បញ្ហាព្រំដែនគឺជាប្រធានបទធំរបស់លោក ហ៊ុន សែន ជាមួយខ្មែរនៅបារាំង
លោកនាយករដ្ឋមន្ត្រីហ៊ុន សែន កាលពីថ្ងៃ២៥ តុលា បានជួបជាមួយពលរដ្ឋខ្មែរនៅប្រទេសបារាំងប្រមាណ៨០០នាក់។ ក្នុងជំនួបនោះ លោកហ៊ុន សែន លើកថ្លែងសារនយោបាយប្រមាណ២ម៉ោង ដែលមានទាំងបញ្ហាសេដ្ឋកិច្ច បញ្ហាកម្ពុជា-អាស៊ាន ទំនាក់ទំនងពាណិជ្ជកម្មរវាងកម្ពុជា-បារាំង និងការបោះឆ្នោតនៅកម្ពុជា។ យ៉ាងណាក៏ដោយ សំណុំរឿងព្រំដែន កម្ពុជា-វៀតណាមជាប្រធានបទធំ។
ចុះផ្សាយនៅថ្ងៃ៖
ស្តាប់ - ០២:៣៣
សំណុំរឿងព្រំដែនគឺជាសារនយោបាយធំជាងគេក្នុងជំនួបរវាងលោកនាយករដ្ឋមន្ត្រីខ្មែរ និងពលរដ្ឋខ្មែរនៅបារាំង។ លោកហ៊ុន សែន នាយករដ្ឋមន្ត្រីជាង៣០ឆ្នាំនៅកម្ពុជា បានលើកឡើងពីការដោះស្រាយបញ្ហាព្រំដែនរវាងកម្ពុជានិងថៃ និងបញ្ហាព្រំដែនស្មុគស្មាញ និងស៊ាំញ៉ាំរវាងកម្ពុជា-វៀតណាម។ លោកនាយករដ្ឋមន្ត្រី បានចំណាយពេលប្រមាណ១ម៉ោង ដើម្បីពន្យល់ និងបកស្រាយជុំវិញសំណុំរឿងព្រំដែននេះ។ រឿងព្រំដែនដែលលោក មានសមរភូមិចំនួនពីរ គឺសមរភូមិក្នុងស្រុកជាមួយគណបក្សសង្គ្រោះជាតិ និងសមរភូមិរវាងកម្ពុជា និងវៀតណាម។ ក្នុងនោះ លោកនាយករដ្ឋមន្ត្រីក៏មិនភ្លេចពីការវាយប្រហារគណបក្សប្រឆាំងរបស់លោក សម រង្ស៊ី និងលោក កឹម សុខានោះទេ។ គណបក្សប្រឆាំង បានប្រើនយោបាយឃោសនាបំពុលបរិយាកាសខុសពីការពិតដែលត្រូវបង្ខំឱ្យលោកត្រូវតែប្រើយន្តការច្បាប់ ដើម្បីទប់ស្កាត់។ លោកហ៊ុន សែនបានលើកឡើងពីករណីលោក ហុង សុខហួរដែលកំពុងជាប់ពន្ធនាគារដោយសារតែសំណុំរឿងព្រំដែននេះដែរ។
ក្រៅពីនេះ ករណីតំបន់ដាក់ដាំ និងតំបន់ដាក់ហូត នៅខេត្តរតនៈគីរី ក្នុងសំណុំរឿងព្រំដែនជាមួយវៀតណាម ក៏ជាអ្វីដែលត្រូវបកស្រាយផងដែរ។ រដ្ឋាភិបាលរបស់លោកនាយករដ្ឋមន្ត្រី នៅតែចិញ្ចឹមចិត្តទាមទារផ្ទៃដីប្រមាណ៥១គីឡូម៉ែត្រក្រឡា ពីប្រទេសវៀតណាមមកវិញ ព្រោះថា ការគូសផែនទីដែលបារាំងបន្សល់ទុក ខុសពីសេចក្តីសម្រេចរបស់អគ្គទេសាភិបាលបារាំងនាសម័យអាណានិគម។ ត្រង់ចំណុចនេះ ប្រមុខរដ្ឋាភិបាលរូបនេះ បានបង្ហាញការសោកស្តាយចំពោះរដ្ឋធម្មនុញ្ញដែលកំណត់ឱ្យកម្ពុជាប្រើប្រាស់ផែនទីតែមួយ គឺផែនទីបោន ខ្នាត១/១រយពាន់។ បើតាមលោកនាយករដ្ឋមន្ត្រី រដ្ឋធម្មនុញ្ញនេះ គឺមិនអាចឱ្យខ្មែរការពារផ្ទៃដីបានគ្រប់ផ្នែកនោះទេព្រោះថា ក្នុងក្តីជាមួយប្រទេសថៃកម្ពុជាប្រើផែនទីខ្នាត១/២រយពាន់ ដោយឡែកជាមួយនឹងវៀតណាមនិងឡាវកម្ពុជាប្រើប្រាស់ផែនទីបោន ខ្នាត១/១រយពាន់ ចំពោះព្រំដែនទឹកជាមួយវៀតណាម កម្ពុជាប្រើប្រាស់ផែនទីខ្នាត១/៣រយពាន់។
ប៉ុន្តែយ៉ាងណាក៏ដោយ លោកនាយករដ្ឋមន្ត្រីហ៊ុន សែន មិនបានបង្ហាញពីចេតនា ឬព្រលយពីការកែប្រែរដ្ឋធម្មនុញ្ញនោះឡើយ។ សូមបញ្ជាក់ថាលោកនាយករដ្ឋមន្ត្រី ហ៊ុន សែនបានធ្វើដំណើរទស្សនៈកិច្ចផ្លូវរដ្ឋទៅកាន់ប្រទេសបារាំង តាមសំណើររបស់ប្រធានាធិបតីបារាំងលោក ហ្វ្រង់ស័រហូឡង់ ចាប់ពីថ្ងៃទី២៥ ដល់ថ្ងៃទី២៧។
សូមបញ្ជាក់ថាក្រៅពីនេះ លោកនាយករដ្ឋមន្ត្រី ក៏បានវាយប្រហារខ្លាំងៗទៅលើលោក សម រង្ស៊ី។ លោក សម រង្ស៊ី ដែលបានប្រដូចលោកជាមួយមេដឹកនាំផ្តាច់ការហ្គាដាហ្វី។ ហ៊ុន សែនប្រកាសថា បើលោកសម រង្ស៊ីចង់មានទំនាក់ទំនងល្អជាមួយលោកវិញ គឺត្រូវសុំទោសលោកជាសាធារណៈ។ យ៉ាងណាក៏ដោយ ជំនួបរវាងលោកនាយករដ្ឋមន្ត្រីហ៊ុន សែន ជាមួយពលរដ្ឋខ្មែរនៅបារាំង គឺធ្វើឡើងក្រោមសំពាធបាតុកម្មពីពលរដ្ឋខ្មែរនៅប្រទេសបារាំងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ