន បានគូសបញ្ជាក់ថា ការសន្ទនាជាមួយគ្នា គឺមិនមែនឃុបឃិតគ្នា ធ្វើអំពើផ្តេសផ្តាស់នោះទេ។
លោកនាយករដ្ឋមន្ត្រី ហ៊ុន សែន ៖«ហើយសូមកុំភ័ន្តច្រឡំថា វប្បធម៌សន្ទនានេះ ! តិតៗទៅអង្គុយជាមួយគ្នា ដើម្បីឃុបឃិតគ្នាធ្វើរឿងអីមួយ! វប្បធម៌សន្ទនារបស់យើង គោលគោលដៅសំខាន់ពីរយ៉ាង មួយ៖ពង្រីងសន្តិភាព មួយទៀត៖ជំរុញការអភិវឌ្ឍប្រទេសជាតិរបស់យើង»។
ក្រៅពីការថ្លែងសរសើរពីកិច្ចខិតខំប្រឹងប្រែងរបស់ក្រុមការងារចរចានៃបក្សទាំងពីរក្នុងការស្វែងរកសន្តិភាពនាពេលកន្លងទៅ លោក ហ៊ុន សែន ក៏បានផ្ញើសារដល់បក្សដទៃផ្សេងទៀតនៅកម្ពុជាផងដែរ។ លោកថា គ្រប់បក្សនយោបាយទាំងអស់នៅកម្ពុជា អាចមើលមុខគ្នានិងជជែកចរចាគ្នា បានក្នុងនាមជាខ្មែរដូចគ្នា។ ទាំងជជែករវាង បក្សនយោបាយនៅក្រៅរដ្ឋាភិបាលជាមួយនឹងបក្សនៅក្រៅរដ្ឋាភិបាល ឬបក្សនៅក្នុងរដ្ឋាភិបាលជាមួយនឹងបក្សនៅក្រៅរដ្ឋាភិបាល គឺសុទ្ធតែអាចជជែកគ្នាបានទាំងអស់ ដើម្បីសេចក្តីត្រូវការ គឺសេចក្តីសុខរបស់ជាតិ។ នេះបើតាមលោក ហ៊ុន សែន។
ជាបុគ្គលមានឥទ្ធិពលខ្លាំងនៅក្នុងបក្សកាន់អំណាច លោកប្រមុខរដ្ឋាភិបាល បានបន្ទន់ឥរិយាបថយ៉ាងខ្លាំង នៅក្នុងសុន្ទរថារយៈពេលជិត២ម៉ោងរបស់លោក។ លោក ហ៊ុន សែន ក៏បានរម្លឹកឡើងវិញថា ក្នុងការចរចា ត្រូវតែឲ្យតម្លៃនិងគោរពគ្នា។ លោកថែមទាំងបានរៀបរាប់ថា តាំងពីការពីអង្គុយនៅតុចរចាដ៏ត្រូវអង្គុយដោយស្មើចំពោះមុខគ្នា ដោយមិនឲ្យខាងណាអង្គុយខ្ពស់ជាងឬមានប្រៀបជាងនោះដែរ៕
ដោយ ហេង ឧត្តម
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ