ឆមាសទី១ ឆ្នាំ២០១៦៖ បទល្មើសគ្រឿងញៀនកើនឡើង តែចំនួនគ្រឿងញៀនថយចុះ
គិតចាប់ពីខែមករា ដល់ខែមិថុនា ឆ្នាំ២០១៦នេះ កម្លាំងនគរបាលយុត្តិធម៌បានបង្រ្កាបបទល្មើសគ្រឿងញៀនបានប្រមាណ២.១៥៨ករណី កើតឡើង៣៧ភាគរយលើសឆមាសទី១ ឆ្នាំ២០១៥ កន្លងទៅ។ ចំណែកមនុស្សប្រមាណប្រមាណ៥.២៦៦នាក់ ត្រូវបានអាជ្ញាធរឃាត់ខ្លួន ទាក់ទងនឹងបទល្មើសគ្រឿងញៀននៅក្នុងប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ក្នុងរយៈពេល៦ខែ ឆ្នាំ២០១៦នេះ អាជ្ញាធរបង្រ្កាបបទល្មើសគ្រឿងញៀនបានប្រមាណ២.១៥៨ករណី ហើយកាលពីឆមាសទី១ ឆ្នាំ២០១៥ អាជ្ញាធរបង្រ្កាបបទល្មើសគ្រឿងញៀនបានប្រមាណ១.៥៧៣ករណី។ នេះបើតាម លោកមាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន។
លោកបានបញ្ជាក់ថាមូលហេតុនៃការកើនឡើងការបង្រ្កាបបទល្មើសគ្រឿងញៀននេះ ដោយសារតែសមត្ថកិច្ចបានទទួលការបណ្តុះបណ្តាលជំនាញ ហើយសមត្ថកិច្ចបានផ្ទេរការទទួលខុសត្រូវពីថ្នាក់ជាតិទៅថ្នាក់មូលដ្ឋាន។ ការផ្ទេរការទទួលខុសត្រូវពីថ្នាក់ជាតិ ទៅសមត្ថកិច្ចមូលដ្ឋាននោះ ព្រោះដោយសារតែសមត្ថកិច្ចថ្នាក់ជាតិមិនអាចចុះបង្រ្កាបគ្រប់កន្លែងទេ គឺមានតែសមត្ថកិច្ចនៅតាមមូលដ្ឋានទេ។ លោកក៏បានអំពាវនាវឲ្យសមត្ថកិច្ចសហការជាមួយអាជ្ញាធរមូលដ្ឋានទៀត ដើម្បីបង្កើតយន្តការនៅភូមិឃុំ ទើបអាចដោះស្រាយបះញ្ហាគ្រឿងញៀនបាន។
បើទោះបីជាករណីគ្រឿងញៀនមានការកើនឡើងក៏ដោយ ប៉ុន្តែចំនួនគ្រឿងញៀនដែលអាជ្ញាធរចាប់បានគឺមានចំនួនតិចទៅវិញទេ ក្នងរយៈពេល៦ ខែឆ្នាំ២០១៦ ពោលគឺបរិមាណនេះមានការថយចុះប្រៀបធៀននឹងងរយៈពេលដូចគ្នាកាលពីឆ្នាំមុន។ គ្រឿងញៀន ដែលអាជ្ញាធរចាប់បាននៅពេលនេះ អាជ្ញាធរជាតិប្រយុទ្ធប្រឆាំងគ្រឿងញៀនមិនអាចកំណត់តម្លៃជាទឹកប្រាក់បាននៅឡើយទេ។ នេះបើតាមលោក មាស វិរិទ្ធ។
លោកបន្ថែមថា រាល់ការបង្រ្កាបបទល្មើសគ្រឿងញៀន ដោយសមត្ថកិច្ច ឬនគរបាលយុត្តធម៌ ជនល្មើស ឬជនសង្ស័យ ត្រូវបានបញ្ជូនទៅតុលាការទាំងអស់ ហើយតុលាការជាអ្នកមានសិទ្ធិសម្រេចថាអ្នកណាមានទោស ហើយអ្នកណាបញ្ជូនទៅមណ្ឌលកែប្រែ។
សូមបញ្ជាក់ថានៅក្នុងទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦មិថុនា កន្លងទៅអាជ្ញាធរជាតិប្រយុទ្ធប្រឆាំងគ្រឿងញៀនបានដុតបំផ្លាញគ្រឿងញៀនប្រមាណ១,៦៤តោន រួមមានមេតំហ្វេតាមីន ហេរ៉ូអ៊ីន កញ្ឆាស្ងួត ដែលរឹបអូស និងចាប់បានកាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ